އެކި ތުހުމަތުތަކުގައި ބަންދުގައި ތިބި ސިޔާސީ ބޭފުޅުން ވަރަށް އަވަހަށް މިނިވަންވެ، ގައުމު ސަލާމަތްވާނެ ކަމަށް ކުރީގެ ރައީސް މައުމޫން އަބްދުލްގައްޔޫމްގެ އަނބިކަނބަލުން ނަސްރީނާ އިބްރާހިމް މިއަދު ވިދާޅުވެއްޖެ އެވެ. މިއީ، މައުމޫންގެ ދިގު 30 އަހަރުގެ ވެރިކަމާއި އޭގެ ފަހުން ވެސް ނަސްރީނާ މީޑިއާއާ ވާހަކަ ދެއްކެވި ފުރަތަމަ ފަހަރެވެ.
ކޮއްކޯފުޅު، ރައީސް އަބްދުﷲ ޔާމީންގެ ސަރުކާރު ވައްޓާލަން އުޅުމާއި ރިޝްވަތުގެ ތުހުމަތުގައި މިދިޔަ މަހުގެ ފަސް ވަނަ ދުވަހު ހައްޔަރުކުރި މައުމޫންގެ ބަންދުގެ މުއްދަތު އިތުރުކުރަން ކޯޓަށް ގެނައިއިރު، ކްރިމިނަލް ކޯޓު ކައިރީގައި އަނބިކަނބަލުން ނަސްރީނާ ހުންނެވި އެވެ. އެކަމަނާގެ އަރިހުގައި، ދެ ދަރިކަނބަލުން ދުންޔާ އާއި ޔުމްނާ ތިއްބެވި އެވެ. މީގެއިތުރުން، އެއްބަނޑު އެއްބަފާ ބޭބެ، އައްބާސް އިބްރާހީމާއި އަނބިކަނބަލުން ވެސް ހުންނެވި އެވެ.
ނަސްރީނާ މިހާތަނަށް، ސިޔާސީ އެއްވެސް ވާހަކައެއް ދައްކަވާފައި ނުވާއިރު، ސިޔާސީ އެއްވެސް ހަރަކާތަކުން ވެސް އެކަމަނާއެއް ނުފެނެ އެވެ. މައުމޫން ވެރިކަމުގައި މުޅިން ވެސް އުޅުއްވީ އިޖުތިމާއީ އެކި ކަންކަމުގަ އެވެ.
ލޯކަލް މާރުކޭޓުގެ ތެރޭގައި ނަސްރީނާ ހުންނެވިއިރު، އަރިހުގައި އާއިލާ އާއި ގާތް ބޭފުޅުން ތިބީ، މައުމޫން މިނިވަންކުރަން ގޮވާލާފައިވާ ޕޯސްޓަރުތައް ހިފައިގެންނެވެ.
ބަންދުގެ މުއްދަތު ޖަހަން، މައުމޫން ކޯޓަށް ވެއްދި ފަހުން، ނޫސްވެރިންނާ ވާހަކަ ދައްކަވަމުން ނަސްރީނާ ވިދާޅުވީ އިންސާނުން ކަންކަން ރޭވިޔަސް، އެކަންކަން ތަގުދީރުކުރުން އޮތީ އެހެން ފަރާތެއްގެ އަތްމަތީގައި ކަމަށެވެ. އެހެން ވިދާޅުވެ ހައްގަށް ނަސްރު ދެއްވާނެ ކަމަށް ތަކުރާރުކޮށް ވިދާޅުވި އެވެ.
ފިރިކަލުންނާއި ދަރިކަލުން އަހްމަދު ފާރިސްގެ އިތުރުން ދަނބިދަރިކަލުން މުހައްމަދު ނަދީމް ބަންދުކޮށްފައިވާ ހާލަތަށް އިޝާރާތް ކުރައްވައި، ވަރަށް ސާބިތުކަމާ އެކު ވާހަކަ ދައްކަވަމުން ނަސްރީނާ ވިދާޅުވީ ކޮންމެ ބޭފުޅަކު ވެސް ހުންނެވީ "ސިރާތުލް މުސްތަގީމް"ގައި ތޯ ޔަގީން ކުރަން ޖެހޭ ކަމަށެވެ.
"މީހާ ދަތުރުކުރާ މަގަކީ ވަރަށް މުހިންމު އެއްޗެއް. އެ މީހާ އެހެރީ ހައްގުގެ މަގުގައި ކަމަށް ވަންޏާ އުފަލުގައި ހުންނާނެ. އިރާދަކުރެއްވިއްޔާ، އަޅުގަނޑުމެން ނަސްރާ ހަމައަށް ދާނެ. ވަރަށް އަވަހަށް ވެސް ކާމިޔާބު ވާނެ،" ދިގު 30 އަހަރު ރާއްޖޭގައި ވެރިކަން ކުރެއްވި ރައީސް މައުމޫންގެ އަނބިކަނބަލުން ދެއްވި ކުރު މެސެޖުގައި ވިދާޅުވި އެވެ.
އާއިލާގެ ގިނަ ބޭފުޅުންތަކެއް ހައްޔަރުކުރުމާ ގުޅޭގޮތުން ނަސްރީނާ ދެކެވަޑައިގަންނަވާ ގޮތެއް ސާފުުކުރަން ސުވާލު ކުރަން އުޅުމުން، އެކަމަނާ ވިދާޅުވީ، ނޫސްވެެރިންގެ ސުވާލުތަކަށް ޖަވާބު ދެއްވެން ނެތް ކަމަށެވެ.
މައުމޫނާއި ފާރިސްގެ އިތުރުން ނަދީމް، ބަންދުކުރި ފަހުން، ނަސްރީނާ ވަނީ އެކި ފަހަރު މަތިން ދޫނިދު އަށް ވަޑައިގެން އެ ބޭފުޅުންނާ ބައްދަލުކުރައްވައިފަ އެވެ. އަދި ފާރިސަށް އުފުލާފައިވާ ރިޝްވަތުގެ ދައުވާގެ އަޑު އެހުމަށް މައުމޫންއާ އެކު ނަސްރީނާ ކްރިމިނަލް ކޯޓަށް ވެސް ވެންނެވި އެވެ.