ހުޅުމާލެ 2 ގައި ގާއިމްކުރާ ދެ ވަނަ ޖީޕީ ކްލިނިކްގެ ހިދުމަތް އަންނަ މާޗު މަހު ފަށާނެ ކަމަށް ހުޅުމާލެ ހޮސްޕިޓަލުން މިއަދު ބުނެފި އެވެ.
އެ ހޮސްޕިޓަލްގެ މީޑިއާ އޮފިޝަލަކު ވިދާޅުވީ، ހުޅުމާލެ 2 ގައި އަލަށް އާބާދުވާ މީހުން ފަރުވާ ހޯދާ އަދަދު ވެސް އެތައް ގުނައަކުން އިތުރުވަމުންދާ ކަމަށެވެ. އެހެންވެ، ހިދުމަތްތައް ވެސް ހަރުދަނާކުރަން އިތުރު މަސައްކަތްތައް ކުރާކަން އޭނާ ފާހަގަކުރެއްވި އެވެ.
އޭގެ ތެރެއިން، ދެ ވަނަ ޖީޕީ ކްލިނިކް ހަދަން ނިންމާފައިވަނީ، އަލަށް މީހުން ދިރިއުޅެން ފަށާފައިވާ އަމާން އުދަރެސް 6ގެ އެއް ވަނަ ފަންގިފިލާގަ އެވެ. މިދިޔަ މަހު އެ ތަން ވަނީ، މާލެ ސިޓީ ގްރޫޕް އޮފް ހޮސްޕިޓަލާ ހަވާލުކޮށްފަ އެވެ.
ހުޅުމާލެ ހޮސްޕިޓަލުން ބުނީ ކްލިނިކް ސެޓަޕް ބަދަލު ކުރަމުން އަންނަ ކަމަށެވެ. އަދި އަންނަ މާޗު މަހުގެ ތެރޭގައި ހިދުމަތްތައް ފެށުމަށް މަސައްކަތްކުރަމުން އަންނަ ކަމަށް އޮފިޝަލް ވިދާޅުވި އެވެ.
އެ ކްލިނިކްގައި އާއްމު ބަލިތަކުގެ ޑޮކްޓަރަށް ދެއްކުމާއި ސާމްޕަލް ނެގުމާއި އެކްސްރޭ ނެގުމުގެ ހިދުމަތް ދޭނެ އެވެ. އޭގެ އިތުރުން ސްޕެޝަލިސްޓަކު ޑޮކްޓަރަކަށް ދައްކަން ބޭނުންވާ ނަމަ އެ ކްލިނިކުން ރިފަރަލް ހަދައިދޭނެ އެވެ.
"ހުޅުމާލެ 2 ގައި އުޅޭ މީހުންނަށް ވަރަށް ފަސޭހަވާނެ ހިދުމަތަކަށް ވާނެ،" އިމާރާތް ހަވާލުކުރަން މިދިޔަ މަހު ބޭއްވި ކުޑަ ހަފުލާގައި މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ހަލީމް ވިދާޅުވި އެވެ.
ހިޔާ ފްލެޓުގައި މިހާރު ވެސް ޖީޕީ ކްލިނިކެއް ހިންގަ އެވެ. އަދި ހޮސްޕިޓަލުތަކަށް އޮންނަ ކިއު ކުޑަކުރަން މާލޭގައި ވެސް މި ފަހުން ވަނީ އޭގެ ކްލިނިކެއް ހުޅުވައިފަ އެވެ.