ފުލުހުންގެ ވާޖިބު އަދާކުރަމުން ދަނިކޮށް ފުލުހަކު ނިޔާވެއްޖެނަމަ، އެ މީހެއްގެ އާއިލާއަށް ބޭސްފަރުވާ އާއި އިތުރު އިނާޔަތްތަކަށް ދޭ އަދަދު އިތުރުކޮށް ފުލުހުންގެ ވަޒީފާގެ ގަވާއިދަށް އިސްލާހުތަކެއް ގެނެސްފި އެވެ.
ފުލުހުންގެ ވަޒީފާގެ ގަވާއިދަށް އިއްޔެ ގެނެސްފައިވާ އިސްލާހުގައިވާ ގޮތުން ފުލުހުންގެ ވާޖިބު އަދާކުރަނިކޮށް ފުލުހަކު ނިޔާވެއްޖެނަމަ އެ ފުލުހެއްގެ އާއިލާއަށް އެ ގަވާއިދުގެ 79 ވަނަ މާއްދާގައި ބަޔާންކުރާ އުސޫލާ އެއްގޮތަށް ފުލުހުންގެ ފަރާތުން ބޭސްފަރުވާ ކަށަވަރުކޮށްދޭން ޖެހޭނެ ކަމަށެވެ.
މީގެ އިތުރުން ފުލުހުންގެ ހިދުމަތުގައި ހުއްޓާ ނިޔާވާ ފުލުސް އޮފިސަރަކަށް ރޭންކުގެ ކުރިއެރުން ދީފިނަމަ އެ އޮފިސަރެއްގެ އިނާޔަތްތައް ހިސާބުކުރާނީ ކުރިއެރުން ލިބުނު އާ ރޭންކުގެ މުސާރައަށް ބަލައިގެން ކަމަށް އެ އިސްލާހުގައިވެ އެވެ.
މީގެ އިތުރުން ހިދުމަތުގައި ނިޔާވާ ފުލުހެއްގެ ޖަނާޒާ ވަކި ރަސްމިއްޔާތެއްގެ ގޮތުގައި ބޭއްވުމުގެ ފުރުސަތު ވެސް އާ ގަވާއިދުން ދީފައިވެ އެވެ. ނަމަވެސް އެ ނިންމުން ނިންމާނީ ނިޔާވި ހާލަތާއި ހާދިސާ ހިނގި ގޮތް އަދި ނިޔާވި މުވައްޒަފު އަދާކުރި ދައުރަށް ބެލުމަށްފަހު އެގްޒެކެޓިވް މެނޭޖްމަންޓް ބޯޑުން ކަމަށް ވެސް އެ އިސްލާހުގައިވެ އެވެ.