ރާއްޖެ އައި ނޭޕާލު އަންހެނަކާއި ފިރިހެނެއްގެ ހަށިގަނޑު ތެރޭގައި މަސްތުވާތަކެތި ފޮރުވާފައި ހުރި ކަމަށް ޝައްކުވެގެން ހައްޔަރުކޮށް އެ ދެ މީހުން ބޮޑުކަމުދިއުމުން އެ ތަކެތި ނަގައިފި އެވެ.
މި މައްސަލާގައި މި މަހުގެ 25 ވަނަ ދުވަހު ހައްޔަރުކޮށްފައިވަނީ އުމުރުން 40 އަހަރުގެ އަންހެނެއް ކަމަށްވާ އީތުރާނީ ގަލެ އާއި 47 އަހަރުގެ ފިރިހެނެއް ކަމަށްވާ ނިއްކަ ތަމަންގް އެވެ.
މި ދެ މީހުން ހައްޔަރުކޮށް ބަންދުގެ މުއްދަތު އިތުރުކުރުމަށް ކޯޓަށް ހާޒިރުކުރުމުގެ 30 ދުވަސް ދީ ނެރުނު ދެ އަމުރުން އެނގޭ ގޮތުގައި މި ދެ މީހުންނާ މެދު ކަސްޓަމްސް އޮފިސަރުންނަށް ޝައްކުކުރެވުނީ އުޅުން ހުރި ގޮތުންނެވެ. އެހެންވެ ދެ މީހުން އައިޖީއެމްއެޗަށް ގެންގޮސް ސްކޭންކުރުމުން "ފޮރިން ބޮޑީސް" ހުރި ކަމަށް ސްކޭންތަކުން ދެއްކި ކަމަށާއި އެ ތަކެއްޗަކީ މަސްތުވާތަކެތި ކަމަށް ތުހުމަތުކުރެވޭ ކަމަށް ޑޮކްޓަރުންނާ ހަވާލާދީ ބުނެފައިވެ އެވެ.
ފުލުހުން ބުނީ މި މީހުންގެ ހަށިގަނޑުން 142 ބުލެޓް ޑްރަގް ފެނިފައިވާ ކަމަށާއި ބަރުދަނުގައި 1.5 ކިލޯ ހުރި ކަމަށެވެ.
އިއްޔެ ނެރުނު ކޯޓު އަމުރުގައި އޮތީ އެހާ ހިސާބަށް މިއިން ކޮންމެ މީހެއްގެ ހަށިގަނޑުން ވެސް ބޮޑުކަމު ދިޔައިރު 53 ބުލެޓް ޑްރަގް ނެގިފައި ކަމަށާއި އަދި ކޮންމެ މީހެއްގެ ހަށިގަނޑުން ނެގުނު ތަކެތީގެ ބަރުދަނުގައި 650 ގްރާމް ހުރި ކަމަށެވެ.
މި ދެ މީހުންގެ ބަންދަށް ވެސް 30 ދުވަސް ކްރިމިނަލް ކޯޓުން ވަނީ ދީފަ އެވެ. ތަރުޖަމާނެއްގެ އެހީގައި މި ދެ މީހުންގެ ބަންދު މަޖިލީހުގައި ވާހަކަ ދައްކާފައި ވާއިރު ދިފާއީ ވަކީލަކު ހަމަޖެއްސުމަށް ކޯޓުން ވަނީ ފުރުސަތު ދީފަ އެވެ.