ހަނގުރާމައާ ގުޅިގެން މެދުއިރުމަތީގެ ގައުމުތަކުގެ އެއާޕޯޓުތައް ބަންދު ކުރުމުގެ ސަބަބުން ވައިގެދަތުރުފަތުރަށް އެރި ބުރޫތައް ކުޑަކުރުމުގެ ގޮތުން މިދިޔަ ދުވަސްތަކުގެ ތެރޭގައި ޔޫރަޕުގެ އާ ފަސް މަންޒިލަކަށް ފްލައިޓްތައް ބާއްވާފައިވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އަމީން ވިދާޅުވީ މެދުއިރުމަތީގެ ގައުމުތަކުގެ ވައިގެ ސަރަހައްދު ބަންދުވުމުގެ ނޭދެވެ އަސަރު ރާއްޖޭގެ ޓޫރިޒަމަށް ވަރަށް ބޮޑަށް ކުރަމުންދާ ކަމަށެވެ. މިއަދު އެކަނި ވެސް 53 ފްލައިޓް ޝެޑިއުލްކޮށްފައި އޮތްއިރު، އޭގެ ތެރެއިން 18 ފްލައިޓެއް ކެންސަލްވެފައިވާ ކަމަށް އޭނާ ވިދާޅުވި އެވެ.
"އެއީ މުޅިން ވެސް މެދުއިރުމަތީގެ ގައުމުތަކުން އަންނަ ފްލައިޓްތައް،" އޭނާ ވިދާޅުވި އެވެ.
އަމީން ވިދާޅުވީ 18 ފްލައިޓް އެއް ދުވަސް ތެރޭގައި ކެންސަލްވުމަކީ މުޅި ދާއިރާއަށް ބޮޑު ޗެލެންޖެއް އަންނާނެ ކަމެއް ކަމަށާއި އެހެންވެ، ލޮޅުންތައް ކުޑަކުރުމަށްޓަކައި ސަރުކާރުން އެ ސިނާއަތުގެ ފަރާތްތަކާ ގުޅިގެން މަސައްކަތްތަކެއް ކުރަމުންދާ ކަމަށް އޭނާ ވިދާޅުވި އެވެ.
"މިދިޔަ ތިން ދުވަހުގެ ތެރޭގައި ސީދާ ޔޫރަޕުން ފަސް ފްލައިޓެއް އޮޕަރޭޓް ކުރެވިއްޖެ. ކުރިން ދަތުރު ނުކުރާ ފަސް ޑެސްޓިނޭޝަނަކަށް. އެއީ ކުރިއެރުމެއް،" އަމީން ވިދާޅުވި އެވެ.
ނަމަވެސް، އަލަށް ފްލައިޓްތައް ބޭއްވީ ކޮން ގައުމުތަކަކަށް ކަމެއް އަމީން ވިދާޅެއް ނުވެ އެވެ.
އަމީން ވިދާޅުވީ ސަރުކާރުން މިހާރު މަސައްކަތް ކުރަނީ އޭޝިއާ އާއި ދެކުނު އިރުމަތީ އޭޝިއާ އަދި އިންޑިއާގެ ޑެސްޓިނޭޝަންތަކުން މިހާރު އޮޕަރޭޓްކުރާ ފްލައިޓްތަކުގެ އަދަދު އިތުރުކުރަން ކަމަށެވެ. އަދި ސަރުކާރުން ދޭންޖެހޭ ލުއިތަކެއް ދީގެން އެކަން ހަމަޖެއްސޭތޯ މަސައްކަތްކުރާ ކަމަށް އޭނާ ވިދާޅުވި އެވެ.
"ޕެސެޖެންޖާ ކެޕޭސިޓީ އޭޝިއާ ބައްރުން އިތުރުކުރެވޭތޯ ވަރަށް ބޮޑަށް ބަލަން،" އޭނާ ވިދާޅުވި އެވެ.
އަމީން ވިދާޅުވީ ފްލައިޓްތައް ކެންސަލްވުމުގެ ސަބަބުން ރާއްޖޭގައި ތާށިވި މީހުންގެ ތެރެއިން 300 އަށް ވުރެ ގިނަ ޓޫރިސްޓުން އަދިވެސް ރާއްޖޭގައި އެބަ އުޅޭ ކަމަށާއި އޭގެ ތެރެއިން ބައެއް ޓޫރިސްޓުން އަނބުރާ ރިސޯޓުތަކަށް ގޮސްފައިވާ ކަމަށް އޭނާ ވިދާޅުވި އެވެ. އަދި އެއްވެސް ގޮތެއް ނެތިގެން ތިބެން ޖެހުނު 110 ޓޫރިސްޓަކު މިވަގުތު ވެސް އެއާޕޯޓްގެ ހާއްސަ ޝެލްޓާ ފެސިލިޓީގައި އެބަތިބި ކަމަށް އޭނާ ވިދާޅުވި އެވެ.
އީރާނަށް އިޒްރޭލާއި އެމެރިކާ އިން މިދިޔަ ހޮނިހިރު ދުވަހު ދޭން ފެށި ހަމަލާތަކުގެ ރައްދުގައި އީރާނުން ވަނީ މެދުއިރުމަތީގެ އެކި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާ ދީފަ އެވެ.
އެ ހަމަލާތަކާ ގުޅިގެން ގައުމުތަކުގެ ވައިގެ ސަރަހައްދު ބަންދު ކުރުމުން، ރާއްޖެއަށް ދަތުރުކުރާ ގިނަ އެއާލައިންތަކުގެ ފްލައިޓްތައް ކެންސަލްވެ ވެލާނާ އިންޓަނޭޝަނަލް އެއާޕޯޓުގައި ވެސް ގިނަ ޓޫރިސްޓުންތަކެއް ވަނީ ނުފުރި ތާށިވެފަ އެވެ.