ހުޅުމާލޭގައި އިމާރާތް ކުރަމުން އަންނަ 7،000 ފްލެޓް ކެޓަގަރީތަކަކަށް ބަހާލި ގޮތުން އެއިން އެއްވެސް ކެޓަގަރީއެއްގައި ލައްވާނުލުމުން އެތައް ބައެއްގެ އުންމީދުތައް ފެނަށް ވެއްޖެ އެވެ.
ހައުސިން މިނިސްޓްރީން ބުނެފައިވާ ގޮތުގައި، ރައީސް އަބްދުﷲ ޔާމީންގެ ނިންމެވުމަކީ، މި ސަރުކާރުން ހުޅުމާލޭގައި އަޅާ ފްލެޓް އެކި ކެޓަގަރީތަކަށް ޚާއްސަކުރުމެވެ. އެގޮތުން، 7،000 ފްލެޓް 11 ކެޓަގަރީ އަށް ވަނީ ބަހާލައިފަ އެވެ.
އެއީ، ސިވިލް ސާވަންޓުންނާއި ކައިވެނި ކޮށްގެން އުޅޭ 18-40 ދެމެދުގެ މީހުންނާއި މާލޭގެ ރަށްވެހިންނާއި ދަފްތަރުގައި ރަޖިސްޓްރީވެފައިވާ މީހުންނާއި ޑޮކްޓަރުންނާއި ނަރުހުންނާއި ޓީޗަރުންނާއި ފުލުހުންނާއި ސިފައިންނާއި އެކަނިވެރި މައިންނާއި ބަފައިންނާއި ނުކުޅެދޭ އާއިލާތަކާއި ގުޅިފަޅާއި ޓާޓާ އިން ފްލެޓް ނުލިބުނު މީހުންގެ އިތުރުން މާފަންނުު ހުޅަނގު ދާއިރާގައި ދަތި ހާލުގައި ދިރިއުޅޭ އާއިލާތަކެވެ.
އެކަމަކު ފްލެޓަށް ފޯމު ލައިގެން ފްލެޓްގެ އިންތިޒާރުގައި އެތައް އަހަރެއް ވަންދެން ތިބި އެތައް ބަޔަކު މިއިން އެއްވެސް ކެޓަގަރީގައި ލައްވައެއް ނުލަ އެވެ.
ފްލެޓްތައް ބަހާލި ގޮތާ މެދު ހިތްހަމަނުޖެހުން ފާޅުކުރި މީހުންގެ އެންމެ ބޮޑު އެއް ޝަކުވާ އަކީ ފްލެޓް ދޭން ވަކި އުމުރުފުރައެއް ވެސް ކަނޑައަޅާފައިވުމެވެ. ކައިވެނިކޮށްގެން އުޅޭ 18-40 ދެމެދުގެ މީހުންނަށް 1،000 ފްލެޓް ދޭން ނިންމިއިރު، 40 އަށް ވުރެ މަތީގެ މީހުންނަށް މި މަޝްރޫއުން ފުރުސަތު ގެއްލުވާލާފައިވާ ކަމުގެ ނުރުހުން އެއް ބަޔަކު ފާޅުކުރި އެވެ.
"ދެމަފިރިންގެ އުމުރުން 40 އަށް ވުރެ މަތިވެއްޖެ ނަމަ ފްލެޓެއް ނުލިބޭ. އެއީ ހެޔޮ، ދަރިންނާ އެކު ކިތަންމެ ހާލެއްގައި އުޅުނަސް. މިއީ ބައެއްގެ ހައްގު ގެއްލުވާލުން ނޫންތޯ؟" ފްލެޓް ބެހި ގޮތުން އެކަކު ޝަކުވާ ކުރި އެވެ.
"ކޮބައިތޯ ހަމަހަމަކަން؟"
ފްލެޓް ދޭނެ ވަކި އުމުރުފުރައެއް ކަނޑައެޅުމަކީ، އެއް ބަޔަކު ދެކޭ ގޮތުގައި ވަރަށް ބޭއިންސާފު ކަމެކެވެ. ވަކި ވަރަކަށް ވުރެ އުމުރު މަތިވެއްޖެ ނަމަ ބޯހިޔާވަހިކަމުން މަހްރޫމްވުމަކީ، ބަލައިގަނެވޭނެ އުސޫލެއް ނޫން ކަމަށް ވެސް އެ މީހުން ދެކެ އެވެ.
"ވަކި އުމުރަކުން ފެށިގެން ފްލެޓް ނުލިބޭ ގޮތް ހެދުން އެއީ ވަރަށް ބޭއިންސާފު ގޮތެއް. ކައިވެނިކޮށް، 18 އަހަރު ނުފުރޭ ދަރިން ތިބި ނަމަ ބޯހިޔާވަހިކަމުން މަހްރޫމްކޮށްގެން ނުވާނެ ވަކި އުމުރަކަށް ބަލައިގެން،" "މިހާރު" އާ ވާހަކަ ދެއްކި މީހަކު ބުންޏެވެ.
އޭނާ ބުނި ގޮތުގައި ސަރުކާރުން އަޅާ ފްލެޓްތަކެއް ވަކި އުމުރަކަށް ހާއްސަ ކުރުމަކީ މައްސަލައެކެވެ.
"އަޅުގަނޑުމެން ބުރަކޮށް މަސައްކަތްކޮށްގެން މުޅި އުމުރު މި ހޭދަކުރީ. އޭގެ އަގު ސަރުކާރުން ވަޒަންނުކުރާ ތަން މި ފެންނަނީ،" އޭނާ ބުންޏެވެ.
