ރައްޔިތުންގެ މަޖިލީހުގެ އިދާރާގައި އަނެއްކާ ވެސް ރޭ ފަތިހު އަލިފާނުގެ ހާދިސާއެއް ހިނގައިފި އެވެ.
އެމްއެންޑީއެފުން ބުނިގޮތުގައި މިފަހަރު ރޯވެފައި ވަނީ މަޖިލީހުގެ އިދާރާގެ ފުރަތަމަ ބުރީގައި ހަދާފައިވާ ވުޟޫކުރާ ތަނުގައި ހުރި ޑަސްބިނަކާއި ޓިޝޫ ފޮއްޓެއްގަ އެވެ.
ފަތިހު ހަތަރެއް ޖަހަން އުޅެނިކޮށް ހިނގި މި ހާދިސާގައި އެއްވެސް މީހަކަށް ގެއްލުމެއް ނުވެ އެވެ. އަދި އަލިފާނުގެ ހާދިސާ ފުލުހުން ތަހުގީގު ކުރަމުން އަންނަ ކަމަށް އެމްއެންޑީއެފުން ބުނެ އެވެ.
މަޖިލީހުގެ އިދާރާގެ ފާޚާނާއެއްގެ ތެރޭގައި ހުރި ޓީޝޫ އަޅާ އެއްޗެއްގައި ވެސް މިދިޔަ ޖުލައި 31 ވަނަ ދުވަހު ރޯވެފައިވެ އެވެ. އެ ފަހަރުގެ ހާދިސާއާ ގުޅިގެން މަޖިލީހުގެ ޖަލްސާތައް ދުވަސްކޮޅަކަށް މެދުކަނޑާލި އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހް މަގާމުން ވަކިކުރުމުގެ މައްސަލާގައި ސަރުކާރާއި އިދިކޮޅު މެމްބަރުންގެ މެދުގައި ހިޔާލު ތަފާތުވުން އުފެދި، މަޖިލީހުގެ ޖަލްސާތައް ކުރިއަށް ގެންދަން ދަތިވެފައިވާ ދަނޑިވަޅުގައި ކުރިން ހިނގި އަލިފާނުގެ ހާދިސާއާ ގުޅިގެން، މަޖިލީހުގެ ނައިބު ރައީސް މޫސާ މަނިކު ޕީއެސްއެމް އަށް ދެއްވި އިންޓަވިއުއެއްގައި ވިދާޅުވެފައި ވަނީ އެކަން ހިނގާފައި ވަނީ ސުވާލު އުފެދޭ ގޮތަކަށް ކަަމަށެވެ.
ނަމަވެސް މިފަދަ ދެވަނަ އަލިފާނުގެ ހާދިސާއެއް ގާތްގަނޑަކަށް ދެ މަސް ފަހުން މަޖިލީހުގެ އިދާރާގައި ރޭ ހިނގިއިރު، ސަލާމަތީ ގޮތުން ކަންކަން ވަރުގަދަ ކުރި ގޮތެއް އަދި ކުރީގެ ހާދިސާގެ ތަހުގީގަށް ވީ ގޮތެއް ފުލުހުން ވެސް އަދި މަޖިލީހުގެ އިދާރާ އިން ވެސް އާންމެއް ނުކުރެ އެވެ.
މި ފަހަރުގެ އަލިފާނުގެ ހާދިސާ ހިނގިއިރު މަޖިލީހުގެ މެމްބަރުން ތިއްބެވީ އެއްމަސް ދުވަހުގެ ޗުއްޓީއެއްގަ އެވެ. ދެން ޖަލްސާތައް ފަށާނީ އަންނަ މަހު އެވެ.
މަޖިލީހުގެ އިދާރާގެ ސަލާމަތީ ކަންކަން 24 ގަޑިއިރު ބަލަހައްޓަނީ ގާނޫނުއަސާސީގައިވާ ގޮތުން އެމްއެންޑީއެފުންނެވެ.