ލަންކާގައި ފެންބޮޑުވި ސަރަަހައްދެއްގައި މީހަކު ސައިކަލެއް އަތުން ހިފައިގެން ދަނީ: އެ ގައުމުގައި އުޅޭ ދިވެހިން މޫސުމަށް ސަމާލުވެ، ރައްކާތެރި ކަމުގެ ފިޔަވަޅުތައް އެޅުމަށް އެ ގައުމުގައި ހުންނަ ރާއްޖޭގެ އެމްބަސީން މިރޭ ވަނީ އިލްތިމާސް ކޮށްފައި
28 ނޮވެމްބަރ 2025 - 22:21
ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން، އެ ގައުމުގައި ދިރިއުޅޭ ދިވެހިން ސަމާލުވެ، ރައްކާތެރި ކަމުގެ ފިޔަވަޅުތައް އެޅުމަށް އެ ގައުމުގައި ހުންނަ ރާއްޖޭގެ އެމްބަސީން މިރޭ އިލްތިމާސް ކޮށްފި އެވެ.
ރާއްޖޭގެ އެމްބަސީން ނެރުނު ބަޔާނެއްގައިވަނީ ތޫފާން "ދީތުވާ" ގެ ސަބަބުން ލަންކާއަށް ބޯކޮށް ވާރޭވެހި އަދި ފެންބޮޑުވުމާއި ބިންގަނޑު ކަނޑައިގެން ދިއުމުގެ ނުރައްކާތެރި ހާދިސާތައް ހިނގަމުންދާތީ އެ ގައުމަށް ރެޑް އެލާޓް ނެރެފައިވާ ކަމަށެވެ.
އެހެންވެ، ކޮންމެހެން ކުރަންޖެހޭ ދަތުރުތައް ނޫނީ ނުކުރުމަށާއި އަދި ފެންބޮޑުވެ، ނުރައްކާތެރި ހާދިސާތައް ހިނގާ ސަރަހައްދުތަކަށް ދިވެހިން ނުދިއުމަށާއި ބޯކޮށް ވާރޭވެހި އަދި ވައިގަދަވާ ވަގުތުތަކުގައި ގެއިން ބޭރަށް ނުނިކުތުމަށް ވެސް އިލްތިމާސްކުރާ ކަމަށް އެ ބަޔާނުގައިވެ އެވެ.
މީގެ އިތުރުން ޒަރޫރީ ބޭނުންތަކަށް ބޭނުންވާ ކާބޯތަކެއްޗާއި ފެނާއި ބޭސް ފަދަ ސާމާނުތައް ރައްކާތެރިކޮށް ބެހެއްޓުމާއި މޮބައިލް ފޯން ޗާޖްކޮށް، މުހިންމު ލިޔުންތައް ރައްކާތެރިކަމާއެކު ބަލަހައްޓަން ވެސް އެ ބަޔާނުގައިވަނީ އިލްތިމާސްކޮށްފަ އެވެ.
އެ ބަޔާނުގައިވަނީ ކޯރުތައް ފުރިގެން ބަންޑުންވާ ކަމުގެ އިންޒާރު ކަމާބެހޭ ފަރާތްތަކުން ދީފައިވާތީ، އެފަދަ ސަރަހައްދުތަކުގައި ދިރިއުޅޭ ދިވެހިންނާއި ބިން ތިރި ސަރަހައްދުތަކާއި މޫދާއި ކައިރި ސަރަހައްދުތަކުގައި އުޅޭ ދިވެހިން ރައްކާތެރި ސަރަހައްދުތަކަށް ބަދަލުވާން ވެސް އިލްތިމާސްކުރާ ކަމަށެވެ.
ގިނަ އަދަދެއްގެ ދިވެހިން ދިރިއުޅޭ ލަންކާގައި އެ ވިއްސާރައިގެ ސަބަބުން ދިވެއްސަކަށް ގެއްލުމެއް ނުވެ އެވެ.
ސްރީލަންކާއަށް ދަތުރުކުރާ އެހެން ގައުމުތަކުގެ މީހުންނަށް ވިއްސާރައިގެ ސަބަބުން ގެއްލުމެއް ލިބިއްޖެނަމަ އިމަޖެންސީގައި ގުޅުމަށް 1912 ހޮޓްލައިން މިހާރު ވަނީ ހަމަޖައްސައިފަ އެވެ. އަދި 24 ގަޑިއިރު އެ ހޮޓްލައިންގެ ހިދުމަތް ލިބޭނެ ކަމަށް އެ ގައުމުގެ ކަމާބެހޭ އިދާރާތަކުން ވަނީ ބުނެފަ އެވެ.
ތޫފާން ދިތުވާގެ ސަބަބުން ސްރީލަންކާގައި ހިނގި ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކުގައި މިހާތަނަށް 56 މީހަކު މަރުވެފައި ވާއިރު، މިހާތަނަށް 21 މީހަކު އެ ހާދިސާގައި ވަނީ ގެއްލިފަ އެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy