މާލޭން ބޭރަށް ނުދިޔުމަށް ޝަރުތުކޮށް ޒައިދު ދޫކޮށްލައިފި

ޒައިދު (މ) އޭނާގެ އަންހެނުންނާއި ވަކީލު (ކ) އަދި ޕީޕީއެމްގެ ރައީސް މައުމޫން އަބްދުގައްޔޫމު ފެކްޝަންގެ ސެކެޓަރީ ޖެނެރަލް އަބްދުލްއަލީމްއާ އެކު-- ފޮޓޯ/ ފޭސްބުކް

އާމިނަތު ޝިފްލީން، މިހާރު

26 ސެޕްޓެމްބަރ 2017 - 16:01

1 comments

ފަނޑިޔާރަކު ބްލެކްމެއިލް ކުރުމުގެ ތުހުމަތުގައި ދައުވާ އުފުލާފައިވާ މާލޭ ސިޓީ ކައުންސިލްގެ ކުރީގެ މެމްބަރު ޒައިދުލް އަމީން، މާލޭން ބޭރަށް ނުދިޔުމަށް ޝަރުތުކޮށް ކްރިމިނަލް ކޯޓުން އޭނާ މިއަދު ދޫކޮށްލައިފި އެވެ.

ކްރިމިނަލް ކޯޓުން އޭނާ ދޫކޮށްލީ ޝަރުތުތަކަކާ އެކު 30 ދުވަހުގެ މުއްދަތަށެވެ.

މިދިޔަ ޖެނުއަރީ މަހު ހައްޔަރު ކުރިި ޒައިދު، މާލޭ ބަންދަށް ދޫކޮށްލީ މިދިޔަ މެއި މަހުން ފެށިގެން ގޭ ބަންދުގައި ބެހެއްޓުމަށް ފަހު އެވެ. ޒައިދު ދޫކޮށްލީ، އޭނާގެ ވަކީލު ހިމެނޭ ގޮތަށް، ގިނަ އަދަދެއްގެ ވަކީލުން ސަސްޕެންޑްކޮށްފައިވުމުން ޝަރީއަތް ދިގުލައިގެން ދާތީ ކަންބޮޑުވުން ފާޅުކޮށް ކްރިމިނަލް ކޯޓަށް ހުށަހެޅި ސިޓީއަކާ ގުޅިގެން މިއަދު ކޯޓަށް ހާޒިރުކުރުމަށް ފަހު އެވެ.

ޒައިދުގެ މައްޗަށް ތިން ދައުވާއެއް ދައުލަތުން ކުރެ އެވެ. އެއީ ހުއްދަ ނޫން ގޮތުގައި މައުލޫމާތު ހާމަކުރަން އުޅުމުގެ ދައުވާ އާއި ހުއްދަ ނޫން ގޮތުގައި މައުލޫމާތު ހޯދުމުގެ ދައުވާ އާއި ގާނޫނީ ބާރު ހިންގަން ދަތި ކުރުމުގެ ދައުވާ އެވެ.

އޭނާގެ މައްޗަށް ކުރާ ދައުވާގެ ޝަރީއަތްތައް އަދިވެސް ނުނިމެ އެވެ.

ކުރީގެ ރައީސް މައުމޫން އަބްދުލްގައްޔޫމާ ގާތް ގުޅުމެއް އޮންނަ ޒައިދު ޝަރީއަތް ނިމެންދެން ޖަލު ބަންދަށް ބަދަލު ކުރަން އަމުރުކުރީ އޭނާ ގޭ ބަންދުގައި ދުވަސްތަކެއް ވަންދެން ބެހެއްޓުމަށް ފަހު އެވެ.