ރާއްޖެ އާއި އައިވަރީ ކޯސްޓާ ދެމެދު ސިޔާސީ ގުޅުން މިއަދު ގާއިމްކޮށްފި އެވެ.
ފޮރިން މިނިސްޓްރީން ބުނީ ނިއު ޔޯކުގައި ހުންނަ ރާއްޖޭގެ ދާއިމީ މިޝަންގައި ބޭއްވި ރަސްމިއްޔާތުގައި، ސިޔާސީ ގުޅުން ގާއިމްކުރުމުގެ އެއްބަސްވުމުގައި ސޮއި ކުރެއްވީ އދ. އަށް ރާއްޖެ އިން ކަނޑައަޅާފައި ހުންނަވާ ދާއިމީ މަންދޫބު ޑރ. އަލީ ނަސީރާއި އައިވަރީ ކޯސްޓުގެ ފަރާތުން އދ. އަށް ކަނޑައަޅާފައި ހުންނަވާ އެ ގައުމުގެ ދާއިމީ މަންދޫބު ބާނާޑް ޓަނޫހް-ބޫޗޯއާ ކަމަށެވެ.
އައިވަރީ ކޯސްޓާ، ރާއްޖެ އިން ސިޔާސީ ގުޅުން ގާއިމްކުރި އިރު، އދ. ގެ އެންމެ ބާރު ގަދަ އަދި އެންމެ ވާދަވެެރި ކައުންސިލް ކަމަށްވާ ސެކިއުރިޓީ ކައުންސިލްގެ މެމްބަރު ކަމަށް ރާއްޖެ އިން ވާދަ ކުރުމަށް ކުދި ގައުމުތަކުގެ ވޯޓު ހޯދުމުގެ ކެމްޕޭނެއް ވަނީ ފަށައިފަ އެވެ. އެ ކެމްޕޭންގެ ދަށުން، ވަރަށް ފަހުން ވަނީ ޒެމްބިއާ އެކު ވެސް ސިޔާސީ ގުޅުން ގާއިމްކޮށްފަ އެވެ.
އައިވަރީ ކޯސްޓާއެކު ރާއްޖެއިން މިހާތަނަށް ސިޔާސީ ގުޅުން ގާއިމްކުރި ގައުމުތަކުގެ އަދަދު 167 އަށް އަރަ އެވެ.
އައިވަރީ ކޯސްޓަކީ ހުޅަނގު އެފްރިކާގެ ގައުމެކެވެ. އާބާދީގައި ގާތްގަނޑަކަށް 24 މިލިއަން މީހުން އުޅޭ އެ ގައުމުގެ ގިނަ މީހުންނަކީ މުސްލިމުންނެެވެ. ސިޔާސީ ގުޅުން ގާއިމްކުރުމުގެ ކުރިން ވެސް ރާއްޖެ އާއި އައިވަރީ ކޯސްޓަކީ ގުޅިގެން މަސައްކަތް ކުރި ދެ ގައުމެވެ.
