މީޑިއާ ބިލާ ގުޅިގެން ނޫސްވެރިންގެ ފަރާތުން ކުރިމަތިކުރުވި ޕްރެޝަރާ އެކު، ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ޚަލީލް އާއި ޔޫތު މިނިސްޓަރު އިބްރާހިމް ވަހީދު (އަސްވާޑު) ކުރިމައްޗަށް ނުކުމެވަޑައިގެން.-- ފޮޓޯ: ނިޝާން އަލީ | މިހާރު
28 އޯގަސްޓް 2025 - 12:51
މީޑިއާގެ މިނިވަންކަން ހަނިކުރެވޭ ގޮތަށް ރައްޔިތުންގެ މަޖިލީހަށް ހުށަހަޅާފައި ބިލުގައި އެއްބަސްނުވެވޭ ގިނަ ކަންތައްތަކެއް އެބަހުރި ކަމަށް ޔޫތު މިނިސްޓަރު އިބްރާހިމް ވަހީދު (އަސްވާޑު) މިއަދު ވިދާޅުވެއްޖެ އެވެ.
ސަރުކާރުގެ އިސްވެރިންނާ ބައްދަލުކުރަން ނޫސްވެރިން ޕްރެޝަރު ކުރަމުން ދަނިކޮށް، ރައީސް އޮފީހުގެ ބޭރުގައި ހުންނަ މި ސަރުކާރުން ހެދި "މީޑިއާ ފެންޑާ"ގެ ކުރިމައްޗަށް ކޮމިއުނިކޭޝަން މިނިސްޓަރު އިބްރާހިމް ޚަލީލާއި އަސްވާޑު ނުކުމެވަޑައިގަތުމާ އެކު ނޫސްވެރިން ވަނީ އެ ދެ ބޭފުޅުންނަށް ވަރަށް ގިނަ ސުވާލުތައް ކުރިމަތި ކޮށްފަ އެވެ.
އަޅުގަނޑު ދާނަން މަޖިލީހަށް މި ބިލަށް ވާހަކަދައްކަން. ކަންބޮޑުވުންތަކަށް ހައްލު ހޯދަން ވާހަކަދައްކަން ދާނަން: ޔޫތު މިނިސްޓަރު އަސްވާޑު
ނޫސްވެރިން ކުރިމަތިކުރުވި ސުވާލުތަކަށް ޖަވާބު ދެއްވަމުން، ކުރީގެ ނޫސްވެރިޔާ އަސްވާޑު ވިދާޅުވީ ނޫސްވެރިކަމަށް އޭނާ ވަރަށް ލޯބި ކުރައްވާ ކަމަށާއި އެ ބިލުގައި ހުރި ހުރިހާ އެއްޗަކަށް އޭނާ އެއްބަސްނުވާ ކަމަށެވެ.
އެ ބިލުގައި އެއްބަސްނުވޭ ވަރަށް ގިނަ ކަންކަން ހުރި ކަމަށް ވިދާޅުވި ނަމަވެސް، ނޫސްވެރިން ތަކުރާރުކޮށް ސުވާލު ކުރުމުން ވެސް އަސްވާޑު އޭގެ ތަފުސީލަށް ވަޑައިނުގަތެވެ.
"އަޅުގަނޑު ދާނަން މަޖިލީހަށް މި ބިލަށް ވާހަކަ ދައްކަން. ކަންބޮޑުވުންތަކަށް ހައްލު ހޯދަން ވާހަކަ ދައްކަން ދާނަން،" އޭނާ ވިދާޅުވި އެވެ.
"ތި ބިލުގައި އޮތް ގޯހެއް ވެއްޖެއްޔާ އިސްލާހުކުރަން އަހަރެން ބޭނުންވާނޭ."
ނޫސްވެރިން ލާންވީ ޖަލަށް ނޫން ކަމަށާއި އެ މީހުން "އުލުބައިންދަންވީ" ކަމަށް ވިދާޅުވެ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހު ރައްޔިތުންގެ މަޖިލީހުގެ އިއްޔެގެ ޖަލްސާގައި ދެއްކެވި ވާހަކަތަކާ ގުޅިގެން ވެސް ބައެއް ނޫސްވެރިން ވަނީ އަސްވާޑުއާ ސުވާލު ކުރައްވައިފަ އެވެ.
