މާލޭ އުތުރު ފަރާތުގެ ޖެޓީތައް ޒަމާނީ ފެންވަރަށް ތަރައްގީ ކުރުމުގެ މަސައްކަތް ފަށަން ތައްޔާރުވެއްޖެ އެވެ.
ހައުސިން މިނިސްޓްރީން މިއަދު ކުރި އިއުލާނެއްގައި ބުނީ މާލެ އުތުރު ފަރާތު ބަނދަރު ބޭނުންކުރުމުގައި ދިމާވާ ދަތިތަކަށް ހައްލެއް ހޯދައިދިނުމުގެ ގޮތުން، އެ ސަރަހައްދުގެ ޖެޓީތައް ތަރައްގީކުރުމުގެ އަމަލީ މަސައްކަތް ފަށަން ހަމަޖެހިފައިވާ ކަމަށެވެ.
އެހެންވެ މަސްވެރިންގެ ޕާކު ސަރަހައްދުން ފެށިގެން ނާދީ ގޯޅިއާ ހަމައަށް އަޅާފައިވާ އުޅަނދުފަހަރު، ހުކުރު ދުވަހުގެ ނިޔަލަށް އެ ސަރަހައްދުން ނެގުމަށް މިނިސްޓްރީން ވަނީ އަންގައިފަ އެވެ.
އެ ތާރީހުގެ ފަހުން ނުނަގާ ހުންނަ އުޅަނދުފަހަރު މިނިސްޓްރީގެ ފަރާތުން ނަގާނެކަން ވެސް ވަނީ އަންގައިފަ އެވެ.
މާލޭ އުތުރުފަރާތުން ބޮޑުތަކުރުފާނު މަގާއި ބަނދަރު ސަރަހައްދު ތަރައްގީ ކުރުމުގެ ޕްލޭނުގައި ހިމެނޭ ބައެެއް ކުރެހުންތައް މީގެކުރިން ސަރުކާރުން ހިއްސާކޮށްފައިވެ އެވެ. އަދި އެ ކުރެހުންތަކުގައިވާ ގޮތުން އުތުރު ފަރާތު ބަނދަރުގައި ލޯންޗުތައް ކައިރި ކުރެވޭ ގޮތަށް ޖެޓީތަކެއް ތަރައްގީކުރަން ވަނީ ނިންމައިފަ އެވެ.
އެ ބަނދަރަކީ އެކި ރަށްރަށުންނާއި ރިސޯޓްތަކުން އެންމެ ގިނައިން ލޯންޗުފަހަރު ކައިރި ކުރާ ސަރަހައްދަށް ވާއިރު އެ ސަރަހައްދުގައި ތޮއްޖެހި، އެއް ލޯންޗުން އަނެއް ލޯންޗަށް އަރަން ޖެހުމުގެ މައްސަލައަކީ ޒަމާންވީ މައްސަލައެކެވެ.
ބޮޑުތަކުރުފާނު މަގުގެ އެ ސަރަހައްދު ފަޅުން ބައެއް ހިއްކައި ފުޅާކޮށް ޒަމާނީ ފެންވަރަށް ތަރައްގީކޮށްފައި ވާއިރު، އެމްއެމްއޭއާ ދިމާލުގައި ވެސް ޖެޓީތަކެއް ތަރައްގީ ކުރަން ސަރުކާރުން ނިންމާފައިވެ އެވެ.
މާލޭގެ ބޮޑުތަކުރުފާނު މަގު ފުޅާކޮށް، ތާރުއަޅައިގެން ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ތިން ވަނަ ފިޔަވަހި ފަށަން އެ މަގުގެ ވެސްޓް ޕާކު ސަރަހައްދު ވެސް މިހާރު އޮތީ ބަންދުކޮށްފަ އެވެ.
މިދިޔަ އަހަރުގެ އޮގަސްޓް މަހު ފަށާފައިވާ މަޝްރޫއުގެ ފުރަތަމަ ފިޔަވަހީގައި ވަނީ މަސްމާރުކޭޓާ ހިސާބުން ފެށިގެން ދެކުނަށް ގޮސް ޖުމްހޫރީމައިދާނުގެ މެދަކާ ހިސާބަށް އެއްގަމުތޮށި ބޭރަށް ޖައްސައި، އެ މަގު ވަނީ ހަތަރު ލޭނަށް ފުޅާކޮށް، ތާރު އަޅައިފަ އެވެ. އަދި ދެވަނަ ފިޔަވަހީގައި ޖުމްހޫރީ މައިދާނުން ފެށިގެން ހެންވޭރު ފެރީ ޓާމިނަލާ ހަމައަށް ވެސް އޮތީ މަގު ފުޅާކޮށްފަ އެވެ.
އެމްޕީއެލްއާ ހަމައަށް މަގު ތަރައްގީ ކުރުމުގެ މަސައްކަތް ފަށާއިރު، މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ވެސް ދަނީ ކުރަމުންނެވެ. އަދި ބޮޑުތަކުރުފާނުގައި ދެން ތަރައްގީ ނުކުރެވި އޮންނާނީ ނޯތު ހާބަރުން ފެށިގެން އެމްޕީއެލްއާ ހަމައަށެވެ. އެ ބައި ތަރައްގީ ކުރުމުގެ މަސައްކަތް ފަށަން ނިންމާފައިވަނީ ޕޯޓު ތިލަފުއްޓަށް ބަދަލުކުރުމުންނެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި މާލޭ ވިޔަފާރި ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ދާއިމީ ހައްލެއް ހޯދުމަށް ކުރިއަށް ގެންދާ އެ މަޝްރޫއުގެ ދަށުން އެތަން ނޮވެމްބަރު 11، 2027 ގެ ނިޔަލަށް ތިލަފުއްޓަށް ބަދަލުކުރާނެ އެވެ.