ހުޅުމާލޭގައި މިރޭ ހިނގި ނުރައްކާތެރި އެކްސިޑެންޓުގައި ސީރިއަސްވި ދެ ޒުވާނުންގެ ތެރެއިން އުމުރުން 24 އަހަރުގެ މީހާ ދެންމެ މަރުވެއްޖެ އެވެ.
ޓްރީ ޓޮޕް ހޮސްޕިޓަލްގައި ފަރުވާދެމުން ދަނިކޮށް މަރުވި، ދަފްތަރު ނަމްބަރު 1159، މުހައްމަދު ސޮބާހް ހުސެއިނަކީ ޖޮގިން ނިންމާފައި ހިނގާފައި ދިޔަ މީހާ އެވެ. މި އެކްސިޑެންޓުގައި ސޮބާހްގެ ބޮލަށް ސީރިއަސް ޒަހަމްތަކެއް ވީ، އުމުރުން 18 އަހަރުގެ ދެ ޒުވާނަކު ދުއްވި ސައިކަލް ގޮސް ޖެހިގެން ކަމަށް ފުލުހުން ބުނެފައިވެ އެވެ.
ހުޅުމާލޭގައި ދިރިއުޅުނު ސޮބާހް އަކީ މޯލްޑިވްސް ނޭޝަނަލް ޔުނިވަސިޓީގައި އާކިޓެކްޓުގެ ދާއިރާ އިން ފަސްޓް ޑިގްރީ އަށް ކިޔަވަމުން އައި ޒުވާނެކެވެ. މިއީ އޭނާގެ ކިޔެވުމުގެ ފަހު އަހަރު ވެސް މެ އެވެ.
މިރޭ 9:00 ހާއިރު އަމީން އެވެނިއު ކައިރީގައި ހިނގި މި އެކްސިޑެންޓުގައި އަނިޔާވި މީހުންގެ ތެރެއިން، ސައިކަލް ދުއްވި އުމުރުން 18 އަހަރުގެ އެކަކަށް ފަރުވާ ދިނުމަށް ވަނީ އޭޑީކޭ އަށް ގެންގޮސްފަ އެވެ. ސައިކަލް ދުއްވަން އިން މީހާގެ ބޮލަށް ވެސް ގެއްލުންތަކެއް ވެފައިވެ އެވެ. އަނެކަކަށް އެހާ ބޮޑު ގެއްލުންތަކެއް ނުވެ އެވެ.
ހުޅުމާލޭގައި މިދިޔަ މަހުގެ 29 ވަނަ ދުވަހު ވެސް ނުރައްކާތެރި އެކްސިޑެންޓެއް ހިނގައި، އެކަކަށް ސީރިއަސް އަނިޔާތަކެއް ވަނީ ލިބިފަ އެވެ.