ބައެއް ނޫސްވެރިން ތަކުރާކުކޮށް އެ ސުވާލު ކުރެއްވުމުން ވެސް އަސްވާޑު ދެއްވި ޖަވާބަކީ "އަޅުގަނޑު ދެއްކި ވާހަކައެއް ނޫން،" ކަމަށެެވެ.
ނޫސްވެރިންނަށް ނިސްބަތްކޮށް ފަލާހު ދެއްކެވި އެ ވާހަކަތައް މޯލްޑިވްސް ޖާނަލިސްޓް އެސޯސިއޭޝަނުން ވަނީ ކުށްވެރި ކޮށްފަ އެވެ. އަދި ފަލާހު ނޫސްވެރިންގެ ކިބައިން މާފަށް އެދުމަށް ވެސް އެ ޖަމިއްޔާއިން ވަނީ ގޮވާލައިފަ އެވެ. މީޑިއާއަށް އަނިޔާކޮށް މަރުގެ އަދަބު ދޭން ޖެހޭ ކަމަށް ގޮވާލުމަކީ ނޫސްވެރިންނާއި މީޑިއާތަކަށް ބިރު ދައްކައި އެ މީހުންގެ މައްޗަށް އަނިޔާވެރިވުމަށް ހިތްވަރުދޭ ގޮތަށް ދެއްކެވި ވާހަކަތަކެއް ކަމަށް ދެކޭ އެ ޖަމިއްޔާ އިން ބުންޏެވެ.
މީޑިއާ ކޮންޓްރޯލްކުރުމާ ބެހޭ ބިލު މަޖިލީހަށް ބަލައިގަތީ އެ ބިލު މަޖިލީހުން ބޭރުކުރަން ގޮވާލައި ނޫސްވެރިން މަޖިލިސް ދޮށަށް އެއްވެ އިހުތިޖާޖުކުރަމުން ދަނިކޮށެވެ. އެ ބިލު މަޖިލީހަށް ބަލައިގަތުމާ އެކު ނޫސްވެރިން ރައީސް އޮފީސް ކައިރިއަށް އެއްވުމުން ފުލުހުން ވަނީ ބާރުގެ ބޭނުންކޮށްގެން ނޫސްވެރިންނަށް ހުރަސްއަޅައި، އެ ސަރަހައްދުން ދުރަށް ޖައްސައިފަ އެވެ. އަދި ބައެއް ނޫސްވެރިން ފުލުހުންގެ ވެހިކަލަށް ގަދަމުން އެރުވުމަށް ފަހު، އޭގެ އިރުކޮޅެއް ފަހުން ދޫކޮށްލި އެވެ.
އެ ސަރަހައްދުން ދުރަށް ޖެއްސުމާ އެކު ނޫސްވެރިން ދެން އެއްވީ ރިޔާސީ ގަނޑުވަރު މުލިއާގެ ކުރިމައްޗަށެވެ. ނޫސްވެރިންގެ އެންމެ ބޮޑު ޑިމާންޑަކަށް ވީ، އެ ބިލުގައި ހުރި ކަންބޮޑުވުންތައް ހިއްސާކުރަން ރައީސް ޑރ. މުހައްމަދު މުއިއްޒުއާ ބައްދަލުކުރުމެވެ.
މީޑިއާ ރެގިއުލޭޓް ކުރުމުގެ ނަމުގައި ތުޅާދޫ ދާއިރާގެ އަމިއްލަ މެމްބަރު އަބްދުލް ހަންނާނު ރައްޔިތުންގެ މަޖިލީހަށް ހުށަހެޅި "މީޑީއާ ކޮންޓްރޯލްކުރާ ބިލް" މަޖިލީހަށް ބަލައިގަތީ ދެވަނަ ދައުރު ނިންމައި، ޗުއްޓީގައި އޮއްވަ ދައުރުން ބޭރުން މިއަދު ބޭއްވި ޖަލްސާގައި ޕީއެންސީގެ 49 މެމްބަރުންގެ ވޯޓުންނެވެ. އެ ބިލު ބަލައިގަންނަން ނުފެންނަ ކަމަށް 12 މެމްބަރަކު ވޯޓު ދެއްވި އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ކުދުބެއްޔާ
28 August 2025
"އުލުބޭއްދުން" އަދި "ސޮލީބަށްއެރުވުން" މިއީ މެރުމުގެ މާނައިގައި ބޭނުންކުރެވޭ ބަސްތަކެއްހެއްޔެވެ؟ މިފަދަ ބަސްތަކުން މީހުން ބިރުގެންނެވުމަކީ ހުއްދަ ކަމެއްތޯއެވެ؟