މިދިޔަ އެޕްރީލް މަހު ގްރޭޑް 10 ގައި ކިޔަވަން ފެށި ދަރިވަރުންގެ އޯ ލެވެލް އިމްތިހާން މިއަދު ފަށައިފި އެވެ.
އެޑިޔުކޭޝަން މިނިސްޓްރީން ބުނީ 267 ސެންޓަރެއްގައި 8،218 ދަރިވަރުން އައިޖީސީއެސްއީ އަދި އެސްއެސްސީ އިމްތިހާނު ހަދާނެ ކަމަށެވެ. އެއީ މާލެ ސަރަހައްދުގެ 21 ސެންޓަރަކާއި އަތޮޅުތަކުގެ 246 ސެންޓަރެއްގަ އެވެ.
މިއަދުން ފެށިގެން އަންނަ މާޗް 6ގެ ނިޔަލަށް ކުރިއަށް ގެންދާ އިމްތިހާނުގައި މިއަދު އޮތީ ދިވެހި މާއްދާ އެވެ.
އެއީ މި އަހަރު އޯލެވެލް ހަދާ ފުރަތަމަ ބެޗްގެ ދަރިވަރުންނެވެ. މި ދިރާސީ އަހަރު ގްރޭޑް 10ގައި އުޅޭ ދަރިވަރުން އަންނަ އޮކްޓޫބަރު ނޮވެމްބަރުގައި އޯ ލެވެލް ހަދާނެ އެވެ.
ސަރުކާރުން މިދިޔަ އަހަރު ވަނީ އޯ ލެވެލް އިމްތިހާނުގައި ބައިވެރިވާ ކުދިން މަޖުބޫރު ހަތަރު މާއްދާ ހަދަން ޖެހޭ ގޮތަށް ބަދަލުކޮށް، އެ މާއްދާތަކަށް ސަރުކާރުން ފައިސާ ދައްކާ ގޮތަށް ވެސް ނިންމައިފަ އެވެ.
އެއީ ދިވެއްސާއި އިސްލާމާއި އިނގިރޭސި އަދި ހިސާބު މާއްދާ އެވެ.
އޯ ލެވެލް އާއި އޭ ލެވެލް އިމްތިހާނުގައި ދިވެހި ކުދިން އަންނަނީ ރަނގަޅު ނަތީޖާތަކެއް ހޯދަމުންނެވެ. އިމްތިހާނުގެ ގަދަ 10 ގައި ހިމެނޭ ކުދިންގެ އަދަދު އިތުރު ވަމުން އަންނައިރު ދުނިޔޭގެ ފެންވަރުގެ ވަނަތައް ވެސް ހޯދަ އެވެ.