އައްޑޫގައި ވަކި ދައުލަތެއް އުފައްދަން ކުރީގެ ރައީސް މުހައްމަދު ނަޝީދު މަޝްވަރާ ކުރައްވާ އޯޑިއޯއެއް ސޯޝަލް މީޑިއާގައި ލީކުކޮށްލައިފި އެވެ.
އައްޑޫގެ ބަޔަކާ އެކު ނަޝީދު ވާހަކަފުޅު ދައްކަވާ އެ އޯޑިއޯ އަކީ ކޮން އިރެއްގެ އޯޑިއޯއެއް ކަމެއް ސާފެއް ނުވެ އެވެ. އަދި އޯޑިއޯގައި ނަޝީދާ އެކު މަޝްވަރާ ކުރަނީ ކޮން ބައެއް ކަމެއް ވެސް ސާފެއް ނުވެ އެވެ.
އޯޑިއޯގައި، އައްޑޫގައި މުޒާހަރާ ކުރުމާ ގުޅޭގޮތުން ނަޝީދާ ވާހަކަ ދައްކަމުން، އައްޑޫގައި ވަކި ދައުލަތެއް ހަދަން ހިނގާށޭ އޭގެ ތެރެއިން އެކަކު ބުނެ އެވެ. ޖަވާބުގައި ނަޝީދު ވިދާޅުވަނީ "ވައްކެއް ނުވެވޭނެ ހަތިޔާރެއް ނެތި" މިހެންނެވެ.
އެކަމަކު އެއީ ވެދާނެ ކަމެއް ކަމަށް ވިދާޅުވުމުން، އައްޑޫ ގޮތަށް އޮތް އެހެން ގައުމެއް މިސާލު ނަޝީދު ނަންގަވަ އެވެ. އެއީ ކެރީބިއަން ސަރަހައްދުގައި އޮން ބްރިޓިޝިން ވާޖިން އައިލެންޑް ޓޯޓަލޯ އެވެ. އެތަނުގައި އުޅެނީ އައްޑޫގެ އާބާދީއާ އެއްވަރުގެ ބައެއް ކަމަށް އެ އޯޑިއޯގައި ނަޝީދު ވިދާޅުވެ އެވެ.
މީގެ އިތުރުން، އައްޑޫގައި މުޒާހަރާ ކުރުމާ ގުޅޭގޮތުން ވެސް ނަޝީދު އޯޑިއޯގައި ވާހަކަފުޅު ދައްކަވަ އެވެ. އަދި އައްޑޫގައި ތިބޭ ސިފައިންގެ އަދަދާ ބެހޭގޮތުން ވެސް ނަޝީދު ސުވާލު ކުރައްވަ އެވެ. މީގެ އިތުރުން، އައްޑޫގައި މުޒާހަރާ ކޮށްފި ނަމަ މާ ބޮޑަށް ނަތީޖާ ނުކުންނާނެ ކަމަށް ވެސް ނަޝީދު އެ އޯޑިއޯގައި ވިދާޅުވެ އެވެ.
މީގެ ކުރިން، އިނގިރޭސިން އައްޑޫގައި ތިބިއިރު 1959 ވަނަ އަހަރު ޔުނައިޓެޑް ސުވަދީބް އައިލެންޑްސްގެ ނަމުގައި އައްޑު އާއި ފުވައްމުލައް އަދި ގދ. އަތޮޅު ހިމެނޭ ގޮތަށް ވަކި ދައުލަތެއް އިއުލާން ކުރި އެވެ. އެކަމަކު އޭގެ ތިން އަހަރު ފަހުން އޭރުގެ ރައީސް އިބްރާހިމް ނާސިރު ސިފައިންނާ އެކު ވަޑައިގެން އެ ދައުލަތް އުވާލައްވައި، ދެކުނުގެ ތިން އަތޮޅު ވެސް ދިވެހި ދައުލަތުގެ ބާރުގެ ދަށަށް އަނބުރާ ގެންދެވި އެވެ.
