ސްރީލަންކަންގެ ބޯޓެއް އުދުހުމެއްގައި.--
29 ނޮވެމްބަރ 2025 - 22:13
ސްރީ ލަންކާ އަށް ބާުގަދަ ތޫފާނެއް އަރައި، އެ ގައުމުގެ ހާލަތު ވަރަށް ބޮޑަށް ގޯސްވެ، ވައިގެ ދަތުރުފަތުރަށް މި ދުވަސްވަރު ބުރޫއަރާފައި ވާތީ ސްރީ ލަންކަން އެއާލައިންސުން ލަންކާ އަށް ދަތުރުކުރާ ފަސިިންޖަރުން އެއާޕޯޓަށް ދިއުމުގެ ކުރިން ގުޅައި، މައުލޫމާތު ސާފުކުރަން އެ އެއާލައިނުން މިއަދު އެދިއްޖެ އެވެ.
ލަންކާ އަށް އެރި ބާރުގަދަ ތޫފާން "ދީތުވާ" ގައި އެ ގައުމަށް ލިބެމުންދާ ގެއްލުންތަކުގައި ފެން ބޮޑުވުމާއި ބިންގަނޑު ކަނޑައިގެން ދިއުން ފަދަ އެކި ހާދިސާތަކުގައި މަރުވި މީހުންގެ އަދަދު 132 އަށް އަރައި ހާލަތު އިތުރަށް ގޯސްވުމުން މިއަދު ވަނީ ކުއްލި ނުރައްކަލުގެ ހާލަތު ވެސް އިއުލާނުކޮށްފަ އެވެ.
ލަންކާގެ ބަންޑާރަނައިކެ އިންޓަނޭޝަނަލް އެއާޕޯޓުން މާލެ އަދި އައްޑޫ ގަމަށް އަންނަން މިއަދުގެ ހެނދުނަށް ތާވަލްކުރި ސްރީލަންކަން އެއާލައިންސް ފްލައިޓުތައް ވެސް ކެންސަލްވެ، ގިނަ ބަޔަކު އެއާޕޯޓުގައި ތާށިވެ އެތައް އިރެއް ވަންދެން ތިބެން ޖެހުނެވެ. ފްލައިޓުތައް ކެންސަލްވިކަން ފަސިންޖަރުންނަށް އެނގުނީ ވެސް އެއާޕޯޓަށް ދިޔަ ފަހުންނެވެ.
އެ އެއާލައިނުން މިރޭ ކުރި އިއުލާނެއްގައި ބުނީ، ވިއްސާރައިގެ ސަބަބުން ފްލައިޓުތައް ޑިލޭވެ އަދި ކެންސަލްވަމުން ދާތީ މާދަމާ އާއި އަންނަ އަންގާރަ ދުވަހުގެ ނިޔަލަށް އެ އެއާލައިނުން ދަތުރު ކުރަން ހަމަޖެހިފައިވާ ފަސިންޖަރުން ފުރަން އެއާޕޯޓަށް ދިއުމުގެ ކުރިން އަންގަން އެދޭ ކަމަށެވެ.
ސްރީލަންކަން އެއާލައިނުން ފުރާ މީހުން ވައިބާ ނުވަތަ ވަޓްސްއަޕް މެދުވެރިކޮށް 7926778 އަށް ގުޅުމަށް އެ އެއާލައިނުގެ ނޯޓިސްގައި އެދިފައި ވެ އެވެ.
ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނީ މޫސުން ގޯސްވުމުގެ ސަބަބުން މިހާތަނަށް 15،000 އަށް ވުރެ ގިނަ ގެދޮރު ހަލާކުވެ، 78،000 އަށް ވުރެ ގިނަ މީހުން ވަގުތީ ހިޔާތަކަށް ދާން މަޖުބޫރު ވެފައިވާ ކަމަށެވެ.
މީހުން ސަލާމަތް ކުރުމުގެ މަސައްކަތް ހުއްޓުމެއް ނެތި ކުރަމުންދާއިރު، ލަންކާގައި މިހާރު ވަނީ ކުއްލި ނުރައްކަލުގެ ހާލަތު އިއުލާންކޮށްފަ އެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy
ކޮމެންޓްތައް
ޙުސަ
30 November 2025
ޢެއަރ ލަންކާއިން މާލެއަށް އައި އެތައް ބައެއްގެ ލަގެޖް އެމީހުންނާއެކު މާލެ ނުފޮނުވާ ލަންކާ އެއަރޕޯޓްގައި އެބަހުރި! ޚޮޗިން އިން 28 ވަނަ ދުވަހު ލަންކާ މަގުން މާލެ އައި މީހުންނާއި އެހެނިހެން ގައުމުތަކުން ލަންކާ މަގުން މާލެ އައި އެތައް ބައެއްގެ އަގުބޮޑު އެތައް ލަގެޖްތައް މީހުންނާއެކު މާލެ ނައިސް އެކަންބޮޑުވުންތައް އިންތިހާއަށް އެބައޮތް! ވަކިން މިކަމަށް ލަގެޖް ގެންނަން ފްލައިޓެއް ބާއްވަން ނުވޭތޯ އެއަރލަންކާއިން!!