އައްޑޫގެ ކަރަންޓުގެ މައްސަލައަށް ދާއިމީ ހައްލެއް ހޯދުމަށް އަޅާ އިންޖީނުގޭގެ މަޝްރޫއު ފެނަކަ ކޯޕަރޭޝަނުން ދުބާއީގެ ކުންފުންޏަކާ އިއްޔެ ހަވާލުކޮށްފި އެވެ.
ފެނަކަ ހެޑް އޮފީހުގައި ބޭއްވި ރަސްމިއްޔާތެއްގައި އެ ކުންފުނީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރު މުހައްމަދު ނަޖާހު އެވެ. އެ މަސައްކަތް ހަވާލުކުރި ދުބާއީގެ ޑެފިނިޓް ސޮލިއުޝަންސްގެ ފަރާތުން ސޮއިކުރެއްވީ ފައުންޑަރު އަދި ސީއީއޯ އަބްދުﷲ ސައީދެވެ.
ފެނަކައިން ދައުލަތުގެ މީޑިއާ، ޕީއެސްއެމަށް ބުނެފައިވާ ގޮތުގައި، އެ މަޝްރޫއުގެ އަގަކީ 31 މިލިއަން ޑޮލަރެވެ.
މި މަޝްރޫއުގެ ދަށުން އިންޖީނުގޭގައި ބެހެއްޓުމަށް ހަމަޖެހިފައި ވަނީ ބެލްޖިއަމް ކުންފުންޏެއް ކަމަށްވާ އަންގްލޯ ބެލްޖިއަން ކޯޕަރޭޝަން (އޭބީސީ)ގެ އިންޖީނުތަކެއް ކަމަށާއި ޔޫރަޕްގައި ބޭނުންކުރާ މި ބްރޭންޑްގެ އިންޖީނުތަކަކީ، މިހާރު އައްޑޫގައި ހުރި ހައި ސްޕީޑް އިންޖީނުތަކާ ހިލާފަށް ލޯ ސްޕީޑް ޒަމާނީ އިންޖީނުތަކެއް ކަމަށް ފެނަކައާ ހަވާލާދީ ޕީއެސްއެމްގައި ބުނެފައިވެ އެވެ.
އައްޑޫގެ އާ އިންޖީނުގެ އެޅުމުގެ މަޝްރޫއު ހިންގަން 2024 ވަނަ އަހަރު ޗައިނާގެ ޑޮންފަން ކުންފުންޏާ ހަވާލުކުރި ނަމަވެސް، އެ މަޝްރޫއު ކުރިއަށް ނުގެންދާތީ އެ އެއްބަސްވުން މިހާރު ބާތިލުކޮށްފައިވާ ކަމަށް ފެނަކައިން ޕީއެސްއެމަށް ބުންޏެވެ.
އަންނަ މަހު ހަތަރެއްގައި ބާއްވާ ލޯކަލް ކައުންސިލް އިންތިހާބަށް ޕީއެންސީގެ "ދަ ގްރޭޓާ އައްޑޫ" ކެމްޕެއިން އިފްތިތާހުކުރުމަށް ހެންވޭރު އާޓިފިޝަލް ބީޗުގައި ރޭ ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ޔަގީންކަން ދެއްވި ގޮތުގައި، މިއަދު ސޮއިކުރި އެއްބަސްވުމުގެ ސަބަބުން ކުރިއަށް އޮތް 20 އަހަރަށް އައްޑޫގެ ކަރަންޓުގެ މައްސަލަ ހައްލުވާނެ އެވެ.
"26 މެގަވޮޓްގެ ކަރަންޓު ފޯރުކޮށްދޭނެ ނިޒާމު އިރާދަކުރެއްވިއްޔާ މި އެއްބަސްވުމުގެ ދަށުން ގާއިމްކުރެވިގެންދާނެ،" ރައީސް ވިދާޅުވި އެވެ.
"މި އަންނަ އަހަރުގެ ޖުލައި މަސް އަންނައިރުގައި، މުޅިން އެކުގައި މި މަޝްރޫއު ނިމި، ކުރިއަށް އޮތް 20 އަހަރު ދުވަހަށް އައްޑޫގެ ކަރަންޓުގެ މައްސަލަ ހައްލުވާނެ."
ރައީސް ވިދާޅުވީ ލާމަރުކަޒީ ނިޒާމެއްގައި ކައުންސިލްތަކަކީ ވަރަށް ގިނަ ޒިންމާތަކާއި މަސްއޫލިއްޔަތުތަކާއި ބާރުތައް ދީފައި އޮންނަ ބައެއް ކަމަށެވެ. އެ ބާރުތައް ބޭނުންކޮށްގެން ވަރަށް ގިނަ ކަންކަން ހުއްޓުވައި، ހުރަސްތައް ކުރިމަތި ކުރެވޭނެ ކަމަށާއި އިންޖީނުގޭގެ މި ބޮޑު މަޝްރޫއުއަށް ވެސް ސިޓީ ކައުންސިލަށް ހުރަސްއެޅުމުގެ ފުރުސަތު އޮންނާނެ ކަމަށް ރައީސް ވިދާޅުވި އެވެ.
ކުރިއަށް އޮތް ކައުންސިލް އިންތިހާބުގައި އައްޑޫ ސިޓީ ކައުންސިލަށް ސަރުކާރުގެ ނުވަތަ ޕީއެންސީގެ މެމްބަރުން ހޮވަން ޖެހެނީ މިފަދަ މުހިންމު މަޝްރޫއުތައް ހުއްޓުވަން އޮތް މަގު ބަންދުކުރުމަށް ކަމަށް ރައީސް ތަކުރާރުކޮށް ވިދާޅުވި އެވެ.
އައްޑޫގެ ގުޅިފައިވާ ރަށްތަކުން ކަރަންޓު ކެނޑޭ މައްސަލައަކީ ވަރަށް ބޮޑުވެފައިވާ، ގިނަ ދުވަސްވީ މައްސަލައެކެވެ. މީގެ ކުރިން އެތައް ސަރުކާރަށް ހައްލު ނުވެ އޮތް މި މައްސަލައަށް ދާއިމީ ހައްލެއް ގެނެސްދެއްވާނެ ކަމުގެ ޔަގީން ރައީސް މިރޭ ދެއްވި އެވެ.