ސްޓެލްކޯގެ ކަސްޓަމާ ސާވިސް ޕޯޓަލް "ވަށަނި" މިއަދު އިފުތިތާހުކޮށްފި އެވެ.
އެ ޕޯޓަލް އިފްތިތާހު ކޮށްދެއްވީ ސްޓެލްކޯގައި ބޭއްވި ހާއްސަ ރަސްމިއްޔާތެއްގައި، އެ ކުންފުނި ހިންގުމާ ވަގުތީ ގޮތުން ހަވާލުވެ ހުންނެވި، ޑެޕިއުޓީ މެނޭޖިން ޑިރެކްޓަރު ޑރ. އަލީ އަޒްވަރު އެވެ.
އެ ރަސްމިއްޔާތުގައި އަޒްވަރު ވިދާޅުވީ "ވަށަނި" ޕޯޓަލްއަކީ ރައީސް ޑރ. މުހައްމަދު މުއިއްޒުގެ 2.0 އަދި ރާއްޖޭގެ ހުރިހާ އިދާރާތަކެއް ޑިޖިޓަލް ކުރުމަށް ފަށާފައިވާ ޕްރޮޖެކްޓުގެ ދަށުން ކުރި މަސައްކަތެއް ކަމަށެވެ.
މިއަދަކީ ސްޓެލްކޯގެ ހަޔާތުގައި ފާހަގަ ކޮށްލެވޭ ދުވަހެއްކަން ފާހަގަ ކުރައްވައި، އަޒްވަރު ވިދާޅުވީ އެއީ ވަށަނި ޕޯޓަލަކީ ކުންފުނީގެ ވަރަށް ގިނަ މުވައްޒަފުން ވަރަށް ގިނަ ދުވަސް ވަންދެން މަސައްކަތްކޮށް، ނިންމި ވަރަށް މުހިންމު މަސައްކަތެއް ކަމަށެވެ.
"އެ ޕޯޓަލުން ކަސްޓަމަރުންނާ ގުޅުން ހުރި ހުރިހާ ހިދުމަތެއް އޮންލައިންކޮށް ލިބޭނެ. ބިލްތައް ދެއްކުމުގެ އިތުރުން ފައިސާ އޮންލައިންކޮށް ސަބްމިޓް ކުރެވި ސްޓޭޓަސް ބެލޭނެ މެކޭނިޒަމެއް ގާއިމް ވެގެން މި ދިޔައީ،" އަޒްވަރު ވިދާޅުވި އެވެ.
ސްޓެލްކޯގެ ބައެއް ހިދުމަތްތަކަށް ޔޫޓިލިޓީ ރެގިއުލޭޓަރީ އޮތޯރިޓީގެ ރަޖިސްޓާޑް ނުވަތަ ލައިސަންސް އިންޖިނިއަރުން މެދުވެރިކޮަށް ހުއްދަ ހޯދަން ޖެހެ އެވެ.
އަޒްވާރު ވިދާޅުވީ އެޕްރޫވްޑް ލައިސެންސްޑް އިންޖިނިއަރުން މަސައްކަތް ކުރާ އެޕްލިކޭޝަންތައް އެޕްރޫވް ކުރެވޭނެ އިންތިޒާމު ވެސް މި ސިސްޓަމުގެ ތެރެއިން ހަމަޖެހިފައިވާނެ ކަމަށެވެ.
ސްޓެލްކޯއިން އަލަށް ފެށި އޮންލައިން އެ ހިދުމަތަކީ އާންމުން ބަލައިގަންނާނެ އަދި އާންމުންނަށް މިހާރަށް ވުރެ ބޮޑަށް ލުއިފަސޭހަ ވެގެންދާނެ ހިދުމަތަކަށް ވެގެންދާނެ ކަމަށް ވެސް އޭނާ ވިދާޅުވި އެވެ.