މެދުއިރުމަތީގައި ހިނގަމުންދާ ހަނގުރާމައާ ގުޅިގެން، ދުނިޔޭގައި މުދާ އުފުލާ ވިއުގަތަކަށް އަރާފައިވާ ލޮޅުންތަކުގެ އަސަރު ކުޑަކުރުމަށް މަސައްކަތް ކުރަމުންދާ ކަމަށާއި އަދި ރާއްޖެއަށް ބޭނުންވާ ކާބޯތަކެއްޗާއި ތެލާއި ގޭސް މެދުކެނޑުމެއް ނެތި ލިބޭނެކަމުގެ ޔަގީންކަން އިކޮނޮމިކް މިނިސްޓަރު މުހައްމަދު ސައީދު މިއަދު ދެއްވައިފި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ސައީދު ވިދާޅުވީ ރާއްޖެއަށް ބޭނުންވާ އަސާސީ މުދާ، އެއްވެސް މެދުކެނޑުމެއް ނެތި ލިބޭނެ އިންތިޒާމް ސަރުކާރުން ހަމަޖައްސާނެ ކަމަށެވެ. އަދި ހަނގުރާމައިގެ ސަބަބުން ތެލާއި ގޭސް އުފެއްދުމަށް ހުރަސްތަކެއް ކުރިމަތިވެފައިވާއިރު، އެހެން މާކެޓުތަކުން ތެލާއި ގޭސް އަދި ކާބޯތަކެތި ގެނެވޭނެ އެހެން މަގުތައް ބަލަމުން އަންނަ ކަމަށް އޭނާ ވިދާޅުވި އެވެ.
"ކުރުކޮށް ދަންނަވަންޏާ، ތެލާއި ގޭހަކަށް ނުޖެހޭނެ،" މިނިސްޓަރު ވިދާޅުވި އެވެ.
"ފުޑް، ފިއުލް އަދި އެއްވެސް ކޮމޯޑިޓީއެއްގެ ޗެލެންޖެއް އިރާދަކުރެއްވިއްޔާ ކުރިމަތިވިޔަ ނުދޭނެ."
ސައީދު ވިދާޅުވީ ރާއްޖެއަށް އަންނަ ޓޫރިސްޓުންނާއި ވަޒީފާ އަދާކުރާ ބިދޭސީން ހިމަނައިގެން ރާއްޖޭގެ ޖުމްލަ އާބާދީއަށް ބޭނުންވާ އަސާސީ ކާބޯތަކެތީގެ ރައްކާތެރިކަން ކަށަވަރުކުރުމުގެ ގޮތުން ރާއްޖޭގައި މުދާ ރައްކާކުރެވޭނެ ކެޕޭސިޓީ އިތުރުކުރަން ވެސް ސަރުކާރުން މަސައްކަތްތަކެއް ފަށައިގެން ކުރަމުންދާ ކަމަށެވެ.
މެދުއިރުމަތީގެ ހާލަތާ ގުޅިގެން ތެލާއި ގޭހުގެ އަގު އުފުލެން ފެށުމުން މުދާ އުފުލުމުގައި ބޭނުންކުރާ މުހިންމު ބައެއް ކަނޑުއޮޅިތައް ބަންދުކޮށްފައިވާތީ ކާބޯތަކެތީގެ އަގުތައް އުފުލުމުގެ ފުރުސަތު ބޮޑު ނަމަވެސް ސަރުކާރުން މަސައްކަތް ކުރަނީ އެކަމުގެ އަސަރު ރައްޔިތުންނަށް އެންމެ ކުޑަވާނެ ގޮތްތަކަށް ވިސްނައިގެން ކަމަށް ސައީދު ވިދާޅުވި އެވެ.
"އޭގެ ތެރޭގައި ހިމެނޭ އަގުތައް ވެސް،" ތަކެތީގެ އަގު ބޮޑުވުމުގެ ކަންބޮޑުވުމަށް އިޝާރާތް ކުރައްވަައި، ސައީދު ވިދާޅުވި އެވެ.
ހަނގުރާމައާ ގުޅިގެން ގިނަ ފްލައިޓުތަކެއް ކެންސަލްވެ، މިހާރު ވެސް ޓޫރިޒަމަށް ނޭދެވޭ އަސަރުތައް ކުރަން ފަށާފައިވާއިރު މިނިސްޓަރު ވިދާޅުވީ ޓޫރިޒަމަށް ކުރާ އަސަރުތައް ކުޑަކުރަން ޓޫރިޒަމް މިނިސްޓްރީން އިސްވެ ގިނަ މަސައްކަތްތަކެއް ކުރަމުންދާ ކަމަށެވެ.
ރާއްޖޭގެ ހުރިހާ ސިނާއަތްތަކެއް ޓޫރިޒަމާ ގުޅިފައި އޮތުމުން ޓޫރިޒަމަށް ކުރާ ކޮންމެ އަސަރެއް މުޅި އިގުތިސާދަށް ކުރާނެކަން ސައީދު ފާހަގަ ކުރެއްވި އެވެ.
މީގެކުރިން ވެސް އެކި ހަނގުރާމަތަކާއި ކުރިމަތިވި ކާރިސާތަކުގައި ވެސް ރާއްޖޭގެ ޓޫރިޒަމަށް އަސަރު ކުރިޔަސް، އެންމެ އަވަހަށް ޓޫރިޒަމް ސިނާއަތް އަލުން ހިނގަން ފަށާ ގައުމުތަކުގެ ތެރޭގައި ރާއްޖެ ހިމެނޭކަމަށް އޭނާ ވިދާޅުވި އެވެ.
"އެގޮތުން ބަލާއިރު ރާއްޖެއަކީ ވަރަށް ރެޒީލިއެންޓް ގައުމެއް. އެ ދެން އޭގެ އެންމެ ހެޔޮ ފާލަކީ" ސައީދު ވިދާޅުވި އެވެ.