މައްސަލައެއްގައި ހެކިބަސް އަދާކުރި މީހަކަށް މަގުމަތިން ހަމަލާދިން މީހަކު ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.
ހެކިވެރިއަކަށް ހަމަލާދިން މައްސަލާގައި ތުހުމަތުވާ މީހާގެ މައްޗަށް ދައުލަތުން އުފުލީ ގައިގައި އަތްލުމުގެ ދައުވާ އެވެ.
އެ ދައުވާ އުފުލީ މައްސަލައެއްގައި ހެއްކަކު ހެކިބަސް ދިން ގޮތާ މެދު ބަދަލު ހިފުމުގެ ގޮތުން އެމީހާގެ ގައިގާ ޖަހާފައިވާތީ އެވެ. ހެކިވެރިޔާގެ ގައިގާ ޖެހީ ބޮޑުތަކުރުފާނު މަގުގެ ޕޭވްމަންޓް މަތީ ހުއްޓާ، ދައުވާ ލިބޭ މީހާ، އިތުރު ބަޔަކާ އެކު ސައިކަލްގައި ގޮހެވެ.
ގައިގާ ޖެހުމުގެ ދައުވާއަށް އޭނާ ވަނީ ޝަރީއަތުގެ މަޖިލީހުގައި އިއުތިރާފުވެފަ އެވެ. އެހެންވެ، އިއުތިރާފަށް ރިއާޔަތްކޮށް ކްރިމިނަލް ކޯޓުން އިއްވާފައިވަނީ ލުއި އަދަބެކެވެ.
އޭނާގެ މައްޗަށް އިއްވީ އެއް މަހާއި 15 ދުވަހުގެ ޖަލު ހުކުމެކެވެ. ނަމަވެސް، މި މައްސަލައިގެ ތަހުގީގަށް 75 ދުވަހު އޭނާ ބަންދުގައި ހުރުމުގެ ސަބަބުން، ދެން އިތުރަށް ތަންފީޒު ކުރަން ޖެހޭ އަދަބެއް ނެތެވެ.