ގިނަ އަދަދެއްގެ ނަރުހުން ހޯދުމަށް ހެލްތު މިނިސްޓްރީން އިއުލާންކޮށްފި އެވެ.
އެމިނިސްްޓްރީން މިދިޔަ ބުރާސްފަތި ދުވަހު ކޮށްފައިވާ އިއުލާނެއްގައި ބުނެފައި ވަނީ އެ މިނިސްޓްރީގެ ދަށުން ހިންގާ ސިއްޚީ ހިދުމަތް ދޭ ތަންތަނަށް ދާއިމީ 631 ނަރުހުން ހޯދަން ބޭނުންވާ ކަމަށެވެ.
އެ މަގާމަށް ހޮވޭ މީހަކަށް މުސާރައިގެ ގޮތުގައި 5،610ރ. އަދި ސާވިސް އެލަވަންސަށް 2،500ރ. ދޭނެ ކަމަށް ހެލްތުން ބުންޏެވެ.
ނަރުހުންގެ މަގާމަށް އެދޭ މީހުން މި މަހުގެ 15 ގެ ކުރިން، އެ ވަޒީފާ އަށް އެދޭ ހޮސްޕިޓަލަކަށް ނުވަތަ މަރުކަޒަކަށް ހުށަހެޅުމަށް އިއުލާނުގައި ވެ އެވެ.
ގިނަ އަދަދެއްގެ ނަރުހުން ހޯދުމަށް އިއުލާން ކޮށްފައިވާއިރު އެކި ދާއިރާތަކުން 160 ސްޕެޝަލިސްޓު ޑޮކްޓަރުން ހޯދަން ވެސް ވަނީ އިއުލާންކޮށްފަ އެވެ.
އެޑިއުކޭޝަން މިނިސްޓަރު ޑރ. އާއިޝަތު ޝިހާމް ދާދި ފަހުން ވިދާޅުވެފައި ވަނީ 500 ނަރުހުން ތަމްރީނު ކުރުމަށް ހުޅުވާލުމުން 600 އަށް ވުރެ ގިނަ މީހުން ކުރިމަތިލާފައިވާ ކަމަށެވެ.
އައިޖީއެމްއެޗުގެ 25 ބުރީގެ އާ އިމާރާތާ އެކު ރާއްޖޭގެ ސިއްޚީ ދާއިރާ އިތުރު ހަރުފަތަކަށް ބަދަލުވާއިރު، ދިވެހި ޑޮކްޓަރުންނާއި ނަރުހުންނަށް އިސްކަން ދޭނެ ކަމަށް ވެސް ސަރުކާރުން ވަނީ ބުނެފަ އެވެ.