މީހެއްގެ ސޯޝަލް މީޑިއާ އެކައުންޓުތައް ހެކްކޮށް، ވިޔަފާރި ކުންފުންޏެއްގެ ބެންކު އެކައުންޓަށް އެކްސެސް ހޯދުމަށް ފަހު ގިނަ އަދަދެއްގެ ފައިސާ ނެގި މައްސަލައެއްގައި މިދިޔަ ހޯމަދުވަހު ހައްޔަރު ކުރި 10 މީހުންގެ ތެރޭގައި ހިމެނޭ މީހަކު އެ ފައިސާގެ ތެރެއިން 25،000 އަށް ވުރެ ގިނަ ރުފިޔާ އޭޓީއެމުން ނަގައިދިން ކަމަށް ކޯޓުގައި އެއްބަސްވެއްޖެ އެވެ.
ހައްޔަރުކުރި 10 މީހުންގެ ތެރެއިން ގއ. ކަނޑުހުޅުދޫ ފޫހިވާގޭ މުހައްމަދު އަލީ، 42، ގެ ބަންދަށް 30 ދުވަސް އިތުރުކޮށް އިއްޔެ ކްރިމިނަލް ކޯޓުން ނެރުނު އަމުރުގައިވާ ގޮތުން ސްކޭމްކޮށްގެން ކުންފުނީގެ އެކައުންޓަށް ވަދެ އެކި މީސްމީހުންނަށް ފޮނުވި 279،600 އަށް ވުރެ ގިނަ ރުފިޔާގެ ތެރެއިން 25،242.80ރ. މުހައްމަދު އަލީގެ އެކައުންޓަށް ވަދެފައިވެ އެވެ.
އޭނާގެ އެކައުންޓަށް މި ފައިސާ ޖަމާވި ކަމަށާއި އަދި އެ ފައިސާ ނަގައި އެހެން މީހަކަށް ހަވާލުކުރި ކަމަށް ކޯޓުގައި ވަނީ އެއްބަސްވެފަ އެވެ.
ފުލުހުން މިދިޔަ ހޯމަ ދުވަހު ބުނެފައިވާ ގޮތުގައި މި މައްސަލައިގައި މީހުން ހައްޔަރުކުރީ މި މަހުގެ 21 ވަނަ ދުވަހުން ފެށިގެން ހިންގި އޮޕަރޭޝަނެއްގަ އެވެ. ފައިސާ ނެގީ މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބޭންކު އެކައުންޓަށް ވަދެގެން ކަމަށް ފުލުހުން ބުނެފައިވެ އެވެ.
މީގެ ތެރެއިން އެކަކު ހައްޔަރުކުރީ ހިންމަފުށިންނެވެ. އައްޑޫން ތިން މީހަކު އަދި ބާކީ ތިބި ހަ މީހުން ހައްޔަރުކުރީ މާލެއިންނެވެ. މީގެ ތެރޭގައި ކުށުގެ ރެކޯޑް ހުރި މީހުން ހިމެނެ އެވެ.
ފުލުހުން ބުނީ ހައްޔަރުކުރި މީހުންގެ ތެރެއިން ހަ މީހުންނަކީ ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް ފައިސާ ނަގާފައިވާ މީހުން ކަމަށެވެ. އަދި އެ ތަނުން އެކަކު، ސްކޭމްކޮށްގެން ހޯދާފައިވާ ފައިސާ އެކި ވިޔަފާރިތަކަށް ޖަމާކޮށް އެ ފައިސާއަށް މުދާ ގަނެފައިވާއިރު، އަނެއް ތިން މީހުންނަކީ އެކި މީހުން އޭޓީއެމަށް ގެންގޮސްގެން އެ މީހުން މެދުވެރިކޮށް އޭޓީއެމުން ފައިސާ ނެގުމަށް ފަހު އެ ފައިސާތަކާ ހަވާލުވި މީހުންނެވެ.