މި ވެރިކަމުގެ ދައުރު ހަމަވާއިރު ވާނީ އެންމެ ގިނަ އަދި ބޮޑެތި ކާމިޔާބުތައް މިހާތަނަށް ރާއްޖެ އަށް ލިބޭނެ ފަސް އަހަރަށް ކަމަށާއި ރައީސް ޑރ. މުހައްމަދު މުއިއްޒުގެ އަމާޒު ހުރީ އެ ދިމާލަށް ކަމަށް ސަރުކާރު ހިންގާ ޕާޓީ ޕީއެންސީގެ ޕާލަމެންޓްރީ ގުރޫޕުގެ ލީޑަރު އިބްރާހިމް ފަލާހު ރޭ ވިދާޅުވެއްޖެ އެވެ.
ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ޕީއެންސީގެ ކެމްޕެެއިން މެނޭޖަރުގެ ޒިންމާއާ ވެސް ހަވާލުވެ ހުންނެވި ފަލާހު އެހެން ވިދާޅުވީ، އެ އިންތިހާބަށް ފުވައްމުލަކުން ނުކުންނަ ކެންޑިޑޭޓުން ކެމްޕެއިން އިފުތިތާހު ކުރުމަށް އެ ސިޓީގައި ބޭއްވި ޖަލްސާގަ އެވެ.
ފަލާހު ވިދާޅުވި ގޮތުގައި، މި ފަސް އަހަރަކީ ރާއްޖެ އަށް ކާމިޔާބު ފަސް އަހަރަށް ވާނެ ކަމުގެ ޔަގީންކަން އެބައޮތެވެ.
"މި ސިޓީތަކުގައި ވެސް މައިންބަފައިން އެންމެ ބޮޑަށް ކަންބޮޑުވެފައި ތިބި އެއް ކަންތައް ކުދިކުދި ދަރިން ސްކޫލަށް ދާއިރުގައި ދަބަހަށް ވޭޕްލައިގެން އެ އަށް މަސްތުވާއެއްޗެހި އަޅައިގެން ދިއުން. އެ ހުރިހާ ކަމެއް ހުއްޓިއްޖެ. ގޭންގުތަކާއި މި ހުރިހާ ކަމެއް މާލޭގައި އެއްގޮތަކަށް ވެސް ނެތޭ ބުނަން [މިހާރު] އަޅުގަނޑުމެންނަށް ކެރިދާނެ،" ފަލާހު ވިދާޅުވި އެވެ.
"ވަޒީފާގެ ފުރުސަތުތައް ވަރަށް ގިނަ އަދަދަށް ހުޅުވާލައިފި. ވަރަށް ގިނަ މަޝްރޫއުތައް، ގައުމަށް ފައިދާ ހުރި ކަންކަން ރައްޔިތުންގެ މަޖިލިހުގެ ތެރެއިން ގާނޫނުތަކަށް ބަދަލު ގެނެސް، ގެންނަންޖެހޭ މުހިންމު އިސްލާހުތައް އެ ދަނީ ގެންނަމުން."
އެ ސަބަބުތަކާ ހެދި ވެސް ރައީސް މުއިއްޒުގެ މި ފަސް އަހަރު ވާނީ ރާއްޖޭގެ ތާރީހުގައި ވެސް ވެރިއެއްގެ ޒައާމަތުގައި އެންމެ ބޮޑެތި ފައިދާތަކާއި ކާމިޔާބުތައް ލިބޭނެ ދުވަސްވަރަށް ކަމަށް ފަލާހު ވިދާޅުވި އެވެ.
އޭނާ ވިދާޅުވީ، މި ސަރުކާރުން ކަންކަން ކުރަނީ ނުވަތަ މަޝްރޫއުތައް ހިންގަނީ ދުރާލާ ރާވައިގެން، ތަރުތީބުކޮށްގެން އަދި ފައިސާ ހޯދާނެ ގޮތްތައް ވެސް ހަމަޖައްސައިގެން ކަމަށެވެ.
އަންނަ އޭޕްރީލް ހަތަރުވަނަ ދުވަހު ބާއްވާ ލޯކަލް ކައުންސިލްތަކުގެ އިންތިހާބާ ގުޅޭ ގޮތުން ފަލާހު ވިދާޅުވީ، އެ އިންތިހާބުގައި އެންމެ ގިނަ ކެންޑިޑޭޓުން ވާދަކުރަނީ ޕީއެންސީން ކަމަށް ވާއިރު އެންމެ ގާބިލް ކެންޑިޑޭޓުން ނެރުނީ ވެސް އެ ޕާޓީން ކަމަށެވެ.
އަދި ޕީއެންސީއަކީ 75،000 މެމްބަރުންނާ އެކު، މިހާރު އެންމެ ގިނަ މެމްބަރުން ތިބި ސިޔާސީ ޕާޓީކަން ވެސް ފާހަގަކުރެއްވި އެވެ.
އިދިކޮޅު އެމްޑީޕީ އަށް އަމާޒު ކުރައްވައި ފަލާހު ރޭ ވިދާޅުވީ، އެ ޕާޓީގެ އެންމެ ފަހުގެ ވެރިކަމުގައި އެކި ރަށްރަށުގައި ހިންގި ޕްރޮޖެކްޓުތައް ހިންގާފައި ވަނީ ވަރަށް ބޮޑަށް ފަރުވާކުޑަކޮށް ކަމަށެވެ. އެހެން އެކަން ދިމާވީ އޭނާ ވިދާޅުވި ގޮތުގައި އެ ރަށްރަށުގައި ތިއްބެވި އެމްޑީޕީގެ ކައުންސިލަރުންގެ ސަބަބުންނެވެ.
