ސޯޝަލް މީޑިއާގައި ފުލުހުންނަށް އިންޒާރު ދިން ކަމަށް ބުނާ މައްސަލާގައި އިދިކޮޅު އެމްޑީޕީގެ ގައުމީ މަޖިލީހުގެ މެމްބަރު ފާތުމަތު ޒަހިއްޔާ (ޒާޔާ)ގެ ބަޔާން ނަގަން މާދަމާ ފުލުހަށް ހާޒިރުވާން މިއަދު އަންގައިފި އެވެ.
ފުލުހުން ޒާޔާއަށް ފޮނުވި ޗިޓުގައި ބުނީ އޭނާއަށް އެ އިދާރާއަށް ހާޒިރުކުރަނީ "ޒާޔާ ފާތިމަތު"ގެ ނަމުގައި ފޭސްބުކްގައި ހިންގާ އެކައުންޓަކުން މިދިޔަ އަހަރުގެ އޮކްޓޯބަރު މަހުގެ ހަތަރު ވަނަ ދުވަހުގެ ރޭ ފުލުހުންނަށް އިންޒާރު ދީފައިވާ ކަމަށް ތުހުމަތު ކުރެވޭ މައްސަލާގައި ސުވާލުކޮށް، ބަޔާން ނެގުމަށް ކަމަށެވެ.
މާދަމާ މެންދުރުފަހު 2:00 އަށް ސާޖަންޓް އާދަމް ހަލީމް ކްރިމިނިލް އިންވެސްޓިގޭޝަން ބިލްޑިން އަށް ހާޒިރުވާން އެ ޗިޓުގައި ޒާޔާއަށް ވަނީ އަންގައިފަ އެވެ.
ޒާޔާ ފުލުހަށް ހާޒިރު ކުރާއިރު، އޭނާ އަންނަނީ ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި މާލޭ ސިޓީ ކައުންސިލްގެ ހުޅުމާލެ އުތުރު ދާއިރާގެ ކައުންސިލަރު ކަމަށް އެމްޑީޕީގެ ޓިކެޓުގައި ވާދަކުރުމަށް ކެމްޕެއިން ކުރަމުންނެވެ.
ސޯޝަލް މީޑިއާގައި ފުލުހުންނަށް އިންޒާރު ދިން ކަމަށް ތުހުމަތު ކުރެވޭ މައްސަލާގައި ފުލުހުން ޒާޔާގެ ފޯނު ވެސް ކުރިން ހިފެހެއްޓި އެވެ. އަދި އެ މައްސަލާގައި ކުރިން ވެސް އޭނާ ފުލުހަށް ހާޒިރުކޮށް ސުވާލުކޮށްފައިވެ އެވެ.
ޒާޔާގެ ފޯނު ހިފެހެއްޓީ ފުލުހުން ޓެގްކޮށް، އޭނާ ފޭސްބުކްގައި ކުރި ޕޯސްޓެއްގައި "އަންނަ މަހުގެ 17 އަށް ތައްޔާރުވުމަށް ކަނޑޫދޫ މިރުހުން ސްޕްރޭ ތައްޔާރުކުރަން ފަށައިފިން. ހަމަ ޖެހީ ޖެހީ،" ލިޔެ ފުލުހުންނަށް އިންޒާރު ދިން މައްސަލައިގަ އެވެ. އެއީ މިދިޔަ އަހަރުގެ އޮކްޓޯބަރު މަހުގެ 17 ވަނަ ދުވަހު އެމްޑީޕީން މާލޭގައި ބޭއްވި ބޮޑު މުޒާހަރާއަށް ތައްޔާރުވަމުން ދިޔަ ދުވަސްވަރު އެވެ.
ފުލުހުން ޒާޔާގެ ފޯނު ދޫކޮށްލީ ތަހުގީގުގެ ބޭނުމަށް ފޯނު ހިފެހެއްޓުމަށްފަހު ހަފުތާއެއް ފަހުންނެވެ.
