ބޮޑުތަކުރުފާނު މަގު ފުޅާކޮށް ތަރައްގީ ކުރުމުގެ މަސައްކަތަށް ސުނާމީ ބިނާ ސަރަހައްދުން ފެށިގެން އެމްޕީއެލްއާ ހަމައަށް މަގުތަކުގައި ހުރި އުޅަނދުތައް ނަގަން ހައުސިން މިނިސްޓްރީން އަންގައިފި އެވެ.
ހައުސިން މިނިސްޓްރީން ކުރި އިއުލާނެއްގައި ބުނީ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަޝްރޫޢުގެ ދަށުން، ސުނާމީ ބިނާއިން ފެށިގެން އެމްޕީއެލްއާ ހަމައަށް މަގު ހެދުމުގެ އަމަލީ މަސައްކަތް ފެށުމަށް ހަމަޖެހިފައިވާ ކަމަށެވެ.
އެހެންވެ ސުނާމީ ބިނާއިން ފެށިގެން އެމްޕީއެލްއާ ހަމައަށް ބޮޑުތަކުރުފާނު މަގުގައި ބަހައްޓާފައިވާ އުޅަނދުތަކާއި ތަކެއްޗާއި، ސުނާމީ ބިނާ ސަރަހައްދުގައި އަޅާފައިވާ އުޅަނދުފަހަރު އަންނަ ހޮނިހިރު ދުވަހުގެ ނިޔަލަށް ނެގުމަށް އަންގާ ކަމަށް އިއުލާނުގައިވެ އެވެ.
އެ ތާރީހުގެ ފަހުން މަގުގައި ނުނަގައި ހުންނަ ތަކެއްޗާއި ސުނާމީ ބިނާ ސަރަހައްދުގައި އަޅާފައިވާ އުޅަނދުފަހަރުތައް މިނިސްޓްރީން ނަގާނެ ކަމަށް ވެސް ބުންޏެވެ.
މާލޭގެ ބޮޑުތަކުރުފާނު މަގު ފުޅާކޮށް، ތާރުއަޅައިގެން ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ތިން ވަނަ ފިޔަވަހި ފަށަން އެ މަގުގެ ވެސްޓް ޕާކު ސަރަހައްދު ވެސް މިހާރު އޮތީ ބަންދުކޮށްފަ އެވެ.
މިދިޔަ އަހަރުގެ އޮގަސްޓް މަހު ފަށާފައިވާ މަޝްރޫއުގެ ފުރަތަމަ ފިޔަވަހީގައި ވަނީ މަސްމާރުކޭޓާ ހިސާބުން ފެށިގެން ދެކުނަށް ގޮސް ޖުމްހޫރީމައިދާނުގެ މެދަކާ ހިސާބަށް އެއްގަމުތޮށި ބޭރަށް ޖައްސައި، އެ މަގު ވަނީ ހަތަރު ލޭނަށް ފުޅާކޮށް، ތާރު އަޅައިފަ އެވެ. އަދި ދެވަނަ ފިޔަވަހީގައި ޖުމްހޫރީ މައިދާނުން ފެށިގެން ހެންވޭރު ފެރީ ޓާމިނަލާ ހަމައަށް ވެސް އޮތީ މަގު ފުޅާކޮށްފަ އެވެ.
އެމްޕީއެލްއާ ހަމައަށް މަގު ތަރައްގީ ކުރުމުގެ މަސައްކަތް ފަށާއިރު، މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ވެސް ދަނީ ކުރަމުންނެވެ. އަދި ބޮޑުތަކުރުފާނުގައި ދެން ތަރައްގީ ނުކުރެވި އޮންނާނީ ނޯތު ހާބަރުން ފެށިގެން އެމްޕީއެލްއާ ހަމައަށެވެ. އެ ބައި ތަރައްގީ ކުރުމުގެ މަސައްކަތް ފަށަން ނިންމާފައިވަނީ ޕޯޓު ތިލަފުއްޓަށް ބަދަލުކުރެވުމުންނެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި މާލޭ ވިޔަފާރި ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ދާއިމީ ހައްލެއް ހޯދުމަށް ކުރިއަށް ގެންދާ އެ މަޝްރޫއުގެ ދަށުން އެތަން ނޮވެމްބަރު 11، 2027 ގެ ނިޔަލަށް ތިލަފުއްޓަށް ބަދަލުކުރެވޭނެ އެވެ.