"އަޅުގަނޑު ދަންނަވާލަން ބޭނުން ރ. އަތޮޅުގެ ވަރަށް ގިނަ ރަށްރަށުގައި ގާއިމް ކުރެވިފައި ހުރި ފެނާއި ނަރުދަމާގެ ނިޒާމުތައް ހުރީ އޭގެ ހިދުމަތް ރައްޔިތުންނަށް ދިނުމުގެ ކުރިން ހޮޅިތަކާއި ނަރުތަކާއި ހުރިހާ އެއްޗެއް ފީވެ އަޅިއަށް ވެފައި،" ރ. އިނގުރައިދޫ ދާއިރާގެ މެމްބަރުކަން ވެސް ކުރައްވާ ފަލާހު ވިދާޅުވި އެވެ.
"މިއިން އެނގެނީ ޒިންމާދާރު ނޫން، ސަރުކާރާ ގުޅުން ނެތް ނުވަތަ ރައްޔިތުން ދެކެ ލޯބި ނުވާ ރައްޔިތުންގެ މާލިއްޔަތަށް އެއްވެސް ބެލުމެއް ނެތް، ކުރާނެ ގޮތަކަށް ކުރާނެ ކައުންސިލަރުން ހޮވުނީމާ ވާ ގޮތް."
ފަލާހު ވިދާޅުވީ، މި ސަރުކާރާ ރައީސް މުއިއްޒު ހަވާލުވެވަޑައިގެންނެވިއިރު އެއްވެސް މަޝްރޫއުއެއްގެ އެންމެ ޕަސެންޓެއްގެ މަސައްކަތް ހިންގޭ ވަރަށް ވެސް ދައުލަތުގެ ބަޖެޓުގައި ފައިސާ ހިމަނާފައި ނެތް ކަމަށެވެ. އޭގެ ބަދަލުގައި ހުރީ ހަމައެކަނި ބިންގާތަކެއް ނުވަތަ ބިމުގެ އަޑީގައި ވަޅުލާފައިވާ ގާތަކެއް ކަމަށް އޭނާ ވިދާޅުވި އެވެ.
"ތިޔަބޭފުޅުން ބޭނުންވާ ގިނަ މަޝްރޫއުތައް އެހެރީ ފެށިފައި. އަޅުަގަނޑުމެންގެ ރައީސުލްޖުމްހޫރިއްޔާ މި ސަރުކާރުން ކުރިއަށް އޮތް ދުވަސްތަކުގައި ބާރު ސްޕީޑުގައި އެ މަޝްރޫއުތައް އިރާދަފުޅު ކުރެއްވިއްޔާ ކުރިއަށް ގެންދާނެ"
އެކަމަކު، މި ސަރުކާރުގެ ތަފާތަކީ ފަލާހު ވިދާޅުވި ގޮތުގައި މަޝްރޫއުތައް ފަށައިގެން ނިންމޭނެ ގޮތުގެ ޕްލޭނެއް އޮތުމެވެ.
"އެއީ ޒިންމާދާރު ސަރުކާރުތަކަކީ،" އޭނާ ވިދާުވި އެވެ.
ފަލާހު ވިދާޅުވީ، މި ފަހަރުގެ ލޯކަލް ކައުންސިލްތަކުގައި ޕީއެންސީން ވާދަކުރާ ކެންޑިޑޭޓުން އިންތިހާބު ކޮށްދިނުމަށް ރައީސް މުއިއްޒު އެދިވަޑައިގަންނަވަނީ "ތިޔަ ރައްޔިތުންނަށްޓަކައި" ކަމަށެވެ. އޭގެ ބޭނުމަކީ ރައީސް ވެވަޑައިގެންފައިވާ ވައުދުތައް އެންމެ ފުރިހަމަ އަށް އަދި ބާރު ސްޕީޑުގައި ކުރިއަށް ގެންދަން ކަމަށް ފަލާހު ވިދާޅުވި އެވެ.
"އަޅުގަނޑުމެން މިއަދު ފުވައްމުލަކު ސިޓީގެ ވަރަށް ގިނަ ރައްޔިތުންނާ ބައްދަލުކޮށް، ވަރަށް ގިނަ ގޭގެ އަށް ޒިޔާރަތްކޮށް، އަޅުގަނޑުމެންގެ ކަމާ ގުޅުން ހުރި ފަރާތްތަކާ ބައްދަލުކުރިން. ތިޔަބޭފުޅުން ބޭނުންވާ ގިނަ މަޝްރޫއުތައް އެހެރީ ފެށިފައި. އަޅުަގަނޑުމެންގެ ރައީސުލްޖުމްހޫރިއްޔާ މި ސަރުކާރުން ކުރިއަށް އޮތް ދުވަސްތަކުގައި ބާރު ސްޕީޑުގައި އެ މަޝްރޫއުތައް އިރާދަފުޅު ކުރެއްވިއްޔާ ކުރިއަށް ގެންދާނެ،" އޭނާ ވިދާޅުވި އެވެ.