ޗަސްބިމުގައި އުޅޭ ކަކުނި ފަލަކުރުމުގެ މަޝްރޫއެއް ރާއްޖޭގައި ހިންގަން ފުރަތަމަ ފަހަރަށް ހުއްދަ ދީފި އެވެ.
އެގްރިކަލްޗާ މިނިސްޓްރީން "މަޑް ކްރެބް ފެޓަނިން" މަޝްރޫއަށް ހުއްދަ ދިނީ މެރިޓޯލް ޕްރައިވެޓް ލިމިޓެޑް ކިޔާ ކުންފުންޏަކަށެވެ. އެ މަޝްރޫއު ހިންގަނީ ގދ. ފިޔޯރީގަ އެވެ.
މަޝްރޫއުގެ މަގުސަދަކީ މިނިސްޓްރީން ބުނި ގޮތުގައި ފިޔޯރީގެ "ކުޅިޔެ ވަޅަގަނޑޭ" ކުޅިން ނަގާ ކުދި ކަކުނި، ހާއްސަަ ކޮށިތަކެއްގައި ފަލަކޮށް ބަލަހައްޓައިގެން ވިޔަފާރި އުސޫލުން ބާޒާރަށް ނެރެވޭނެ ފެންވަރަށް ތަރައްގީކުރުމެވެ.
ޗަސްބިމުގައި އުޅޭ ކަކުނި ފަލަކުރުމަކީ މަދު ދުވަސްކޮޅެއްގެ ތެރޭގައި ކުރެވޭ ކަމެކެވެ. މީގެ މައިގަނޑު ބޭނުމަކީ މަސް މަދު ނުވަތަ ތޮށި މަޑުކޮށް ހުންނަ ކަކުނި، ކުރު މުއްދަތެއްގެ ތެރޭގައި ފަލަކޮށް، ތޮށި ހަރު އަދި މަސް ގިނަ، މަތީ ފަންތީގެ އުފެއްދުމަކަށް ބަދަލުކުރުމެވެ.
މި މަސައްކަތް ކުރިއަށްދާ ގޮތް:
• ކަކުނި އިހްތިޔާރުކުރުން: މި މަސައްކަތަށް އާންމުކޮށް ބޭނުންކުރަނީ ބަރުދަނުގައި 80 ގްރާމާއި 550 ގްރާމާ ދެމެދުގެ މަސް މަދު ކަކުނިތަކެވެ.
• ބަލަހައްޓާނެ ނިޒާމު: ކަކުނިތައް އެކަތި އަނެކައްޗަށް ހަމަލާދީ ކެއުން ހުއްޓުވުމަށާއި، ތޮށި ހަރުވަންދެން ރައްކާތެރިކުރުމަށްޓަކައި، ވަކިވަކިން ބަހާލެވިފައިވާ ކޭޖުތަކުގައި ނުވަތަ ޕްލާސްޓިކް ފޮށިތަކުގައި ނުވަތަ ފެން ސާފުކޮށްދޭ ހާއްސަ ނިޒާމުތަކުގައި ބަހައްޓަ އެވެ.
• ކާނާ ދިނުން: ކަކުނިތަކަށް ކޮންމެ ދުވަހަކު ވެސް އެ ސޮރުމެންގެ ބަރުދަނުގެ ފަސް ޕަސެންޓާއި 10 ޕަސެންޓާ ދެމެދުގެ މިންވަރަކަށް ކާނާ ދެ އެވެ. މީގެ ތެރޭގައި ޕްރޮޓީން ގިނަ ކުދިމަހާއި، ބޯވަދިލަމަހުގެ ބައިތައް ހިމެނެ އެވެ.
• މުއްދަތާއި ނަތީޖާ: މި މަރުހަލާއަށް ނަގަނީ ގާތްގަނޑަކަށް 15-40 ދުވަހުގެ މުއްދަތެކެވެ. މި މުއްދަތުގެ ތެރޭގައި ކަކުނީގެ މަސް ގިނަވެ، ތޮށި ހަރުވެ، ބާޒާރުގަ އާއި އެކްސްޕޯޓް ކުރުމުގައި އޭގެ އަގު ބޮޑުތަނުން އުފުލިގެން ދެ އެވެ.