ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން އަނެއްކާވެސް ހައްޔަރު ކުރުމުން ،އެމެރިކާއިން ރާއްޖެ އަށް ކަނޑައަޅާފައި ހުންނަވާ ސަފީރު އަތުލް ކެޝަޕް މިއަދު ކަންބޮޑުވުން ފާޅު ކުރައްވައިފި އެވެ.
މަޖިލީހުގެ މެމްބަރަކަށް ރިޝްވަތު ހުށަހެޅި ކަމުގެ ތުހުމަތުގައި، ކުރީގެ ރައީސް މައުމޫން އަބްދުލް ގައްޔޫމްގެ ދަރިކަލުން ފާރިސް ހައްޔަރުކޮށް، ބަންދުގައި ހަ މަސް ހޭދަކުރި ފަހުން، މިދިޔަ ބުރާސްފަތި ދުވަހު ކްރިމިނަލް ކޯޓުން އޭނާ މިނިވަން ކޮށްފައި ވަނިކޮށް މިއަދު އަނެއްކާވެސް ފާރިސް ހައްޔަރުކުރީ އެހެން ތުހުމަތެއްގަ އެވެ. މިފަހަރު ތުހުމަތުކުރީ މަޖިލީހުގެ މެމްބަރުންތަކަކަށް ފައިސާ ބެހުމާއި މަޖިލީހުގެ މެމްބަރުންތަކަކާ ގުޅިގެން ސަރުކާރުން ވައްޓާލަން ރޭވުމެވެ.
އެކަމާ ކަންބޮޑުވުން ފާޅު ކުރައްވައި، ކެޝަޕް ކުރެއްވި ޓްވީޓެއްގައި ވަނީ، އައްޔަން ކުރިތާ ހަފުތާއެއް ނުވާ ފަނޑިޔާރަކު، ފަތިހު ހަތަރެއް ޖެހިއިރު އަމުރެއް ނެރެ، ހަ މަސް ފަހުން ދޫކޮށްލި މަޖިލީހުގެ މެމްބަރެއްގެ ގެ ފާސްކޮށް، އެ މެމްބަރު ހައްޔަރުކުރަން އަމުރު ނެރުމުން، ރާއްޖޭގެ ގާނޫނުގެ އުސޫލުތަކާއި ސިޔާސީ މިނިވަންކަން އޮތީ ނުރައްކަލުގައި އޮތްކަން އަންގައިދޭ ކަމަށެވެ.
ފާރިސް ދޫކޮށްލާފައި ވަނިކޮށް ފުލުހުން މިއަދު އޭނާ ހައްޔަރު ކުރުމުގެ ކުރިން އޭނާ ދިރިއުޅުއްވާ މ. ސްނޯރޯސް ވެސް ފުލުހުން ވަނީ ފާސްކޮށްފަ އެވެ. އަދި އޭނާގެ ބައްޕާފުޅު މައުމޫން ދިރިއުޅުއްވާ މ. އެންދެރިމާގެ ވެސް ފުލުހުން ވަނީ ބަލައި ފާސްކޮށްފަ އެވެ.
