އުއްތަމަ ފަނޑިޔާރާ ގުޅޭ ގޮތެއް ނުވި: އޭޖީ އަނިލް

ސުޕްރީމް ކޯޓުގެ އަމުރާ ގުޅިގެން ޕީޖީގެ ފަރާތުން ހުށަހަޅަން އުޅުނު ކަންބޮޑުވުންތައް ހުށަހެޅޭ ގޮތް ނުވުމުން މިއަދު އުއްތަމަ ފަނޑިޔާރު އަބްދުﷲ ސައީދަށް ގުޅުއްވޭތޯ ވަރަށް ގިނަ މަސައްކަތްތަކެއް ކުރެއްވި ކަމަށާއި މިހާތަނަށް ކާމިޔާބުވެފައި ނުވާ ކަމަށް ބަންޑާރަ ނައިބު މުހައްމަދު އަނިލް މިރޭ ވިދާޅުވެއްޖެ އެވެ.

ޓީވީއެމްގައި ވާހަކަދައްކަވަމުން އަނިލް ވިދާޅުވީ ސުޕްރީމް ކޯޓުގެ އަމުރާ ގުޅިގެން ސަރުކާރާއި ކަމާ ބެހޭ އިދާރާތަކުން އެކަން ތަންފީޒު ކުރުމަށް ބުރަ މަސައްކަތްތަކެއް ކުރަމުން އަންނަ ކަމަށެވެ. އަދި އަމުރުގައި ހުރި ބައެއް ކަންކަން ތަންފީޒު ކުރުމުގައި ދިމާވެފައި ހުރި ބައެއް ގޮންޖެހުންތައް ހައްލުކުރަން ސުޕްރީމް ކޯޓާ އިއްޔެ މަޝްވަރާ ކުރެއްވުނު ކަމަށް ވިދާޅުވި އެވެ.

"[މިއަދު] އަޅުގަނޑު އުއްތަމަ ފަނޑިޔާރާ ގުޅޭތޯ ގިނަ ގޮތްގޮތަށް މަސައްކަތް ވަނީ ކުރެވިފައި. އެކަން އަދި ކާމިޔާބުވާ ގޮތެއް ނުވޭ،" އަނިލް ވިދާޅުވި އެވެ.

އޭނާ ވިދާޅުވި ގޮތުގައި ޕީޖީން މަސައްކަތްކޮށްގެން ލިޔެކިޔުންތައް ކޯޓަށް ހުށަހެޅޭ ގޮތް ނުވުމުން، އިލެކްޓްރޯނިކް ނިޒާމުން ސުޕްރީމް ކޯޓަށް ވަނީ ހުށަހަޅާފަ އެވެ.

ސުޕްރީމް ކޯޓުގެ އަމުރު ވީހާ ވެސް އަވަހަކަށް ތަންފީޒު ކުރުމަށް، ދައުލަތުގެ ކަމާ ބެހޭ މުއައްސަސާތަކުން ކުރާ މަސައްކަތުގައި ސުޕްރީމް ކޯޓުން އިރުޝާދު ދިނުން ކުޑަކޮށް ލަސްވަމުންދާތީ، އަނިލް ވަނީ ރައްޔިތުން ކެތްތެރިކަމާ އެކު ތިބުމަށް އެދިވަޑައިގެންފަ އެވެ.

ސުޕްރީމް ކޯޓުން މިދިޔަ ބުރާސްފަތި ދުވަހުގެ ރޭ ތިން ކަމެއްގައި އަމުރު ނެރުނެވެ. އޭގެ ތެރެއިން އެންމެ ބޮޑު އެއް ކަމަކީ ހައްޔަރުގައި ތިބި ސިޔާސީ ބޭފުޅުން ވަގުތުން މިނިވަންކުރުމެވެ. އޭގެ އިތުރުން ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ނިންމާފައިވާ 12 މެމްބަރުންގެ ގޮނޑި ނުގެއްލޭ ކަމަށް ކަނޑައެޅުން ވެސް ހިމެނެ އެވެ. އަދި ޕާޓީ ބަދަލުކުރުމުން ގޮނޑި ގެއްލޭނެ ކަމަށް ކަނޑައެޅި ކަނޑައެޅުން ވެސް މިހާރު ވަނީ ބާތިލްކޮށްފަ އެވެ.