ސިޔާސީ އެކި ކުށްތަކުގައި ޖަލު ހުކުމުގައި ތިބި މީހުންނާއި ހައްޔަރުކޮށްފައި ތިބި މީހުން ދޫކޮށްލަން ސުޕްރީމް ކޯޓުން ރޭ ނެރުނު އަމުރު ތަންފީޒުކުރަން ހުރި ކަންބޮޑުވުންތައް އުއްތަމަ ފަނޑިޔާރު އަބްދުﷲ ސައީދަށް ހުށަހަޅަން ނިންމާފައިވާ ކަމަށް ސަރުކާރުން މިއަދު ބުނެފި އެވެ.
ސިޔާސީ ނުތަނަވަސްކަން އުފެދިފައިވާ، މުހިއްމު ތިން މައްސަލައެއްގައި ސުޕްރީމް ކޯޓުން ރޭ ވަނީ ދައުލަތުގެ ހުރިހާ މުއައްސަސާތަކަށް އަމުރެއް ނެރެފަ އެވެ. އެއީ، ސިޔާސީ ލީޑަރުން ދޫކޮށްލުމާއި ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ނިންމި ނިންމުން ބާތިލް ކަމަށް ކަނޑައެޅުމުގެ އިތުރުން ޕާޓީ ބަދަލުކުރިޔަސް ގޮނޑި ނުގެއްލޭނެ ކަމަށް ނިންމި ނިންމުމެވެ.
މި ހުކުމް ތަންފީޒު ނުކޮށްގެން ބައިނަލްއަގުވާމީ ފަރާތްތަކުން ވެސް ސަރުކާރަށް ޕްރެޝަރުކުރަމުން ދަނިކޮށް، ދައުލަތުގެ މީޑިއާ، ޕީއެސްއެމް މެދުވެރިކޮށް ކެބިނެޓުގެ މިނިސްޓަރުންތަކެއް ވަނީ ސަރުކާރުގެ މެސެޖް ރައްޔިތުންނަށް ފޯރުކޮށްދެއްވައިފަ އެވެ. ރައީސް އޮފީހުގައި ބަންޑާރަ ނައިބު މުހައްމަދު އަނިލް އާއި ރައީސް އޮފީހުގެ ލީގަލް އެފެއާޒް މިނިސްޓަރު އާޒިމާ ޝަކޫރު އަދި ހޯމް މިނިސްޓަރު އަހްމަދު އަޒްލީން ތިއްބަވައިގެން ވިދާޅުވީ، ސުޕްރީމް ކޯޓުގެ ހުކުމް ތަންފީޒުކުރުމުގެ މަސައްކަތް ކަމާ ބެހޭ އިދާރާތަކުން ކުރަމުން އަންނަ ކަމަށެވެ.
ވަގުތުން ފިޔަވަޅު އަޅަން ދައުލަތުގެ މައްޗަށް އަމުރުކޮށްފައި ވަނީ ބަންދުގައި ތިބި ސިޔާސީ ފަރާތްތައް ދޫކޮށްލަން ކަން ފާހަގަކުރައްވައި ވިދާޅުވީ އެ ކަމުގައި ދައުލަތުގެ ކަންބޮޑުވުންތަކެއް އެބަހުރި ކަމަށެވެ. އެ މައްސަލާގައި އުއްތަމަ ފަނޑިޔާރާ މަޝްވަރާ ކުރައްވާފައިވާ ކަމަށް އަނިލް ވިދާޅުވި އެވެ.
"މި މައްސަލާގައި އަޅުގަނޑުމެންގެ ހުރި ގާނޫނީ ކަންބޮޑުވުންތައް ފާހަގަކޮށް ވާނީ ދަންނަވާފައި. އޭގެތެރޭގައި ބޮޑެތި ކުށްތަކެއް އޭގެ ތެރޭގައި ޓެރަރިޒަމް، މީހުން މެރުން، ކޮރަޕްޝަން، އެމްބަޒެލްމެންޓް، ހިޔާނާތް، މިފަދަ އެތައް ކުށްތަކެއްގެ ތުހުމަތު ކުރެވޭ ބަޔަކު ތިބީމަ މިހާރުން މިހާރަށް ދޫކޮށްލަން ޖެހޭ ނަމަ، އަދި ހިނގަމުންދާ ތަހުގީގުތަކާއި ޝަރީއަތުގެ އެކި މަރުހަލާގައި ހިނގަމުންދާ ކަންތައްތަކެއް ހުރީމަ އެ ތަފްސީލުތަކާ ގުޅޭގޮތުން ކަންބޮޑުވުންތައް ހިއްސާކުރަން އަޅުގަނޑުމެން ބޭނުންވީ،" އަނިލް ވިދާޅުވި އެވެ.
އޭނާ ވިދާޅުވި ގޮތުގައި އުއްތަމަ ފަނޑިޔާރާއެކު ކުރެވުނު މަޝްވަރާތަކުގައި، ގާނޫނުގެ ނިޒާމްގެ ތެރެއިން އެކަންކަން ކުރަން ވަނީ އިރުޝާދު ދެއްވައިފަ އެވެ.
"މިގޮތުން ޕްރޮސިކިއުޓާ ޖެނެރަލް އެ މަސައްކަތް ފައްޓަވައި ލިސްޓުގައި ހިމެނޭ މީހުންގެ މައްސަލަތައް ދިރާސާކުރައްވައި އަދި ވަރަށް އަވަސް ފުރުސަތެއްގައި ފުލުހުންނާ އެކު މި މަސައްކަތް ކުރުމަށް ފަހު ގާނޫނީ ކަންބޮޑުވުންތައް އަދި ކުރިއަށް ގެންދަން ފެންނަ ގޮތްތަކާ އެކީގައި ސުޕްރީމް ކޯޓަށް ހުށަހަޅުއްވައިދެއްވާނެ،" އަނިލް ވިދާޅުވި އެވެ.
ޕީޖީ ހުށަހަޅާ ކަންކަމަށް ރިއާޔަތްކޮށް ސުޕްރީމް ކޯޓުން ގޮތްތަކެއް ކަނޑައަޅައި ދޭނެ ކަމަށް އުއްމީދުކުރައްވާ ކަމަށް ވެސް ވިދާޅުވި އެވެ.
ގާނޫނުއަސާސީގައި ބުނާގޮތުން، އެންމެ މަތީ މަރުހަލާ ކަމަށްވާ ސުޕްރީމް ކޯޓުން ހުކުމެއް އިއްވުމުން ދައުލަތުން ތަންފީޒުކުރަން ޖެހެ އެވެ. ސުޕްރީމް ކޯޓުގެ އަމުރާ އެއްގޮތަށް އަމަލުކުރަން ދައުލަތުގެ ހުރިހާ މުއައްސަސާއަކަށް އަމުރުކޮށްފައި ވަނިކޮށް، އެކަން ތަންފީޒުނުކުރުމަކީ، އަމުރަށް ތަބާނުވުން ކަމަށް ބުނެ އިދިކޮޅު ފަރާތްތަކުން ދަނީ ސަރުކާރަށް ފާޑުކިޔަމުންނެވެ.
