ޖަލުގައި ހުކުމް ތަންފީޒުކުރަމުން ދިޔަ އަބްދުﷲ ރަޝީދުގެ މަރާ ގުޅޭ ސީރިއަސް ތުހުމަތުތަކެއް ކުރަމުން ދަނިކޮށް އެކަމަށް ބާރު ލިބޭ ވާހަކަތަކެއް އޭނާއާ އެކު ޖަލުގައި ހުރި ގައިދީއެއްގެ ފަރާތުން ހާމަވެއްޖެ އެވެ.
މީގެ ދެ އަހަރު ކުރިން، 2015 ގެ މެއި 1 ގައި ސަރުކާރާ ދެކޮޅަށް ކުރި މުޒާހަރާގައި ހިންގި ހަމަނުޖެހުންތަކާ ގުޅިގެން ފަސް އަހަރަށް ޖަލަށް ލާފައިވާ އަބްދުﷲ، 51، މަރުވީ އެތެރެހަށީގެ ބައްޔަކަށް އައިޖީއެމްއެޗުގައި ފަރުވާ ދެމުން އަންނަނިކޮށް މިދިޔަ ހޯމަ ދުވަހެވެ. އޭނާ މާލެ ގެނައީ ވެސް، ފަރުވާ ނުދެވި ލަސްވުމުގެ ސަބަބުން، ހާލު ވަރަށް ސީރިއަސްވުމުންނެވެ.
މާފުށީ ޖަލުގައި ހުރި ގައިދީއަކު އެހެން މީހަކަށް ފޮނުވި މެސެޖެއްގައި ބުނީ އަބްދުﷲ މަރުވީ ޖަލު ގޮޅީގައި ވޭންތަކެއް ތަހައްމަލްކުރަމުން ގޮސް ކަމަށެވެ. އޭނާއަށް އެކަށީގެންވާ ފަރުވާ ދިނުމުގައި ކަރެކްޝަނަލް ސާވިސް އިން އިހުމާލުވެފައިވާ ކަމަށް، އަަބްދުﷲގެ ހާލަތަށް އަންނަމުން ދިޔަ ބަދަލުތަކުން އެނގޭ ކަމަށް ވެސް ގައިދީ ބުނެ އެވެ.
އެކަމަކު އަބްދުﷲގެ މަރާ ގުޅިގެން ކުރާ ތުހުމަތުތައް ކަރެކްޝަނުން ދޮގުކުރެ އެވެ. އަދި އަބްދުﷲގެ މަރުގެ މައްސަލަ ކަމާ ބެހޭ އިދާރާތަކުން ތަހުގީގުކުރާ ނަމަ، އެއްބާރުލުން ދޭނެ ކަމަށް ވެސް އެތަނުން ބުންޏެވެ.
ގައިދީ ފޮނުވި މެސެޖުގައި ބުނެފައިވާ ގޮތުގައި، ހޯމަ އާއި ބުރާސްފަތިދުވަހު ގަވާއިދުން ސުންނަތް ރޯދަ ހިފަމުން އައި އަބްދުﷲ ކޮބައިތޯ ބަލަން އޭނާ ދިޔައީ، މި މަހު 9 ވީ ބުރާސްފަތި ދުވަހު ރޯދަ ވީއްލި ވަގުތު އެތަނުން އޭނާ ނުފެނުމުންނެވެ. ގޮޅިން އަބްދުﷲއާ ދިމާވިއިރު އޭނާ އޮތީ ވަރަށް ބޮޑަށް ވަރުދެރަވެފައި ކަމަށާއި ވާހަކަ ވެސް ދެއްކެނީ ވަރަށް އުނދަގުލުން ކަމަށް ބުންޏެވެ.
"ކިހިނެއްވީހޭ އެހީމަ ބުނީ، މި އުޅެނީ ބޮޑުކަމު ދެވޭތީއޭ. މިއަދު 10 ފަހަރަށް ބޮޑުކަމު ދެވިއްޖެއޭ. އަހަރެން ބުނިން އޯއާރުއެސް [ލޮނު ޕެކެޓް] ގެނެސްދެންހޭ. އޭނާއާ އެކުގައި ތިބި އެހެން ގައިދީން ދެއްކި ލޮނު ފުޅިއެއް އެތަނުގައި ހުއްޓައި،" މެސެޖުގައި ވެ އެވެ.
ކާނެ އެއްޗެއް ހޯދައިދޭންހޭ އެހުމުން، އެކަމަށް އިންކާރުކޮށް އަބްދުﷲ ބުނި ކަމަށް ވަނީ ފަހުން ނޫޑްލްސްކޮޅެއް ކާލާނީ ކަމަށެވެ.
އަބްދުﷲގެ ހާލު ސީރިއަސްކަމުން އެރޭ ގޮޅިން ބޭރަށް ނެރެ އައިވީ ގުޅިކަމަށްވެ އެވެ. އައިވީ ގުޅިކަމުގެ ނިޝާންތައް އޭނާގެ އަތުން ފެނުނު ކަމަށް ވެސް ގައިދީގެ މެސެޖުގައި ބުނެފައިވެ އެވެ.
