މާފުށީ ޖަލުގައި ހުކުމް ތަންފީޒު ކުރަމުން ދިޔަ އަބްދުﷲ ރަޝީދުގެ މަރުގައި މޯލްޑިވްސް ކަރެކްޝަނަލް ސާވިސްގެ ޑޮކްޓަރުގެ އިހުމާލެއްވޭތޯ މޯލްޑިވްސް މެޑިކަލް ކައުންސިލުން ބަލަން ފަށައިފި އެވެ.
މީގެ ދެ އަހަރު ކުރިން، 2015 ގެ މެއި 1 ގައި ސަރުކާރާ ދެކޮޅަށް އިދިކޮޅު ފަރާތްތަކުން ކުރި މުޒާހަރާގައި ހިންގި ހަމަނުޖެހުންތަކާ ގުޅިގެން ފަސް އަހަރަށް ޖަލަށް ލާފައިވާ އަބްދުﷲ 51، މަރުވީ އެތެރެހަށީގެ ބައްޔަކަށް އައިޖީއެމްއެޗުގައި ފަރުވާ ދެމުން އަންނަނިކޮށް މިދިޔަ ހަފުތާގެ ހޯމަ ދުވަހު އެވެ. އޭނާ މާލެ ގެނައީ ވެސް، ފަރުވާ ނުދެވި ލަސްވުމުގެ ސަބަބުން، ހާލު ވަރަށް ސީރިއަސް ވުމުންނެވެ.
އަބްދުﷲގެ ފަރުވާގައި ޑޮކްޓަރު އިހުމާލުވެފައިވޭތޯ ބަލައިދޭން މެޑިކަލް ކައުންސިލަށް ހުށަހެޅީ މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އިންނެވެ.
މެޑިކަލް ކައުންސިލްގެ ރައީސް ޑރ. އަބްދުﷲ އަފީފް މިއަދު ވިދާޅުވީ އެ މައްސަލަ އެމްޑީއެން އިން ހުށަހެޅީ އެ ކައުންސިލުން އިސް ނަގައިގެން ބަލަން އުޅެނިކޮށް ކަމަށެވެ. ބޭސްފަރުވާ ކުރުމުގައި އިހުމާލެއް ވޭތޯ މެޑިކަލް ކައުންސިލުން ބަލާނެ ކަމަށް އޭނާ ވިދާޅުވި އެވެ.
އަބްދުﷲގެ މަރުގެ މައްސަލަ މެޑިކަލް ކައުންސިލްގެ އިތުރުން ހިއުމަން ރައިޓްސް ކޮމިޝަން (އެޗްއާރުސީއެމް) އާއި ނެޝަނަލް އިންޓެގްރިޓީ ކޮމިޝަން (އެންއައިސީ) އަށް ވެސް ވަނީ ހުށަހަޅައިފަ އެވެ.
މާފުށީ ޖަލުގައި ހުކުމް ތަންފީޒުކުރާ ގައިދީއަކު އާއްމުކޮށްފައިވާ ވާހަކަތަކުން އެނގޭ ގޮތުގައި އަބްދުﷲ ހޮޑުލައި ބޭރަށް ހިންގަން ފެށީ މި މަހު 9 ވީ ބުރާސްފަތި ދުވަހު އެވެ. ހާލު ސީރިއަސްވެގެން އެރޭ އޭނާ އަށް އައިވީއެއް ގުޅި ކަމަށް ވެ އެވެ.
ގައިދީ ކިޔައިދީފައިވާ ގޮތުގައި އަބްދުﷲ ހޮޑުލާއިރާއި ބޮޑުކަމުދާއިރު ލޭ އަންނަން ފެށީ ހުކުރު ދުވަހު އެވެ. ތަކުރާރުކޮށް ލޭ ބޭރުވާން ފެށުމުން، ގޮޅީގައި ތިބި ގައިދީން ޖަލުގެ ގާޑުންނާއި އެ ވަގުތު ޖަލު ބެލެހެއްޓުމާ ހަވާލުވެ ހުރި އޮފިސަރަށް އެކަން އެންގި ކަމަށް ވެ އެވެ. އަދި ފާޚާނާގެ ތެރޭގައި ލޭ ހުއްޓައި ޖަލުގެ އޮފިސަރުންނަށް ފެނުނު ކަމަށް ވެސް މެސެޖުގައިވެ އެވެ. ގައިދީ ކިޔައިދިން ގޮތުގައި އެވަގުތު އަބްދުﷲ އަށް ކޮންމެވެސް ބޭސްތަކެއް ވެސް ދިނެވެ. އެކަމަކު އެ ބޭހުން އަބްދުﷲ އަށް ލުޔެއް ނުލިބި ހާލަތު ދަށްވަމުން ދާތީ، ގައިދީން ވާހަކަ ދެއްކުމަށް ފަހު ނިންމީ ގޮޅިތެރެ ހަލަބޮލިކޮށްލުމަށެވެ. އެ ގޮތަށް އަމަލު ކުރަން ނިންމީ، ގައިދީ ބުނެފައިވާ ގޮތުގައި، އަބްދުﷲ އަށް ފަރުވާ އަށް މާލެ ފޮނުވާނެ އިތުރު ގޮތެއް އެ މީހުންނަށް ނުފެނުމުންނެވެ.
