ސަރުކާރަށް އެއްބާރުލުން ދޭ ބަޔަކު ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ކައުންސިލްތަކަށް ނުހޮވައިފި ނަމަ އޭގެ ގެއްލުން ރައްޔިތުންނަށް ކުރާނެ ކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން، ފަސްޓް ލޭޑީ ސާޖިދާ މުހައްމަދު މިރޭ ވިދާޅުވެއްޖެ އެވެ.
ސަރުކާރު ހިންގާ ޕާޓީ، ޕީއެންސީގެ މާފަންނު ދެކުނު ދާއިރާގެ ކެމްޕެއިން ޖަގަހަ ހުޅުވުމަށް ބޭއްވި ޖަލްސާގައި ފަސްޓް ލޭޑީ ވިދާޅުވީ، ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތީ ވަކި ސިޔާސަތުތަކަކާ އެކު، ރައްޔިތުންނަށް ހިދުމަތް ކުރެއްވުމަށް ކަމަށެވެ.
އަރާމު ކުރެއްވުމެއް ނެތި ރެއާއި ދުވާލު މިއަދު ވެސް އެ މަނިކުފާނު މަސައްކަތްޕުޅު ކުރައްވަނީ ރައްޔިތުންނަށްޓަކައި އެތައް މަސައްކަތެއް ކޮށްދެއްވުމަށް ކަމަށް ފަސްޓް ލޭޑީ ސާޖިދާ ވިދާޅުވި އެވެ.
"ރައްޔިތުންނަށްޓަކައި އެތައް މަސައްކަތެއް ކޮށްދެއްވަވާ ވެރިއަކާ އެކު، މަސައްކަތް ކުރާނެ ކައުންސިލަރުންތަކެއް، ޑަބްލިޔުޑީސީއެއް، މޭޔަރެއް ހުރުމަކީ ކޮންމެހެން ވެސް ކުރަން ޖެހޭނެ ކަމެއް. އެހެން ނޫން ނަމަ ކިހިނެތްތޯ ވާނީ؟" ފަސްޓް ލޭޑީ ވިދާޅުވި އެވެ.
ސަރުކާރާ ދެކޮޅަށް މަސައްކަތް ކުރެއްވުމުގެ ވިސްނުމުގައި އެފަދަ މަގާމުތަކަށް ވަޑައިގަންނަވާ ބޭފުޅުން ނަމަ، އެ އިން އެއްވެސް ފައިދާއެއް ނުކުރާނެކަން ފާހަގަ ކުރައްވަމުން ފަސްޓް ލޭޑީ ވިދާޅުވީ ސަރުކާރަށް އެއްބާރުލުން ދޭ ބަޔަކު ކައުންސިލްތަކަށް ނުހޮވައިފި ނަމަ އޭގެ ގެއްލުން ރައްޔިތުންނަށް ކުރާނެ ކަމަށެވެ.
ވޭޕާއި ދިނީ ކަންކަމާއި އިޖުތިމާއީ އެތައް ކަމެއްގައި ވަރަށް އުނދަގޫ ނިންމުންތަކެއް ސަރުކާރުން ނިންމުން ގެންދާ ދަނޑިވަޅެއްގައި ސަރުކާރާ ދެކޮޅު ބަޔަކު އެފަދަ މަގާމުތަކަށް ހޮވައިފި ނަމަ އެ ނިންމުންތަކުގެ އެއްވެސް ފައިދާއެއް ގައުމަށް ނުކުރާނެ ކަމަށް ވެސް ފަސްޓް ލޭޑީ ވިދާޅުވި އެވެ.
"ހުރިހާ ކަންކަމެއް ސީދާ ސަރުކާރަށް ގެނެސްދެވޭނެ ބަޔަކު ތިބުމަކީ ރައްޔިތުންނަށް އޭގެ ލާބަ އާއި މަންފާ ކުރާނެ ކަމެއް،" ފަސްޓް ލޭޑީ ވިދާޅުވި އެވެ.
އެހެންކަމުން އަންނަ އޭޕްރީލް ހަތަރު ވަނަ ދުވަހު ބާއްވާ ލޯކަލް ކައުންސިލްތަކުގެ އިންތިހާބުގައި ޕީއެންސީގެ ކައުންސިލް މެމްބަރުންނާއި ޑަބްލިއުޑީސީ އަދި މޭޔަރު ހޮވައިދިނުމަށް ފަސްޓް ލޭޑީ އެދިވަޑައިގަތެވެ.
ފަސްޓް ލޭޑީ ވިދާޅުވި ގޮތުގައި ކައުންސިލަރުންނަކީ ސަރުކާރުގެ ސިޔާސަތުތައް ތަންފީޒު ކުރުމަށް ސަރުކާރާ އެކު އެންމެ ގާތުން މަސައްކަތް ކުރާނެ މީހުންނެވެ. އެހެންވެ، ރައްޔިތުންގެ ކަންބޮޑުވުންތައް ސަރުކާރާ ހަމައަށް ގެންގޮސްދެވޭނެ ކައުންސިލަރުންތަކެއް ތިއްބެވުމަކީ ރައްޔިތުންނަށް އޭގެ ލާބަ އާއި މަންފާ ކުރާނެ ކަމެއް ކަމަށް ފަސްޓް ލޭޑީ ވިދާޅުވި އެވެ.