ރައީސް އަބްދުﷲ ޔާމީންގެ އިހްސާންތެރިކަމުގެ އަގު އަދާކުރަން ގޮވަމުންދާއިރު ހުވަދު އަތޮޅުގެ ރައްޔިތުންނަށް މި ސަރުކާރުން ދެނީ ނިކަމެތިކަން ކަމަށް ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު މިރޭ ވިދާޅުވެއްޖެ އެވެ.
އިދިކޮޅު ޕާޓީތަކުން ގދ. ތިނަދޫގައި ބޭއްވި ޖަލްސާގައި ޝާހިދުގެ ވާހަކަ އަމާޒުކުރެއްވީ، މި ޖަލްސާއަށް ނުދާން ތިނަދޫގެ ރައްޔިތުންނަށް ގޮވާލައްވައި ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހްމަދު ނިހާން ދެއްކެވި ވާހަކައަށެވެ. އޭނާ ވިދާޅުވެފައި ވަނީ، ރައީސް ޔާމީން ތިނަދޫގެ ރައްޔިތުންނަށް ހާއްސަ ގާތްކަމެއް ބަހައްޓަވައިގެން، ވެދެއްވި އިހްސާންތެރި ކަމުގެ އަގު އަދާކުރަން ޖެހޭ ކަމަށެވެ.
ޝާހިދު ވިދާޅުވީ "ޗާބޫކު" ހިފައިގެން ތިބެ، އިހްސާންތެރިކަމުގެ ބަދަލުދޭން އެދެމުން އަންނަނީ ހުވަދު އަތޮޅުގެ ރައްޔިތުންނަށް ނިކަމެތި ހާލު ޖެއްސުމަށް ފަހު ކަމަށެވެ. މި ސަރުކާރު އައި ފަހުން، އެތައް ދަތިތަކެއް ހުވަދޫގެ ރައްޔިތުންނަށް ކުރިމަތިކޮށްފައިވާ ކަމަށް އޭނާ ވިދާޅުވި އެވެ.
ހުވަދު އަތޮޅުގެ ރައްޔިތުން އާމްދަނީ ހޯދަނީ މަސްވެރިކަމުން ކަން ފާހަގަކުރައްވައި ޝާހިދު ވިދާޅުވީ މަސްވެރިން ބާނާ މަހުން ވެސް ބޮޑު ބައެއް މިހާރު ނުކިރުވޭ ކަމަށެވެ. ސަރުކާރުގެ އިހްސާންތެރި ކަމަކީ މިއީތޯ އޭނާ ސުވާލު އުފެއްދެވި އެވެ.
"އަޅުގަނޑުމެންގެ މި ކަނޑު އޮޅިތަކުގައި ލޭނު އަޅަމުން ދުއްވަނީ. މަސްވެރިންގެ ހީވާގިކަމާ އެކުގައި ގޮސް އަތުލައިގަނެގެން ގެނައިމާ ވެސް އެއް ބަޔަކު ބުނަނީ ނޫނެކޭ ތިއީ ހުއްދަ ދީފައި އޮތް އެއްޗެކޭ. އަނެއް ބަޔަކު ބުނަނީ ނޫނެކޭ ދޮގެކޭ، ހުއްދައެއް ދީފައެއް ނުވެއޭ. އިހްސާންތެރިކަން މިއޮތީ، އަޅުގަނޑުމެންގެ ކަނޑުތައް މި ވިއްކާލަނީ،" ދާދި ފަހުން ރާއްޖޭގެ ސަރަހައްދަށް ވަދެ އުޅެނިކޮށް އަތުލައިގަތް ބޭރުގެ މަސްބޯޓުތަކުގެ މައްސަލައަށް އަމާޒުކުރައްވާ ޝާހިދު ވިދާޅުވި އެވެ.
ބޯހިޔާވަހިކަމަށް ބަލާއިރު ވެސް ހުވަދޫ ރައްޔިތުންނަށް އޮތީ ހިތްދަތިކަން ކަމަށް އޭނާ ވިދާޅުވި އެވެ.
ހުވަދު އަށް ބޯހިޔާވަހިކަން ހަމަނުޖައްސައި މާލެ އަށް ދިރިއުޅުން ބަދަލުކުރަން ދައުވަތު ދެއްވަނީ، ޝާހިދު ވިދާޅުވި ގޮތުގައި، ސަރުކާރުގެ އިހްސާންތެރިކަމަކުން ނޫނެވެ. އެ ދައުވަތަކީ، ހުވަދު އަތޮޅު ފަޅުކޮށްލުމުގެ ދައުވަތު ކަމަށް ވިދާޅުވެ އެ ދައުވަތު ގަބޫލުނުކުރަން ޝާހިދު އެދިވަޑައިގަތެވެ.
"މަޖިލީހުގެ ރައީސަކަށް އަޅުގަނޑު ހުރިއިރު މި ހުވަދު އަތޮޅަށް ދޮޅުހާސް ހައުސިން ޔުނިޓް އަޅަން ފާސްކުރި. އޭގެ ތެރެއިން 750 ޔުނިޓް، އެ ވިދާޅުވާ އިހްސާންތެރި ސަރުކާރުން ދަމައިގަނެގެން ގެންދިޔައީ،" ޝާހިދު ވިދާޅުވި އެވެ.
އޭނާ ވިދާޅުވީ ރާއްޖޭގެ އިސްލާހީ މަސައްކަތުގައި ހުވަދު އަތޮޅަކީ ވަރަށް ވަރުގަދަ ކިއްލާއެއް ކަމަށެވެ. ހުވަދު އަތޮޅުގައި ތިބީ ސަރުކާރުން ދައްކާ ބިރަށް ފަހަތަށް ޖެހޭނެ ބައެއް ނޫން ކަން މިރޭގެ ސާފުވެފައިވާ ކަމަށް ޝާހިދު ވިދާޅުވި އެވެ.
