ރާއްޖޭގެ ސިޔާސީ މަސްރަހުގައި މިހާރު ހިނގަމުންދާ ކަންތައްތަކާ ގުޅޭގޮތުން، އެމެރިކާއިން ރާއްޖެ ކަނޑައަޅާފައި ހުންނަވާ ސަފީރު އަތުލް ކެޝަޕް ވަރުގަދަ ސުވާލުތަކެއް މިއަދު ކުރައްވައިފި އެވެ.
އެކިއެކި ކުށްތަކުގައި ހުކުމް ތަންފީޒު ކުރައްވަމުން ގެންދަވާ ސިޔާސީ އިދިކޮޅު ބޭފުޅުން ދޫކޮށްލުމަށް ސުޕްރީމް ކޯޓުން މިދިޔަ ބުރާސްފަތި ދުވަހުގެ ރޭ ނެރުނު ކުއްލި އަމުރާއެކު، ރާއްޖޭގެ ސިޔާސީ މަންޒަރު ވަނީ އެއްކޮށް ބަދަލުވެފަ އެވެ. މި ދައުރުގެ މަޖިލީސް ފެށުމަށް މާދަމާއަށް ތާވަލުކުރި ޖަލްސާ ކެންސަލްކުރި އިރު، އަމުރު ތަންފީޒުކުރަން ގޮވާލައި ބޭއްވި ހަރަކާތްތަކުގައި މެމްބަރުންނާ ދިމާއަށް ޕެޕާ ސްޕްރޭ ޖަހަނީ ކީއްވެގެންތޯ ކެޝަޕް ވަނީ ސުވާލުކުރައްވައިފަ އެވެ.
އޭނާ ކުރެއްވި ޓްވީޓެއްގައި ވަނީ މާދަމާ މަޖިލީހުގެ ބައްދަލުވުން ނުބޭއްވޭ ވަރަށް ސަލާމަތީ ގޮތުން ކުރިމަތިވެފައިވަނީ ކޮން ކަހަލަ ގެއްލުންތަކެއްތޯ އާއި ސުޕްރީމް ކޯޓުގެ އަމުރު ތަންފީޒުކުރާނީ ކޮން އިރަކުތޯ ވެސް އައްސަވައިފަ އެވެ.
"ރާއްޖޭގެ ރައްޔިތުންގެ މަޖިލީހުގެ ބައްދަލުވުން މާދަމާ ނުބޭއްވޭ ވަރަށް ސަލާމަތީ ގޮތުން ކުރިމަތިވެފައި ވަނީ ކޮން ކަހަލަ ނުރައްކަލެއް ހެއްޔެވެ؟ މަގުމަތީގައި މަޖިލީހުގެ މެމްބަރުންނާ ދިމާ އަށް ޕެޕާ ސްޕްރޭ ޖަހައި ރާއްޖެ އަންނަ ތަނުން ހައްޔަރުކުރަނީ ކީއްވެގެން؟ ސަރުކާރާއި ފުލުހުންނާއި ސިފައިން، ސުޕްރީމް ކޯޓުގެ އަމުރު ތަންފީޒުކުރާނީ ކޮން އިރަކުން؟ އަދި ޖަލަށް ލާފައިވާ، މަޖިލީހުގެ މެމްބަރުން ދޫކޮށްލުމާއި ސަސްޕެންޑްކުރި މެމްބަރުންގެ ހައްގުތައް އަނބުރައި ދޭނީ ކޮން އިރަކުން؟" ކެޝަޕްގެ ޓްވީޓުގައި ވެ އެވެ.
ގިނަ ދުވަސްތަކަކަށް ފަހު ރާއްޖެ ވަޑައިގެންތަނާ، ދަނގެތީ ދާއިރާގެ މެމްބަރު އިލްހާމް އަހުމަދާއި މައްޗަންގޮޅީ ދެކުނު ދާއިރާގެ މެމްބަރު އަބްުދުﷲ ސިނާން މިއަދު ވަނީ އެއާޕޯޓުން ހައްޔަރުކޮށްފަ އެވެ. އެ ދެ ބޭފުޅުން ހައްޔަރުކުރީ، ދިއްގަރު ދާއިރާގެ މެމްބަރު ފާރިސް މައުމޫންގެ މައްޗަށް ކުރާ ރިޝްވަތުގެ ތުހުމަތުގެ މައްސަލައާ ގުޅިގެންނެވެ.
ސަފީރު ކުރެއްވި އެހެން ޓްވީޓެއްގައި ބުނެފައި ވަނީ ރާއްޖެ ޓީވީ ބަންދުކުރަން ސަރުކާރު ހިންގާ ޕީޕީއެމުން ގޮވައިލުމުން އެކަމާ ވެސް ކަންބޮޑުވުން ފާޅުކޮށްފަ އެވެ. އޭނާ ވިދާޅުވީ ރާއްޖޭގައި މިނިވަން ނޫސްވެރިކަމެއް އޮތް ކަމަށާއި ނަމަވެސް ގާނޫނީ ހުރަސްތަކާ ހެދި އެ މިނިވަންކަން މުޅިން ގެއްލިފައިވާ ކަމަށް ވިދާޅުވި އެވެ.
ސުޕްރީމް ކޯޓުން ސަރުކާރަށް އަމުރުކޮށްފައި ވަނީ، ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހީމާއި އަދާލަތު ޕާޓީގެ ރައީސް އިމްރާން އަބްދުﷲ އާއި ކުރީގެ ޑިފެންސް މިނިސްޓަރު މުހައްމަދު ނާޒިމާއި ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ކުރީގެ ނައިބު ރައީސް އަހުމަދު އަދީބާއި ކުރީގެ ޕްރޮސިކިއުޓާ ޖެނެރަލް މުހުތާޒު މުހުސިނާއި އދ. މާމިގިލީ ކޯޓުގެ އިސް މެޖިސްްޓްރޭޓް އަހުމަދު ނިހާންގެ އިތުރުން ވިޔަފާރިވެރިޔާ ހާމިދު އިސްމާއިލް (ހާމިދު ސޭޓް) މިނިވަން ކުރުމަށެވެ. އެ އަމުރުގައި، ދައުލަތުގެ ހުރިހާ ފަރާތަކުން ވެސް ވަގުތުން އަމަލުކުރަން އަންގާފައި ވިޔަސް ސަރުކާރުން އެއިން އެއްވެސް ބޭފުޅަކު އަދި މިނިވަނެއް ނުކުރެ އެވެ.
