ދުބާއީން އިޒްރޭލަށް ދަތުރުކުރި ފްލައިދުބާއީގެ ބޯޓެއްގެ ކޯ-ޕައިލެޓް، ކޮކްޕިޓްގައި އޮންނަ އިމަޖެންސީ ކޯރާޑީން ކެޕްޓަނަށް ހަމަލާދީ ބޯޓުގެ ކޮންޓްރޯލް އަތުލަން އުޅުނީ ޓެރަރިސްޓް ހަމަލާއެއް ދިނުމުގެ ނިޔަތުގައި ކަމަށް ޔުނައިޓެޑް އަރަބް އެމިރޭޓްސް (ޔޫއޭއީ) ގެ ރަސްމީ އިދާރާތަކުން ބުނެފި އެވެ.
ޔޫއޭއީގެ އެޓާނީ ޖެނެރަލް ހަމަދް ސައިފް އަލް-ޝާމްސީއާ ހަވާލާދީ އެ ގައުމުގެ ރަސްމީ ނިއުސް އޭޖެންސީ، ވަމް، އިން ބުނީ، ދުބާއީން ތެލް އަވީވަށް ދަތުރުކުރި FZ1073 ފްލައިޓްގެ ކޯ-ޕައިލެޓް ވަނީ ބޯޓުގެ ކޮންޓްރޯލް އަތުލައި، ނުރައްކާތެރި ޓެރަރިސްޓް އަމަލެއް ހިންގަން މަސައްކަތްކޮށްފައިވާ ކަން ތަހުގީގަށް ކަށަވަރުވެފައިވާ ކަމަށެވެ. މި ހާދިސާގައި ކޯ-ޕައިލެޓް ވަނީ ކޮކްޕިޓްގައި އޮންނަ އިމަޖެންސީ ކޯރާޑި (ކްރޭޝް އެކްސް) ބޭނުންކޮށްގެން، ބޯޓުގެ ކެޕްޓަން އިންޑިއާގެ ސްމިތު މައްޗާރަށް ނުރައްކާތެރި ހަމަލާތަކެއް ދީފަ އެވެ. ނަމަވެސް، ޒަހަމްވި ކެޕްޓަން ވަނީ އެ ހާލުގައި ވެސް ކޮކްޕިޓްގެ ދޮރު ހުޅުވައިފަ އެވެ. އެއާ އެކު، ބޯޓުގައި ތިބި ފްލައިޓް ކުރޫއިންނާއި ދަތުރުވެރިން ކޮކްޕިޓަށް ވަދެ، ކޯ-ޕައިލެޓް ހިފަހައްޓައި އޭނާގެ ބާރު ކަނޑުވާލި އެވެ.
އިޒްރޭލުގެ ގިނަ ބަޔަކު ހިމެނޭހެން 182 ދަތުރުވެރިންނާއެކު ދަތުރުކުރި އެ ބޯޓު އޭގެ ފަހުން ވަނީ ކުއްލި ހާލަތުގައި ސައޫދީ އަރަބިއްޔާގެ ތަބޫކް އެއާޕޯޓަށް ޖައްސައިފަ އެވެ.
ތަހުގީގީ އިދާރާތަކުން ބުނި ގޮތުގައި، ކެޕްޓަނަށް ހަމަލާދިން ކޯ-ޕައިލެޓަކީ އުމާންގެ ރައްޔިތެއް ކަމަށްވާ ހަމާމް އަލް-ހައްމާމީ އެވެ. އޭނާއަކީ ހައްދުފަހަނައެޅި ފިކުރުތަކަށް ތާއީދުކުރާ މީހެއް ކަމަށް ބެލެވޭތީ އުމާންގެ އިދާރާތަކުން ކުރިން ވަނީ އޭނާއަށް ޕައިލެޓްކަން ދިނުން މަނާކޮށްފަ އެވެ. އެހެންވެ، ފްލައިދުބާއީއަށް އޭނާ ވަޒީފާއަށް ނެގި ގޮތުގެ ތަހުގީގު ވެސް މިހާރު ދަނީ ހިންގަމުންނެވެ.
ޔޫއޭއީގެ އެޓާނީ ޖެނެރަލް ވިދާޅުވީ، މި ހާދިސާގެ ފަހަތުގައިވާ އަސްލު މަގުސަދާއި، އެހެން އެއްވެސް ޖަމާއަތަކާ އޭނާއާ ގުޅުން އޮތްތޯ ބެލުމަށްޓަކައި ސަރަހައްދީ ސެކިއުރިޓީ އިދާރާތަކާ ގުޅިގެން ފުޅާ ދާއިރާއެއްގައި ތަހުގީގު ކުރިއަށްދާ ކަމަށެވެ. އަދި ތަހުގީގު ނިމުމުން އެންމެ ފަހުގެ މައުލޫމާތު އާންމުކުރާނެ ކަމަށް ވެސް އޭނާ ވިދާޅުވި އެވެ.