ހުޅުމާލޭގައި މިދިޔަ އަންގާރަ ދުވަހު ހަވީރު ހިނގި ސައިކަލް އެކްސިޑެންޓުގައި ޒަހަމްވި ދެ ޒުވާނުންގެ ތެރެއިން އެކެއްގެ ހާލު އަދިވެސް ވަރަށް ސީރިއަސްކަން "މިހާރު" އަށް އެނގިއްޖެ އެވެ.
ހުޅުމާލޭގައި ސިފައިންނާއި ފުލުހުންނަށް ހަދާ ފްލެޓް އިމާރާތުގެ ކައިރީގައި ދެ ސައިކަލު ޖެހި ހިނގި އެކްސިޑެންޓްގައި ސީރިއަސް ޒަހަމްތަކެއް ލިބިފައިވަނީ 33 އަހަރުގެ ޒުވާނަކަށެވެ. މިހާރު ޓްރީ ޓޮޕް ހޮސްޕިޓަލުގައި ފަރުވާދެމުން އަންނަ އެ ޒުވާނާގެ ބޮލަށް ބޮޑެތި އަނިޔާތަކެއް ވަނީ ވެފަ އެވެ.
އެނގިފައިވާ ގޮތުގައި އެކްސިޑެންޓުގައި އެ ޒުވާނާގެ ސިކުނޑި އަށް ވަނީ ގެއްލުންތަކެއް ލިބިފަ އެވެ. އަދި އޭނާގެ އޮޕަރޭޝަނެއް ކޮށްފައިވާ އިރު އަދިވެސް އޮތީ ހޭނައްތާފައި ކަމަށް އެނގިފައި ވެ އެވެ.
މި އެކްސިޑެންޓުގައި އަނިޔާވި ދެ ޒުވާނުން އެންމެ ފުރަތަމަ ގެންދިޔައީ ހުޅުމާލޭ ހޮސްްޕިޓަލަށެވެ. އެކަމަކު ހާލު ސީރިއަސްވުމުން އެކަކު، ޓްރީ ޓޮޕް ހޮސްޕިޓަލަށް އަދި އަނެއް މީހާ އޭޑީކޭ އަށް ބަދަލު ކުރީ އެވެ.
އެކްސިޑެންޓުގައި ދެން ޒަހަމްވި މީހާގެ ހާލު ރަނގަޅު ކަމަށް އެނގިފައިވެ އެވެ.
މިދިޔަ ހުކުރު ދުވަހުގެ ރޭ ވެސް ހުޅުމާލޭގައި ވަނީ ނުރައްކާތެރި ދެ އެކްސިޑެންޓެއް ހިނގައިފަ އެވެ.
އެ ރޭ ހުޅުމާލޭ ނިރޮޅު މަގު [ބޮޑުމަގު] ން ހިނގާފައި ދިޔަ ދުވަސްވީ މީހެއްގެ ގައިގާ ސައިކަލަކުން ޖެހި ހިނގި އެކްސިޑެންޓުގައި އެ މީހާއަށާއި ސައިކަލް ދުއްވަން އިން މީހާ އަށް ވެސް ވަނީ ބޮޑެތި އަނިޔާތަކެއް ލިބުނެވެ. އަދި ހަމަ އެރޭ ހުޅުމާލޭ ދެ ވަނަ ފޭސްގައި ހިއްކާފައިވާ ސަރަހައްދުގައި ހިނގި އެކްސިޑެންޓެއްގައި ވެސް ޒުވާނަކު ވަނީ ޒަހަމްވެފަ އެވެ.