ދިއްދޫ ދާއިރާގެ މެމްބަރު އަބްދުއްލަތީފު މުހަންމަދު ޕީޕީއެމުން ވަކިވެއްޖެ އެވެ.
ޕީޕީއެމްގެ މުސްތަޝާރު އަދި ރައީސް އަބްދުﷲ ޔާމީނަށް ޖޫން 19 ގައި ލިއުއްވި ސިޓީގައި ލަތީފު ވިދާޅުވީ، ކުރިއަށް އޮތް ތަނުގައި ޕީޕީއެމްގެ ކޮންމެ ކޮންމެ ވިޕްލައިނަކާ އެއްގޮތަށް ވޯޓު ދެއްވުމަކީ އޭނާއަށް ކުރެއްވިދާނެ ކަމަކަށް ނުވާނެތީ، ޕީޕީއެމްގެ މެމްބަރު ކަމުން ވަކިވެވަޑައިގެންފައިވާ ކަމަށެވެ.
ޖޫން 19 ގެ ތާރީޚު އޮތް ނަމަވެސް، އެނގިފައިވާ ގޮތުގައި، އޭނާ ސިޓީ ފޮނުއްވީ އިއްޔެ އެވެ.
ސިޓީގައ ލަތީފު ވިދާޅުވި ގޮތުގައި އަމިއްލަ ގޮތުން ވާދަކުރައްވައިގެން ހޮވިވަޑައިގަތް ފަހުން ޕީޕީއެމްއާ ގުޅިވަޑައިގަތީ، ސަރުކާރާ ގުޅިގެން ގައުމަށާއި ދިއްދޫ ދާއިރާގެ ރައްޔިތުންނަށް ޚިދުމަތްތަކެއް ކުރެއްވުމުގެ އަޒުމާއި އުއްމީދުގަ އެވެ. އަދި ތަރައްގީ އާއި ކުރިއެރުމަށް ބޭނުންވެފައިވާ ދިވެހި ޒުވާނުންގެ ހުވަފެންތަކުގައި ހަގީގީ ކުލަ ޖައްސައިދޭން މަޖިލިހުގެ ތެރެއިންނާއި ބޭރުން މަސައްކަތްކުރެއްވުމުގެ ނިޔަތް ވެސް އޮތް ކަމަށް ވިދާޅުވި އެވެ.
ލަތީފު ވިދާޅުވީ ޕީޕީއެމް އިން އެންގި ގޮތަށް މަޖިލިހުގައި ވޯޓް ދެއްވައި، ޕީޕީއެމްގެ އެ ނިންމުންތައް ދިފާއުކުރައްވަން ޕޯޑިއަމްތަކާއި ޓީވީތަކުގައި ސާބިތުކަމާ އެކު ވާހަކަދައްކަވާފައިވާކަން ރައީސް ޔާމީނަށް އެނގިވަޑައިގަންނަވާނެކަން ގަބޫލުކުރައްވާ ކަމަށެވެ.
އެކަމަކު އޭނާ ވިދާޅުވި ގޮތުގައި ޕީީޕީއެމުން ރައްޔިތުންގެ މަޖިލިހުގައި ނިންމި ބައެއް ނިންމުންތަކަކީ ޒުވާނުންނާއި ރައްޔިތުންނަށް ހެވާއި ލާބައަށް ނިންމި ނިންމުންތަކެއް ނޫންކަން އިހުސާސްކުރެއްވެ އެވެ. އެ ނިންމުންތަކާއި ސަރުކާރުގެ ސިޔާސަތުތަކަށް ޕީޕީއެމްގެ އާންމު މެމްބަރުންގެ ވެސް މާ ބޮޑު ތާއީދެއް ނެތްކަން ކައުންސިލް އިންތިހާބުގެ ނަތީޖާ އިން ވަރަށް ސާފުކޮށް ފެނިއްޖެ ކަމަށް ވެސް، ލަތީފު ވިދާޅުވި އެވެ.
އޭނާ ވިދާޅުވި ގޮތުގައި މިހާރު އޭނާ ބޭނުންވަނީ ދިއްދޫ ޒުވާނުންނާއި ރައްޔިތުންގެ ހައްގުގައި ސާބިތުވެ ހުންނަވައިގެން މަސައްކަތް ކުރައްވާށެވެ. އެހެންކަމުން ޕީޕީއެމުން ވަކިވެވަޑައިގަތީ، ޕީޕީއެމުން ނެރޭ ކޮންމެ ވިޕްލައިނަކާ އެއްގޮތަށް ވޯޓު ނުދެއްވޭނެތީ ކަމަށް ސިޓީގައިވެ އެވެ.
ލަތީފަކީ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ހުށަހެޅި ލިސްޓުގައި ޕީޕީއެމުން ސޮއި ކުރެއްވި 10 މެމްބަރުންގެ ތެރެއިން އެއް މެމްބަރެވެ.