ކާތަކެއްޗަށް އޯޑަރުކުރުމަށް ފޭކް ސްލިޕް ފޮނުވަމުން ދިޔަ މީހަކު ހައްޔަރުކޮށް ބަންދަށް 15 ދުވަސް އިތުރުކޮށްފި އެވެ.
މަކަރާއި ހީލަތުގެ ތުހުމަތުކޮށް މި މައްސަލާގައި ހައްޔަރުކުރީ ގދ. ފަރެސްމާތޮޑާ، އިރަމާގޭ މުހައްމަދު ޖަދުއާން އެވެ. އުމުރުން 23 އަހަރުގެ ޖަދުއާންގެ ބަންދު އިތުރުކޮށް ކްރިމިނަލް ކޯޓުން އިއްޔެ ނެރުނު އަމުރުގައިވާ ގޮތުން ސައްހަ ނޫން ސްލިޕް ބޭނުންކޮށްގެން އޯޑަރުކުރި ކާތަކެއްޗާ ހަވާލުވީ ޖަދުއާނެވެ.
ކްރިމިނަލް ކޯޓުން ނެރުނު އަމުރުގައި ބުނީ އެ މައްސަލާގައި ތުހުމަތުކުރެވޭ އެކަށީގެންވާ މިންވަރަށް ހެކި ހުށަހަޅާފައިވާ ކަަމަށެވެ.
އަމުރުގައި ބުނެފައިވަނީ ކުށުގެ އަމަލުގައި އޭނާ ބައިވެރިވެފައިވާ ގޮތާއި އޭނާގެ ޖިނާއީ ކުށެއްގެ ތުހުމަތުގެ ރެކޯޑު އޮތުމުން ކުށް ތަކުރާރުކޮށްފާނެތީ އޭނާ ބަންދުގައި ބަހައްޓަން އަމުރުކުރީ ކަމަށެވެ.
ފޭކް ޓްރާންސްފާ ސްލިޕް ފޮނުވައިގެން ކާތަކެއްޗަށް އޯޑަރުކުރި މައްސަލަތަކެއްގައި މީގެ ކުރިން ވެސް މީހުން ހައްޔަރުކޮށްފައިވެ އެވެ.