މި އަހަރުގެ ލޯކަލް ކައުންސިލްތަކުގެ އިންތިޚާބުގެ ވޯޓުލުން ދެންމެ ފަށައިފި އެވެ.
ހެނދުނު 8:00 ގައި ވޯޓުލުން ފަށާފައިވާއިރު، މާލޭގައި ވޯޓުލުމަށްޓަކައި ގިނަ ބަޔަކު ވަރަށް ހެނދުނާ ނުކުމެފައިވާކަން ފާހަގަކުރެވެ އެވެ. ވޯޓުން ފެށިއިރު ވެސް، މާލޭގައި ބަހައްޓާފައިވާ ވޯޓުފޮށިތައް ކައިރީގައި ގިނަ ބަޔަކު ވަނީ ކިޔޫ ހަދައިފަ އެވެ.
އިލެކްޝަންސް ކޮމިޝަންގެ މެމްބަރު އަހްމަދު އަކްރަމް މިއަދު ވިދާޅުވީ މާލެ އާއި އަތޮޅުތަކުގައި ވޯޓުލުން ކުރިއަށް ގެންދަން އެ ކޮމިޝަނުން ވާންޖެހޭ ހުރިހާ ތައްޔާރީތަކެއް ނިމިފައިވާ ކަމަށެވެ. އިންތިހާބީ މަރުކަޒުތަކަށް އޮފިޝަލުން ހަމަކޮށް، ވޯޓު ކަރުދާސް ފޮނުވައި އިންތިޒާމްތައް ހަމަޖައްސާފައިވާ ކަމަށް އޭނާ ވިދާޅުވި އެވެ.
"އަޅުގަނޑުމެން ވާނީ ވަރަށް ބޮޑަށް އިންތިހާބުގެ ހުރިހާ ކަމަކަށް ތައްޔާރުވެފައި. އެހެންވީމަ އިލެކްޝަންސް ކޮމިޝަނުން މި ޔަގީންކުރަނީ އެއްވެސް މައްސަލައެއް ނެތި އިންތިހާބުގެ އިދާރީ ހުރިހާ ކަމެއް ކުރިއަށް ދާނެ ކަމަށް،" އަކްރަމް ވިދާޅުވި އެވެ.
އޭނާ ވިދާޅުވި ގޮތުގައި މި އިންތިހާބުގައި އެ ކޮމިޝަނުގެ 4،000 އޮފިޝަލުން ހަރަކާތްތެރިވަމުން އެބަދެ އެވެ.
އިންތިހާބުގެ ބައެއް މައުލޫމާތު
- ވޯޓުލުމުގެ ހައްގު ލިބިގެން ވަނީ 255،987 މީހުންނަށް. - ވޯޓުލާން 431،939 ވޯޓުކަރުދާސް ވަނީ ޗާޕްކޮށްފައި.
- އިންތިޚާބުގައި 422 ވޯޓުފޮށި ވަނީ ބަހައްޓާފައި.
- ވާދަކުރާ ކެންޑިޑޭޓުންގެ އަދަދަކީ 1،497
- ކެންޑިޑޭޓުންގެ މަންދޫބުންގެ ގޮތުގައި 1،146 މީހަކު ހަރަކާތްތެރިވާނެ.
- ބޭރުގެ ހަ ގައުމަކުން އިންތިހާބު އޮބްޒާވްކުރަމުން އަންނައިރު، ރާއްޖެ އިން 898 އޮބްޒާވަރުން ހަރަކާތްތެރިވާނެ.
- އިންތިޚާބުގައި 179 ރަށު ކައުންސިލަށް 563 ކައުންސިލަރުން އިންތިޚާބުކުރާނެ. - 18 އަތޮޅު ކައުންސިލަށް 67 ކައުންސިލަރުން ހޮވާނެ. - މާލެ އާއި އައްޑޫ އަދި ފުވައްމުލަކު ސިޓީ ކައުންސިލަށް 23 ކައުންސިލަރުން ހޮވާނެ. - އިންތިޚާބުގައި ހޮވަން ޖެހޭ ޖުމްލަ އަދަދަކީ 653 ކައުންސިލަރުން. ތަފާތު ސަބަބުތަކާ ހުރެ 13 ކެންޑިޑޭޓަކަށް ވަނީ އޮޓަމެޓިކުން ގޮނޑި ކަށަވަރުވެފައި.
- މި އިންތިޚާބު މިއަދު މި ބާއްވަނީ އެކި ސަބަބުތަކާ ހުރެ ތިން ފަހަރަށް ފަސްކުރުމަށް ފަހު އެވެ.