އެލް ނީނޯގެ ހާލަތު ގޯސްވުމުގެ 90 ޕަސެންޓު ފުރުސަތު އެބައޮތް

ޕެސިފިކް ކަނޑުގައި މިހާރު އުފެދެމުންދާ އެލް ނީނޯގެ ހާލަތު އިތުރަށް ވަރުގަދަވެ، ބާރުގަދަ އެއް ނީނޯއަކަށް ބަދަލުވުމުގެ 90 ޕަސެންޓު ފުރުސަތު އެބައޮތް ކަމަށް ސްރީ ލަންކާގެ މޫސުމާ ބެހޭ އިދާރާއިން ވެސް އިއްޔެ އިންޒާރު ދީފި އެވެ. 

މި އަހަރުގެ އޮގަސްޓުން އޮކްޓޯބަރު މަހާ ދެމެދު މި އެލް ނީނޯ ވަރަށް ބާރުގަދަ ހާލަތަކަށް ބަދަލުވުމުގެ ފުރުސަތު 90 ޕަސެންޓަށް ވުރެ މަތި ކަމަށް ދުނިޔޭގެ މޫސުމާ ބެހޭ އިދާރާ ވޯލްޑް މީޓިއޮރޮލޮޖިކަލް އޯގަނައިޒޭޝަން (ޑަބްލިއުއެމްއޯ) އިން ވެސް ވަނީ ލަފާކޮށްފަ އެވެ. 

ލަންކާގެ މީޓިއޮރޮލޮޖީ ޑިޕާޓްމަންޓުގެ ޑިރެކްޓަ ޖެނެރަލް އަޖިތު ވިޖޭމަންނަގެ ވިދާޅުވީ މޫސުމީ ލަފާކުރުންތަކުގެ ރިޕޯޓްތައް ދައްކާ ގޮތުގައި މި އަހަރުގެ އެލް ނީނޯއަކީ މިދިޔަ 75 އަހަރުގެ ތެރޭގައި ވެސް އައި އެންމެ ބާރުގަދަ އެލް ނީނޯއަށް ވުމުގެ ފުރުސަތު ވަރަށް ބޮޑު ކަމަށެވެ. 

ލަންކާގެ މީޑިއާތަކަށް އޭނާ ވިދާޅުވި ގޮތުގައި، ދުނިޔޭގެ މޫސުމީ މޮޑެލްތައް ދައްކާ ގޮތުގައި މި އަހަރުގެ ނިޔަލަށް ވަރަށް ބާރުގަދަ އެލް ނީނޯއެއް އައުމުގެ ފުރުސަތު 90 ޕަސެންޓަށް ވުރެ ބޮޑެވެ. އަދި 1950 އިން ފެށިގެން މިހާތަނަށް އައިސްފައިވާ އެލް ނީނޯތަކާ އަޅާބަލާއިރު، މި އަހަރުގެ އެލް ނީނޯ، ކުރީގެ ހުރިހާ އެލް ނީނޯއަކަށް ވުރެ ބާރުގަދަވުމުގެ ފުރުސަތު 70 ޕަސެންޓާއާ ގާތްކުރެ އެވެ. 

އަޖިތު ވިދާޅުވީ ލަންކާގެ އުތުރާއި އުތުރު-ސެންޓްރަލް އަދި އުތުރު-ހުޅަނގު ޕްރޮވިންސްތަކުގެ އިތުރުން މޮނަރާގަލާ އަދި ހަންބަންތޮޓާ ޑިސްޓްރިކްޓްތަކުގައި ހޫނުމިން ވަރަށް ބޮޑަށް އިތުރުވަމުންދާކަން ފާހަގަކުރެވިފައިވާ ކަމަށެވެ. ނަމަވެސް، ލަންކާގެ ހުޅަނގު އަދި ސަބަރަގަމުވާ ޕްރޮވިންސްތަކަށް ވިއްސާރަކުރާތީ، އެ ސަރަހައްދުތަކުން ހޫނުމިން މައްޗަށް ދިއުމުގެ އަސަރު އެހާ ބޮޑަށް ފާހަގަކުރެވިފައި ނުވާ ކަމަށް އޭނާ ވިދާޅުވި އެވެ.

