ކޯޓުގެ އަމުރާ އެއްގޮތަށް އަމަލުކުރަން އެމެރިކާ އިން ގޮވާލައިފި

އެކިއެކި ކުށްތަކުގައި ހުކުމް ތަންފީޒު ކުރައްވަމުން ގެންދަވާ ސިޔާސީ އިދިކޮޅު ބޭފުޅުން ދޫކޮށްލުމަށް ސުޕްރީމް ކޯޓުން ނެރުނު އަމުރާ އެއްގޮތަށް، ރައީސް އަބްދުﷲ ޔާމީނާއި ސަލާމަތީ ބާރުތަކުން ފުރިހަމައަށް އަމަލުކުރަން އެމެރިކާއިން ރާއްޖެ އަށް މިރޭ ގޮވާލައިފި އެވެ.

އެ ގައުމުގެ ސްޓޭޓް ޑިޕާޓްމެންޓުން ނެރުނު ބަޔާނެއްގައި ބުނީ، ސިޔާސީ ބޭފުޅުން ދޫކޮށްލުމަށާއި ރައްޔިތުންގެ މަޖިލީހުގެ މެމްބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން ނިންމި ނިންމުމަށް އެމެރިކާއިން މަރުހަބާ ކިޔާ ކަމަށެވެ.

ދިވެހިންނަށް ލިބިފައިވާ ހިޔާލު ފާޅުކުރުމުގެ މިނިވަންކަމަށް ފުރިހަމައަށް ތާއީދުކުރާ ކަމަށާއި އަދި އެ އަސާސީ މިނިވަންކަން ނަގައި ދެމެހެއްޓުމަށް ވެސް އެމެރިކާއިން ވަނީ ދިވެހި ސަރުކާރަށް ގޮވާލައިފަ އެވެ.

ސުޕްރީމް ކޯޓުން އިއްޔެ ރޭ ނެރުނު އަމުރުގައި ވަނީ ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އަދާލަތު ޕާޓީގެ ރައީސް އިމްރާން އަބްދުﷲ އާއި ކުރީގެ ޑިފެންސް މިނިސްޓަރު މުހައްމަދު ނާޒިމާއި ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ކުރީގެ ނައިބު ރައީސް އަހުމަދު އަދީބާއި ކުރީގެ ޕްރޮސިކިއުޓާ ޖެނެރަލް މުހުތާޒު މުހުސިނާއި އދ. މާމިގިލީ ކޯޓުގެ އިސް މެޖިސްްޓްރޭޓް އަހުމަދު ނިހާންގެ އިތުރުން ވިޔަފާރިވެރިޔާ ހާމިދު އިސްމާއިލް (ހާމިދު ސޭޓް) މިނިވަން ކުރަން ސުޕްރީމް ކޯޓުގެ ފަސް ފަނޑިޔާރުން ރޭ ނެރުނު އަމުރުގައި ސަރުކާރަށް ވަނީ އަންގައިފަ އެވެ.

ސިޔާސީ ބޭފުޅުން ދޫކޮށްލުމަށް ސުޕްރީމް ކޯޓުން އަމުރު ނެރުނުތާ 24 ގަޑިއިރު ވެގެން ދިޔަ އިރު ވެސް އެ އަމުރު ތަންފީޒު ނުކުރާތީ ސަރުކާރަށް ދަނީ ބޮޑެތި ފާޑުކިޔުންތަކެއް އަމާޒުވަމުންނެވެ.

އެ ކަންކަމަށް ރައްދު ދެމުން ޕްރޮސެކިއުޓާ ޖެނެރަލް އޮފީހުން ބުނީ، އަމުރު ތަންފީޒު ކުރުމަށްޓަކައި ކުރަންޖެހޭ މަސައްކަތްތައް ކުރަމުން އަންނަ ކަމަށާއި އަދި އެ އަމުރާ ގުޅިގެން ސުޕްރީމް ކޯޓަށް ހުށަހަޅަން ޖެހޭ ކަންކަން ހުށަހެޅުމަށް ތައްޔާރުވަމުންދާ ކަމަށެވެ.