ގައިދީ ކިޔައިދީފައިވާ ގޮތުގައި އަބްދުﷲ ހޮޑުލާއިރާއި ބޮޑުކަމުދާއިރު ލޭ އަންނަން ފެށީ ހުކުރު ދުވަހު އެވެ. ތަކުރާރުކޮށް ލޭ ބޭރުވާން ފެށުމުން، ގޮޅީގައި ތިބި ގައިދީން ޖަލުގެ ގާޑުންނާއި އެ ވަގުތު ޖަލު ބެލެހެއްޓުމާ ހަވާލުވެ ހުރި އޮފިސަރަށް އެކަން އެންގި ކަމަށްވެ އެވެ. އަދި ފާހާނާ ތެރޭގައި ލޭ ހުއްޓައި ޖަލުގެ އޮފިސަރުންނަށް ފެނުނު ކަމަށް ވެސް މެސެޖުގައިވެ އެވެ.
ގައިދީ ކިޔައިދިން ގޮތުގައި އެވަގުތު އަބްދުﷲ އަށް ކޮންމެވެސް ބޭސްތަކެއް ވެސް ދިނެވެ. އެކަމަކު އެ ބޭހުން އަބްދުﷲ އަށް ލުޔެއް ނުލިބި ހާލަތު ދަށްވަމުން ދާތީ، ގައިދީން ވާހަކަ ދެއްކުމަށް ފަހު ނިންމީ ގޮޅިތެރެ ހަލަބޮލިކޮށްލާށެވެ. އެ ގޮތަށް އަމަލްކުރަން ނިންމީ، ގައިދީ ބުނެފައިވާ ގޮތުގައި، އަބްދުﷲ އަށް ފަރުވާ އަށް މާލެ ފޮނުވާނެ އިތުރު ގޮތެއް އެ މީހުންނަށް ނުފެނުމުންނެވެ.
"ގާތްގަނޑަކަށް އެ ދުވަހު [ހުކުރު ދުވަހު]ގެ ހަވީރު 4:30 ހާއިރު އަހަރެމެން ހަޅޭއްލަވަން ފެށީ، ހޭނެތިއްޖެއޭ، މަރުވަނީއޭ، ތަކުރާރުކޮށް ގޮވަން ފެށުމުން އައިސް ނެރުނީ،" މެސެޖުގައިވެ އެވެ.
އެ ފަހަރު ވެސް ބޭސްގުޅައެއް ދީފައި އަބްދުﷲ އަލުން ގޮޅިއަށް ވެއްދީ އެވެ. އެކަމަކު އެރޭ ވެސް އަނބުރައިގަނެގެން އަބްދުﷲ ފާހާނާތެރެއަށް ވެއްޓުނު ކަމަށް މެސެޖުގައި ބުނ އެވެ.
ބޭރަށް ހިންގުމާއި ހޮޑުލުމުގައި ދެ ދުވަސް ހޭދަވެ އަބްދުﷲގެ ހާލު އިންތިހާ އަށް ސީރިއަސްވުމުން އޭނާ މާލެ ގެނައީ ހޮނިހިރު ދުވަހެވެ. އޭނާ މާލެ ގެންދިޔަކަން އަންހެނުންނާއި ރައްޔިތުންގެ މަޖިލީހުގެ ދެ މެމްބަރަކަށް އެންގީ ވެސް ގޮޅީގައި ތިބި ގައިދީން ކަމަށް އެ މެސެޖުގައިވެ އެވެ. އަބްދުﷲގެ އަތުގައި އެ ނަންބަރުތައް ހުރި ކަމަށް ގައިދީ ބުނެ އެވެ.
ހޮނިހިރު ދުވަހު މާލެ ގެނެސް އައިޖީއެމްއެޗުގައި އެޑްމިޓްކޮށްގެން ފަރުވާ ދެނިކޮށް އޭނާ މަރުވީ އާދީއްތަ ދުވަހެވެ. އައިޖީއެމްއެޗަށް ގެނައިއިރު، އިންފެކްޝަންގެ ސަބަބުން އަބްދުﷲގެ ދެ ކިޑްނީ އާއި ފުއްޕާމޭ ވެސް ވަނީ ހަލާކުވެފައި ކަމަށް އާއިލާ އިން ވަނީ ބުނެފަ އެވެ.
މެސެޖްގައި ވާ ގޮތުން، އަބްދުﷲ އޮތް ގޮޅި، އާދީއްތަދުވަހާއި ހޯމަދުވަހު ކުއްލި ގޮތަކަށް ބަލައި ފާސްކުރި އެވެ. އޮފިސަރުން ގޮޅިއަށް ވަދެ ހޯދީ ފޯނުތަކެއް ކަމަށް ވެ އެވެ.
"ފަހުން އެނގުނީ ގޮޅި ރެއިޑްކުރީ އަބްދުﷲގެ މަރާ ގުޅިގެން ކަން،" ގައިދީގެ މެސެޖުގައިވެ އެވެ.