ލަންކާގެ އިރިގޭޝަން ޑިޕާޓްމަންޓުން ހާމަކުރި ގޮތުގައި، އެ ޑިޕާޓްމަންޓުގެ ބެލުމުގެ ދަށުގައި ހުރި ކޯރުތަކުގައި ފެން ހުރި މިންވަރު ވަނީ 37 ޕަސެންޓަށް ދަށްވެފަ އެވެ. އެހެންވެ، ފެން އިގްތިސާދުކޮށްގެން ބޭނުންކުރުމަށް އާންމުންނަށް ވަނީ އިލްތިމާސްކޮށްފަ އެވެ. ކޯރުތަކުގައި މިހާރު ހުރި ފެން އިގުތިސާދުކޮށްގެން ބޭނުންކޮށްފި ނަމަ ލަންކާގެ ދަނޑު ގޮވާންކުރާ މޫސުމަށާއި މި އަންނަ ނޮވެމްބަރާއި ޑިސެމްބަރު މަހުގެ ވިއްސާރައާ ހަމައަށް ފުދޭނެ ކަމަށް އެ ޑިޕާޓްމަންޓުން ލަފާކުރެ އެވެ. 

ލަންކާގައި ސްޕްލައި ފެނުގެ ހިދުމަތް ދޭ ސަރުކާރުގެ ކުންފުނިން ބުނި ގޮތުގައި، މި ދުވަސްވަރު ލަންކާގެ ގިނަ ސަރަހައްދުތަކަށް ހޫނުގަދަވި ނަމަވެސް ސާފު ފެން އުފައްދާ ޕްލާންޓްތައް 100 ޕަސެންޓު ކެޕޭސިޓީގައި އަންނަނީ ހިންގަމުންނެވެ. އަދި 56 ޕަސެންޓަށް ވުރެ ގިނަ ކޯރުން ފެން މަދުވެފައިވީ ނަމަވެސް، އާންމުންނަށް ފެން ފޯރުކޮށްދިނުން ލިމިޓްކޮށްފައި ނުވެ އެވެ. 

އެލް ނީނޯއަކީ ކަނޑުގެ ސަތަހައިގެ ހޫނުމިން އާދަޔާ ހިލާފަށް މަތިވުމުގެ ސަބަބުން ކުރިމަތިވާ ގުދުރަތީ މޫސުމީ ހާލަތެކެވެ. މީގެ ސަބަބުން:

ވޯލްޑް މީޓިއޮރޮލޮޖިކަލް އޯގަނައިޒޭޝަން (ޑަބްލިއުއެމްއޯ) އިން އެންމެ ފަހުން ނެރުނު ގްލޯބަލް ސީޒަނަލް ކްލައިމެޓް އަޕްޑޭޓްގައި ބުނެފައި ވަނީ އެލް ނީނޯ އިތުރަށް ވަރުގަދަވަމުންދާ ކަމަށާއި މި އަހަރުގެ ނިޔަލަށް ދުނިޔޭގެ މޫސުމީ ނިޒާމަށް މީގެ އަސަރު ވަރަށް ބޮޑަށް ކުރާނެ ކަމަށެވެ.

ޑަބްލިއުއެމްއޯގެ ސެކްރެޓަރީ ޖެނެރަލް ސެލެސްޓޭ ސައުލޯ ވިދާޅުވީ ކަނޑުގެ ފިނިހޫނުމިން މިހާ މައްޗަށް ގޮސްފައިވާ ދަނޑިވަޅެއްގައި މިފަދަ ބާރުގަދަ އެލް ނީނޯއެއް އައުމުން ލިބިދާނެ ގެއްލުންތަކުން ރައްކާތެރިވުމަށް މޫސުމީ އިންޒާރުތަކާ އެކު، ގައުމުތަކުގެ ސަރުކާރުތަކަށާއި އާންމުންނަށް ކުރިއާލާ ތައްޔާރުވުމަށް މުހިންމު ފުރުސަތެއް ލިބޭނެ ކަމަށެވެ.