ފުލުހުންގެ ޑޯގް ސްކޮޑް ބޭނުންކޮށްގެން ފުލުހުންގެ ހާއްސަ އޮޕަރޭޝަނެއް ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ފަށައިފި އެވެ.
ފުލުހުން މިއަދު ބުނީ، ރާއްޖެ އަށް މަސްތުވާތަކެތި އެތެރެކުރުން ހުއްޓުވުމަށް، ކަސްޓަމްސް އާއި އެމްއޭސީއެލް ގުޅިގެން ހާއްސަ މަސައްކަތްތަކެއް ކުރަމުން އަންނަ ކަމަށެވެ.
"މި މަސައްކަތުގެ ތެރެއިން ޑޯގް ސްކޮޑް އެއާޕޯޓުގައި ދަނީ ހަރަކާތްތެރިވަމުން،" ފުލުހުން ބުންޏެވެ.
މި ފަހުން ފުލުހުން ވަނީ ރާއްޖެ އަށް މަސްތުވާތަކެތި އެތެރެކުރަން އުޅުނު ބަޔަކު ހިފަހައްޓައިފަ އެވެ. އިނގިރޭސި ވިލާތަށް ރާއްޖެ މަގުން މަސްތުވާތަކެތި އެތެރެކުރަން އުޅުނު މެލޭޝިއާގެ ދެ މީހަކު ވެސް ދާދި ފަހުން ވީއައިއޭ އިން ހައްޔަރުކުރި އެވެ.
އަދި ރާއްޖެއަށް މަސްތުވާތަކެތި ގެނައި އުމުރުން ދުވަސްވީ ދިވެއްސަކު ވެސް މި ފަހުން ވަނީ ހައްޔަރުކޮށްފަ އެވެ.