ފަނޑިޔާރުންގެ ނިންމުންތައް ނިންމައި ގޮތް ކަނޑައެޅުމުގައި އޭއައިގެ އެހީ ބޭނުން ކުރަން ދޫކޮށްލެވިދާނެ ކަމަށް ގަބޫލުފުޅު ނުކުރައްވާ ކަމަށް އުއްތަމަ ފަނޑިޔާރު އަބްދުޣަނީ މުހައްމަދު ވިދާޅުވެއްޖެ އެވެ.
އުޒްބެކިސްތާންގެ ސަމަރުގަންދުގައި ކުރިއަށް ގެންދާ އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސް (އޭއޭސީސީ)ގެ 7ވަނަ ކޮންގްރެސްގައި އުއްތަމަ ފަނޑިޔާރު ވަނީ ތަގުރީރު ކުރައްވައިފަ އެވެ.
އެމަނިކުފާނު ތަގުރީރު ކުރައްވާފައިވަނީ މައްސަލަތައް ލަސްނުވެ އަވަސް އިންސާފަށް: އަދުލު އިންސާފު ގާއިމު ކުރުމުގެ ފެންވަރު ރަނގަޅުކޮށް އިތުބާރު އުފެއްދުމުގެ ޑިޖިޓަލް ޓެކްނޮލޮޖީގެ ދައުރާ ގުޅޭ ގޮތުންނެވެ.
އުއްތަމަފަނޑިޔާރު ތަގުރީރުގައި ކޯޓުތަކުގައި ނުނިމިހުރި މައްސަލަތައް ނިންމުމުގެ ހާއްސަ މަސައްކަތް ރާއްޖޭގައި ކުރިއަށްދާ ގޮތާއި، ޓެކްނޮލޮޖީ އަދި އޭއައިގެ އެހީގައި ކޯޓުގައި ހުރި މައްސަލަތައް ލަސްވާ ސަބަބު ދެނެގަތުމަށް އަދި ޝަރީއަތުގެ މަސައްކަތްތައް އަވަސްކުރެވިދާނެ ގޮތްތަކަށް އަލި އަޅުވާލެއްވި އެވެ.
އުއްތަމަ ފަނޑިޔާރު ވިދާޅުވީ ޓެކްނޮލޮޖީ އާއި އޭއައި ކުރިއަރައިގެން ދިޔަ ނަމަވެސް ފަނޑިޔާރުން ކުރައްވާ މަސައްކަތް ނުވަތަ ކޯޓަށް ހުށަހަޅާ މައްސަލައަށް ގޮތް ނިންމުމުގައި ފަނޑިޔާރުގެ ދައުރު އަލްގޯރިދަމްއަކަށް ދޫކޮށްލުމަކީ ކުރެވޭނެ ކަމެއް ނޫން ކަމަށެވެ.
އެހެންކަމުން ޖުޑީޝަރީތަކުން އަމާޒު ހިފަންޖެހޭނީ އޭއައި ފަދަ ޓެކްނޮލޮޖީތަކަކީ ޖުޑީޝަރީތަކަށް އެހީތެރިވެދޭ ޓެކްނޮލޮޖީތަކެއް ކަމުގައި ހެދުމަށް ކަމަށް ވިދާޅުވި އެވެ.
އަދި ރާއްޖޭގެ ޖުޑީޝަރީގައި ވެސް މި އުސޫލުން ބައެއް މަސައްކަތް ކުރެވޭ ކަމަށާއި އަދި ރާއްޖޭގައި ވަށާޖެހޭ ކޭސް މެނޭޖްމަންޓް ސިސްޓަމެއް ބޭނުން ކުރެވިގެން ދިއުމާމެދު ކުރެވޭ ތަސައްވުރު ކަމެއް ކަމަށް ޣަނީ ވިދާޅުވި އެވެ.
މި ކޮންގްރެސްގެ ހަވާސާގައި ކޮންގްރެސްގައި ބައިވެރިވެ ވަޑައިންނެވި އެހެން ގައުމުތަކުގެ އުއްތަމަ ފަނޑިޔާރުންނާއި ދުސްތޫރީ ކޯޓުތަކުގެ ފަނޑިޔާރުންނާ ޖުޑީޝަރީތަކުގެ އިސްވެރިންނާ ދެމެދު ބޭއްވުނު މުހިއްމު މަޝްވަރާތަކެއްގައި އުއްތަމަފަނޑިޔާރު ބައިވެރިވެވަޑައިގެންނެވި އެވެ.
މި ކޮންފަރެންސްގައި ދުސްތޫރީ ކޯޓުތަކުގައި އޭއައި ބޭނުން ކުރުމާބެހޭ ގޮތުން ބައިވެރިން އެއްބަސްވާ ހަމަތަކުގެ މައްޗަށް ބިނާވާ ގަރާރެއް "ސަމަރުގަންދު ޑިކްލަރޭޝަން"ގެ ނަމުގައި އެކުލަވާލައި ފާސްކޮށްފައިވެ އެވެ.