ލޯކަލް ކައުންސިލްތަކާއި އަންހެނުންގެ ކޮމެޓީތަކުގެ އިންތިހާބުގައި ވާދަކުރަން 3،400 އަށް ވުރެ ގިނަ ފޯމު އިލެކްޝަންސް ކޮމިޝަން (އީސީ) އަށް ހުށަހަޅައިފި އެވެ.
އެ ކޮމިޝަނުން މިއަދު ބުނީ އަންނަ އެޕްރީލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލްތަކުގެ އިންތިހާބުގައި ވާދަކުރަން 1،865 ފޯމު އިއްޔެގެ ނިޔަލަށް ހުށަހަޅާފައިވާ ކަމަށެވެ. އޭގެ ތެރެއިން ކެންޑިޑެސީ ގަބޫލުކުރީ 1،556 މީހެއްގެ ކަމަށާއި 309 މީހެއްގެ ކެންޑިޑެސީ ގަބޫލު ނުކުރާ ކަމަށް އެ ކޮމިޝަނުން ބުންޏެވެ.
ކެންޑިޑެސީ ގަބޫލުނުކުރި މީހުންގެ ތެރެއިން 286 މީހަކު، ލޯކަލް ކައުންސިލްތަކުގެ އިންތިހާބުގައި ވާދަކުރަން އަލުން ފޯމު ހުށަހަޅާފައިވާ ކަމަށް އީސީން ބުންޏެވެ.
އަންހެނުންގެ ކޮމިޓީތަކުގެ އިންތިހާބުގައި ވާދަކުރަން ހުށަހެޅި ފޯމުތަކުގެ ތެރެއިން 1،548 މީހެއްގެ ކެންޑިޑެސީ ގަބޫލުކޮށްފައިވާއިރު، 216 މީހެއްގެ ކެންޑިޑެސީ ގަބޫލުނުކުރަން އީސީން ނިންމާފައިވެ އެވެ. އަދި ކެންޑިޑެސީ ގަބޫލުނުކުރި މީހުންގެ ތެރެއިން 192 މީހަކު ވަނީ އަލުން ފޯމު ހުށަހަޅައިފަ އެވެ.
އީސީން ބުނި ގޮތުގައި އާންމުކޮށް ކެންޑިޑެސީ ގަބޫލުނުކުރި ސަބަބުތަަކަކީ؛
- ކުށާއި ދަރަނީގެ ރެކޯޑް އުމުރަށް ހުށަހަޅާފައި ނުވުން
- ކުށެއް ނުވަތަ ދަރަންޏެއް އޮތް ނަމަ، އެކަމުގެ ތަފްސީލު ހުށަހަޅާފައި ނުވުން
- ކަރެޝަނަލް ސާވިސް އިން ފުރިހަމަކޮށް ހުށަހަޅަން ޖެހޭ ކުށުގެ ރެކޯޑް ހުށަހަޅާފައި ނުވުން
ލޯކަލް ކައުންސިލްތަކާއި އަންހެނުންގެ ކޮމެޓީތަކުގެ އިންތިހާބުގައި ވާދަކުރަން ފޯމު ހުށަހަޅަން ހުޅުވާލީ މި މަހުގެ 17 ވަނަ ދުވަހު އެވެ. އަދި ފޯމު ހުށަހެޅުމުގެ މުއްދަތު މާދަމާ ހަވީރު 5:30 އަށް ހަމަވާނެ އެވެ.
އިލެކްޝަން ކޮމިޝަނުން އިންތިހާބަށް ކުރިމަތިލާން ދީފައިވަނީ ވަރަށް ކުރު މުއްދަތެއް ކަމަށް ވާތީ ބޮޑެތި ދަތިތަކާ ކުރިމަތިވަމުންދާ ކަމަށް ބުނެ، އިދިކޮޅު އެމްޑީޕީން މިދިޔަ ހަފުތާގައި ވަނީ ކަންބޮޑުވުން ފާޅުކޮށްފަ އެވެ. އަދި ދައުލަތުގެ އިދާރާތަކުން ރެކޯޑް ސާފުކުރުމާއި އެހެނިހެން ކަންކަން ފުރިހަމަ ކުރުމަށް އެތައް ދުވަހެއް ހޭދަވާތީ އެއީ ފޯމު ހުށަހެޅުމަށް އެކަށީގެންވާ މުއްދަތެއް ނޫން ކަމަށް ވެސް އެ ޕާޓީން ބުނެފައިވެ އެވެ.