ރ. އަނގޮޅިތީމުގައި އުމުރުން 72 އަހަރުގެ ދިވެހި އަންހެނަކު ނަމާދަށް ހުއްޓާ، މަރާލާނެކަމުގެ އިންޒާރުދީ، ޖިންސީ ގޯނާކުރި މީހާ 15 ދުވަހަށް ބަންދުކުރަން ކޯޓުން މިއަދު އަމުރުކޮށްފި އެވެ.
ފުލުހުން މިއަދު ބުނެފައިވާ ގޮތުގައި އެ މައްސަލަ ރޭގެ 8:30 ހާއިރު ހުށަހެޅުމާ އެކު، ކޯޓު އަމުރެއްގެ ދަށުން 44 އަހަރުގެ ދިވެހި ފިރިހެނަކު ރޭގެ 9:57 ހާއިރު ހައްޔަރު ކޮށްފައި ވެ އެވެ.
އެ މީހާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުނެ ތަހުގީގުގެ ބޭނުމަށް 15 ދުވަހުގެ މުއްދަތަށް ބަންދުކުރަން އަމުރު ކޮށްފައިވާ ކަމަށް ވެސް ފުލުހުން މިރޭ ބުންޏެވެ.
ފުލުހުން މިއަދު ކުރިން ބުނީ އަނިޔާ ލިބުނު މީހާއަށް އަނގޮޅިތީމު ހެލްތު ސެންޓަރުގައި ފަރުވާދިނުމަށް ފަހު ދޫކޮށްލާފައިވާ ކަމަށެވެ.
އެނގިފައިވާ ގޮތުގައި އެ މީހާއަށް ޖިންސީ ގޯނާކުރީ އެ އަންހެން މީހާ ކޮޓަރީގައި ރޭ އިޝާ ނަމާދަށް ހުއްޓަ އެވެ. ނަމަވެސް އެ ހާދިސާ ހިނގި ގޮތުގެ އިތުރު ތަފްސީލެއް އަދި ނުލިބެ އެވެ.