ރަށްރަށުގެ މީހުންނަށް ފުރުސަތެއް ނެތް؟
ދެން އޮތީ މާލޭގައި ރަށްވެހިވެގެން އުޅޭ އެހެން ރަށްރަށުގެ މީހުންނަށް މިފަހަރު ދިމާވާ ހުރަހެވެ. އެންމެ ފަހުން ދޫކުރި ފްލެޓްތަކުގެ ވަކި އަދަދެއް ރަށްރަށުގެ މީހުންނަށް ހާއްސަކުރި އެވެ. އެކަމަކު 7،000 ފްލެޓުގެ ތެރޭގައި ރަށްރަށުގެ މީހުންނަށް ވަކި ކެޓަގަރީއެއް ކަނޑައަޅައިފައެއް ނުވެ އެވެ.
"އުމުރުން ވީހާ ދުވަހެއް މިވީ، މާލޭގައި. އެކަމަކު އެއްވެސް ބުރަކުން ފްލެޓެއްގައި ލައްވައެއް ނުލި. އެންމެ ފަހުން މި ބުރުގައި މިއޮތީ، ރަށްރަށުގެ މީހުންނަށް މާ ބޮޑަށް ވެސް ފުރުސަތު ހަނިކޮށްފައި،" އެހެން މީހަކު ބުންޏެވެ.
އޭނާ ދެކޭ ގޮތުގައި މީގައި އެންމެ އިންސާފުވެރި ގޮތަކީ ކެޓަގަރީތައް ކަނޑަނާޅައި، މިނިސްޓްރީން ކުރިން ބުނެފައިވާ ގޮތަށް، އާއްމުކޮށް ހުޅުވާލުމެވެ. އެންމެ ނިކަމެތި ހާލުގައި، ދިރިއުޅޭ ރައްޔިތުން ކަނޑައަޅައި ފްލެޓް ދޭން އެންމެ އިންސާފުވެރި ގޮތަކީ އެއީ ކަމަށް ވެސް އޭނާ ދެކެ އެވެ.
ހުޅުމާލެ އިން 704 ފްލެޓް ދޭން ނިންމައި މި ސަރުކާރުން ހުޅުވާލި ބޯހިޔާވަހިކަމުގެ ފުރަތަމަ މަޝްރޫއަށް އެކަނި ވެސް 15،000 މީހުން ކުރިމަތިލި އެވެ. މިހާ ގިނަ އަދަދެއްގެ ބަޔަކު ކުރިމަތިލުމުން، މިނިސްޓްރީން ދިން ޔަގީން ކަމަކީ، ދެން ހުޅުވާލާ މަޝްރޫއަކަށް އަލުން ފޯމު ލާން ނުޖެހޭނެ ކަމެވެ.
ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެފައި ވަނީ، އެ މީހުން އޮޓޮމެޓިކުން ދެ ވަނަ ބުރަށް ގޮސްފައިވާ ކަމަށާއި އެ މީހުން ކުރަން ޖެހޭނެ ކަމަކީ ދިރިއުޅުމުގެ ހާލަތުން ބަދަލުވި ކަންކަމުގެ މައުލޫމާތު ފޯމުގައި ހިމެނުން ކަމަށެވެ.
އެކަމަކު އެ އުސޫލަށް މިހާރު ވަނީ ބަދަލު ގެނެސްފަ އެވެ.
އަލަށް ހަދާ ފްލެޓްތަކަށް ކުރިމަތިލާން ޖެހެނީ އާ ފޯމަކުންނެވެ. ކުރިން ފޯމު ލާފައި ތިބި މީހުން ވެސް އާ ފޯމެއް ހުށައަޅަން ޖެހޭ ގޮތަށް ބަދަލު ގެނައީ، ކުރިން ފޯމު ލާފައިވާ އެތައް ބައެއްގެ ދިރިއުޅުމުގެ ހާލަތު ބަދަލުވެ، ކުދިންގެ އަދަދު ވެސް އިތުރުވުން އެކަށީގެންވާތީ އެންމެ އިންސާފުވެރި އުސޫލަކުން ފްލެޓްތައް ދިނުމަށް ކަމަށް މުއިއްޒު ވިދާޅުވެފައިވެ އެވެ.
ބޯހިޔާވަހިކަމުގެ ޝަކުވާ ބޮޑުވެފައިވާތީ، ރައީސް ޔާމީން ވަނީ، ހުޅުމާލޭ ދެ ވަނަ ފިޔަވަހީގައި 80،000 މީހުންނަށް ފްލެޓް އެޅުމުގެ ބިޔަ މަޝްރޫއެއް ފައްޓަވައިފަ އެވެ. މި މަޝްރޫއުގައި ބައެއް ފްލެޓް އަޅަން ހަވާލުކުރީ ސަރުކާރުގެ އެކި ކުންފުނިތަކާ އެވެ. ޗައިނާ އިން ދޭ ލޯނު އެހީގައި އަޅާ ފްލެޓްތަކުގެ މަސައްކަތް ކުރަނީ ޗައިނާގެ ކުންފުންޏަކުންނެވެ.
މި މަޝްރޫއުގެ ބޮޑު ބައި އަންނަ އަހަރު ނިމޭނެ ކަމަށް ސަރުކާރުން ބުނެ އެވެ.