ރައްޔިތުންގެ މަޖިލީހުގައި ތިއްބަވާ ގދ. ތިނަދޫ ދާއިރާގެ ދެ މެމްބަރުންގެ ގޮނޑި ނުގެއްލޭ ކަމަށް ބުނެ އެ ރަށުގައި ހަރުކޮށްފައިވާ ޕޯސްޓަރުތަކެއް ފުލުހުން މިއަދު ނަގަން ފަށައިފި އެވެ.
ތިނަދޫ އުތުރު ދާއިރާގެ ސައުދުﷲ ހިލްމީ އާއި ތިނަދޫ ދެކުނު ދާއިރާގެ އަބްދުﷲ އަހްމަދު (އަބުޅޯ) ގެ ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ކަނޑައަޅާފައިވާއިރު، ތިނަދޫ ފަސް ސަރަހައްދެއްގައި ހަރުކޮށްފައިވާ ޕޯސްޓަރުތަކުގައި ވަނީ އެ ބޭފުޅުންގެ ގޮނޑި ނުގެއްލޭ ކަމަށް ބުނެފަ އެވެ. އެ ޕޯސްޓަރުތަކުގައި ވަނީ ސައުދުﷲ އާއި އަބުޅޯގެ ގޮނޑި ނުގެއްލޭ ކަމަށް ބާރު ލިބޭ ގޮތަށް ހުރި، ގާނޫނުއަސާސީގެ މާއްދާތައް ލިޔެފަ އެވެ.
މި މައްސަލާގައި ސައުދުﷲ މިއަދު ވިދާޅުވީ ކޯޓް އަމުރެއްގެ ދަށުން ފުލުހުން ޕޯސްޓަރުތައް ނެގުމުގެ މަސައްކަތް ކުރަމުންދާ ކަމަށެވެ.
ގދ. ރަތަފަންދޫ މެޖިސްޓްރޭޓް ކޯޓުން މިއަދު ނެރެފައިވާ އަމުރުގައި ބުނެފައި ވަނީ ކޯޓުތަކުގެ ހައިބަތު ގެއްލުވާލައި ކޯޓުތަކާ މެދު ނުބައި ތަސައްވުރެއް ދިނުމަށް އަދި ގާނޫނާއި މުއައްސަސާތައް ހިންގުމަށް ހުރަަސްއެޅުމުގެ މަގްސަދުގައި ހަރުކޮށްފައިވާ ތަކެތި ހޯދައި ހިފެހެއްޓުމަށެވެ. އަމުރުގައިވާ ގޮތުން މިއީ ތިނަދޫ ޕޮލިސް ސްޓޭޝަނުން ބަލަމުން އަންނަ މައްސަލައެކެވެ.
އިދިކޮޅު ފަރާތްތަކުން ތިނަދޫގައި މާދަމާ ރޭ ޖަލްސާއެއް ބޭއްވުމަށް ތައްޔާރުވެފައި ވަނިކޮށް، ކުއްލި ގޮތަކަށް ޕޯސްޓަރުތައް ނަގަން ފެށުމާ ގުޅޭ ގޮތުން ފުލުހުންގެ ބަހެއް އަދިއެއް ނުލިބެ އެވެ.
އިދިކޮޅު ހަރަކާތުގެ ބޮޑު ޖަލްސާއެއް ތިނަދޫގައި މާދަމާ ރޭ ބާއްވާއިރު، ވެރިކަން ކުރާ ޕާޓީ ޕީޕީއެމްގެ އިސް ވަފުދެއް ވެސް ވަނީ މިއަދު އެ ރަށަށް ދާ ގޮތަށް ވަނީ ނިންމައިފަ އެވެ.
