ދުބާއީން ފުރައިގެން އިޒްރޭލަށް މިދިޔަ ބުދަ ދުވަހު ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުކުރެވޭ އުމާންގެ ކޯ-ޕައިލެޓާ ގުޅުން އޮންނަ ކަމަށް ބެލެވޭ ދެ ދިވެއްސަކު ޔޫއޭއީގައި ހައްޔަރުކޮށްފި އެވެ.
"މިހާރު" އަށް އެނގިފައިވާ ގޮތުގައި ހައްޔަރުކުރި ދެ ދިވެހިންނަކީ ބޯޓުގެ ޕައިލެޓަށް "ކްރޭޝް ހެމާ" އިން ހަމަލާދިން ކޯ-ޕައިލެޓް ހައްމާމް އަލް ހަމާނީއާ އެއް އިމާރާތެއްގައި އުޅޭ ބައެކެވެ. އެ ދެ މީހުންނަކީ ކޯ-ޕައިލެޓުންގެ ގޮތުގައި ފްލައިދުބާއީގައި މަސައްކަތްކުރާ މީހުން ކަމަށް ވެސް އެނގިފައިވެ އެވެ. އަދި އެ މީހުން ވެސް އިޒްރޭލަށް އެއާލައިންގައި ދަތުރުކޮށް އުޅެ އެވެ.
އެކަމަކު ހާދިސާއާ ދިވެހިންނާ ގުޅެނީ ކިހިނެއް ކަމެއް އަދި ސާފުވާ ގޮތެއް ނުވެ އެވެ.
މިކަމާ އިތުރު މައުލޫމާތެއް އަދި ރަސްމީ އެއްވެސް އިދާރާއަކުން ހާމައެއް ނުކުރެ އެވެ.
އިޒްރޭލުގެ ގިނަ ބަޔަކު ހިމެނޭހެން 182 ދަތުރުވެރިންނާއެކު ދަތުރުކުރި ބޯޓުގެ ޕައިލެޓަށް ހަމަލާދީ ޒަހަމްކޮށްލާފައި ވަނިކޮށް އޭނާ ކޮކްޕިކް ދޮރު ހުޅުވުމުން ކްރޫންނާއި ފަސިންޖަރުން ކޮކްޕިޓަށް ވަދެ ބޯޓުގެ ކޮންޓްރޯލް ހޯދައި ކޯ-ޕައިލެޓް ވަނީ ހިފަހައްޓައިފަ އެވެ. އަދި ކުއްލި ހާލަތުގައި ސައޫދީ އަރަބިއްޔާގެ ތަބޫކް އެއާޕޯޓަށް ޖެއްސި އެވެ.
ޔޫއޭއީން މިއަދު ވަނީ މިއީ ޓެރަރިސްޓް ހަމަލާއެއް ދިނުމުގެ ނިޔަތުގައި ކޯ-ޕައިލެޓް ހިންގި އަމަލެއް ކަމަށް ބުނެފަ އެވެ. ކޯ-ޕައިލެޓަކީ އުމާންގެ ރައްޔިތެއް ކަމަށްވާ ހަމާމް އަލް-ހައްމާމީ، 29، ކަމަށާއި އޭނާއަކީ ހައްދުފަހަނައެޅި ފިކުރުތަކަށް ތާއީދުކުރާ މީހެއް ކަމަށް ބެލެވޭތީ އުމާންގެ އިދާރާތަކުން ކުރިން ވަނީ އޭނާއަށް ޕައިލެޓްކަން ދިނުން މަނާކޮށްފައި ކަމަށް ވެސް ވަނީ ބުނެފަ އެވެ. އެހެންވެ، ފްލައިދުބާއީއަށް އޭނާ ވަޒީފާއަށް ނެގި ގޮތުގެ ތަހުގީގު ވެސް މިހާރު ދަނީ ހިންގަމުންނެވެ.
ޔޫއޭއީގެ އެޓާނީ ޖެނެރަލް ވިދާޅުވީ، މި ހާދިސާގެ ފަހަތުގައިވާ އަސްލު މަގުސަދާއި، އެހެން އެއްވެސް ޖަމާއަތަކާ އޭނާއާ ގުޅުން އޮތްތޯ ބެލުމަށްޓަކައި ސަރަހައްދީ ސެކިއުރިޓީ އިދާރާތަކާ ގުޅިގެން ފުޅާ ދާއިރާއެއްގައި ތަހުގީގު ކުރިއަށްދާ ކަމަށެވެ.