ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަދި ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން އަހުމަދު ފާރިސް މައުމޫން ހައްޔަރު ކުރުމަކީ ޑިމޮކްރަސީ އަށް އެޅޭ ހުރަހެއް ކަމަށް އެމެރިކާ އިން ރާއްޖެ އަށް ކަނޑައަޅާފައިވާ ސަފީރު އަތުލް ކެޝަޕް ވިދާޅުވެއްޖެ އެވެ.
މަޖިލީހުުގެ ރައީސް އަބްދުﷲ މަސީހުގެ އިތުބާރު ނެތްކަމަށް ހުށަހަޅާފައިވާ މައްސަލައާ ގުޅިގެން މަޖިލީހުގެ މެމްބަރުންނަށް ރިޝްވަތު ދިން ކަމަށް ބުނެ ފާރިސް ދިރިއުޅުއްވާ ގެ މިއަދު ފާސްކޮށް، އޭނާ ހައްޔަރު ކުރުމާ ގުޅިގެން ކެޝަޕް ކުރެއްވި ޓްވީޓެއްގައި ވަނީ ފާރިސް އާއި މަޖިލީހުގެ މެމްބަރުން ހައްޔަރު ކުރުމަކީ މަޖިލީހުގެ މަސައްކަތްތަކަށާއި ރާއްޖޭގެ ޑިމޮކްރަސީ އަށް އެޅޭނެ ވަރަށް ބޮޑު ހުރަހެއް ކަމަށެވެ.
މަސީހުގެ އިތުބާރު ނެތް ކަމަށް 45 މެމްބަރެއްގެ ސޮޔާ އެކު އިދިކޮޅު ކޯލިޝަނުން މަޖިލީހަށް ހުށަހަޅާފައިވާ މައްސަލާގައި މެމްބަރުންނަށް ފާރިސް ރިޝްވަތު ދިން ކަމުގެ ހެކި ހުރި ކަމަށް ފުލުހުން ކުރިން ވަނީ ބުނެފަ އެވެ. އެ މައްސަލާގައި ފާރިސް ހައްޔަރުކޮށް، މިހާރު ވަނީ ދޫނިދު އަށް ގެންގޮސްފަ އެވެ.
އެ މައްސަލާގައި ފާރިސް ހައްޔަރު ކުރިއިރު ޕީޕީއެމްގެ ދިދަ އާއި ލޯގޯ ގަވާއިދާ ޚިލާފަށް ބޭނުން ކުރި ކަމަށް ބުނެ ފާރިސަށް ވަނީ ޖިނާއީ ދައުވާ އުފުލައިފަ އެވެ. އެ މައްސަލައިގެ ޝަރީއަތް މިހާރު ވަނީ ފަށައިފަ އެވެ.