ސުޕްރީމް ކޯޓުން މި މަހުގެ 1 ވަނަ ދުވަހު ނެރުނު އަމުރު ފުރިހަމައަށް ތަންފީޒުކޮށް ކުއްލި ނުރައްކަލުގެ ހާލަތު އުވާލަން އިންޑިއާއިން މިއަދު ރާއްޖެއަށް ގޮވާލައިފި އެވެ.
ސިޔާސީ ބައެއް ބޭފުޅުން ހިމެނޭ ގޮތުން، ބަންދުގައި ތިބި ނުވަ މީހަކު މިނިވަންކުރުމަށާއި ގޮނޑި ގެއްލިފައިވާ ކަމަށް ކަނޑައަޅާފައިވާ މެންބަރުންގެ ގޮނޑި ނުގެއްލޭ ކަމަށް ކަނޑައަޅައި ސުޕްރީމް ކޯޓުން ކުރި އަމުރު ތަންފީޒު ނުކޮށް ސަރުކާރުން ވަނީ ކުއްލި ނުރައްކަލުގެ ހާލަތު އިއުލާނުކޮށް އުއްތަމަ ފަނޑިޔާރާއި، ފަނޑިޔާރު އަލީ ހަމީދު ހައްޔަރުކޮށްފަ އެވެ. އަދި ކޯޓުގެ އަމުރުން ބައެއް ބާތިލްކޮށް ބައެއް ބައިތަކަށް އަމަލުކުރުން ފަސްކުރުމަށް، ކޯޓުގައި ދެން ތިއްބެވި ތިން ފަނޑިޔާރުން ވަނީ އަމުރު ނެރުއްވައިފަ އެވެ.
މި އަމުރާ ގުޅިގެން ހިންގި ކުއްލި ނުރައްކަލުގެ ހާލަތު މިއަދު ހަމަވާއިރު ސަރުކާރުން ވަނީ އިތުރު 30 ދުވަހަށް ކުއްލި ނުރައްކަލުގެ މުއްދަތު އިތުރު ކުރުމަށް ރައްޔިތުންގެ މަޖިލީހަށް ހުށަހަޅައިފަ އެވެ. އެކަމާ ގުޅިގެން އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނުގައި ބުނީ ކުއްލި ނުރައްކަލުގެ ހާލަތުގެ މުއްދަތު އިތުރު ނުކުރާނެ ކަމަށް އިންޑިއާއިން އުންމީދުކުރާ ކަމަށެވެ.
"ކުއްލި ނުރައްކަލުގެ ހާލަތު އުވާލައި ޖުޑީޝަރީ އާއި މުއައްސަސާތައް، ގާނޫނު އަސާސީގައިވާ ގޮތަށް މިނިވަންކަމާ އެކު މަސައްކަތް ކުރުމަށް ފުރުސަތު ދޭންޖެހޭނެ އެވެ. އަދި ފެބްރުއަރީ 1 ގައި ސުޕްރީމް ކޯޓުން ނެރުނު އަމުރު އޭގައި ބުނާ އެންމެ ފުރިހަމަ ގޮތުގައި ތަންފީޒުކުރަންޖެހޭނެ އެވެ." ބަޔާނުގައި ބުނެފައިވެ އެވެ.
އެ ބަޔާނުގައި ބުނީ ދިވެހި ރައްޔިތުންނާއި ބައިނަލްއަގުވާމީ މުޖުތަމައުގެ ކަންބޮޑުވުންތަކަށް އިޖާބަދީ ޑިމޮކްރަސީގެ ހަމަތަކަށް ދިވެހި ސަރުކާރުން ރުޖޫއަވުން މުހިންމު ކަމަށެވެ.
