މިދިޔަ ރޯދަ މަހު ހުޅުމާލޭގައި ހިނގި އެކްސިޑެންޓެއްގައި ޒަހަމްވެގެން ޓްރީ ޓޮޕް ހޮސްޕިޓަލުން ފަރުވާ ދިން ޒުވާނެއްގެ ބިލަށް ދައްކަން ޖެހުނު އެއް ލައްކައަށް ވުރެ ގިނަ ރުފިޔާ އާންމުންގެ އެހީއާ އެކު ދައްކައިފި އެވެ.
މި މަހުގެ އެއް ވަނަ ދުވަހުގެ ރޭ ހުޅުމާލޭ ދެ ވަނަ ފިޔަވަހީގައި ހިނގި ސައިކަލް އެކްސިޑެންޓުގައި ޒަޚަމްވި ލ. ކަލައިދޫ ޕެންޒީމާގޭ މުހައްމަދު ނިޒާމް، 22، ގެ ބިލަށް 350،000 ރުފިޔާ އެރި އެވެ. އެ ފައިސާ ނުދެއްކިގެން، ހޮސްޕިޓަލުން ނުނިކުމެވި ފަސް ދުވަހު އޭނާއަށް އޮންނަން ޖެހުނެވެ.
ޓްރީ ޓޮޕުން ދޭ 30 ޕަސެންޓް ޑިސްކައުންޓާއި އިންޝުއަރެންސްގެ އިތުރުން އާސަންދައިގެ އެހީގައި އެ ބިލްގެ ބޮޑުބައި ވަނީ ކަވަރުކޮށްފަ އެވެ. އެކަމަކު ބާކީ 111،000 ރުފިޔާ އާއިލާއިން ހޯދީ އާއްމުންގެ އެހީތެރިކަމާއެކުގަ އެވެ.
އެކްސިޑެންޓުގައި ނިޒާމްގެ ކޯކަށިގަނޑާއި ނޭފަތުގެ ކަށިގަނޑުގެ އިތުރުން ނިތްކުރިމަތިން، ކަށިގަނޑާ އެކު ވަނީ ފަޅައިގެން ގޮސްފަ އެވެ. އަދި ލޯމަތިން ވެސް ފަޅައިގެން ގޮސް، ލޮލަށް ބޮޑެތި ގެއްލުންތަކެއް ވެފައިވެ އެވެ.
އާއިލާ އިން ބުނިގޮތުގައި އެކްސިޑެންޓަށް ފަހު ނިޒާމް އެންމެ ފުރަތަމަ ގެންދިޔައީ ހުޅުމާލޭ ހޮސްޕިޓަލަށެވެ. އެކަމަކު އެތަނުގައި ސީޓީ ސްކޭން ހެއްދެން ނެތުމުން، ހޮސްޕިޓަލުން ލަފާދިނީ މާލެއަށް ގެންދަން ކަމަށާއި އެކަމަކު އެކަމަށް ވަގުތު ނަގާނެ ކަމަށް ބުނި ކަމަށް އާއިލާއިން ބުންޏެވެ. "ހޮސްޕިޓަލުން ބުނީ ކޮއްކޮގެ ހާލު ސީރިއަސްކަމަށް. އޭރު ނޭފަތުން ލޭ ވެސް ކޮންޓްރޯލް ނުވޭ. ދެން އެތަނުން ސަޖެސްޓް ކުރީ ބޭނުން ނަމަ ޓްރީ ޓޮޕަށް ގެންދަން. އަޅުގަނޑުމެންނަށް އެނގޭ އެތަން އަގުބޮޑުވާނެކަން އެކަމަކު ކޮއްކޮގެ ފުރާނަ ސަލާމަތް ކުރަން އެ ވަގުތު އެ ޑިޒިޝަން ނެގީ،" ނިޒާމްގެ އާއިލާ އިން ވާހަކަދެއްކި މީހަކު ބުންޏެވެ. ޓްރީ ޓޮޕް ހޮސްޕިޓަލުން ވަނީ ނިޒާމުގެ ބޮލުގެ ދެ އޮޕަރޭޝަނަކާއި މޫނު މަތީގެ އޮޕަރޭޝަނެއްކޮށްފަ އެވެ.
ހުޅުމާލޭގެ ދެ ވަނަ ފިޔަވައްސަށް ހުއްދަ ނެތި ވަނުމަކީ މަނާކަމެކެވެ. އެނގިފައިވާ ގޮތުގައި ނިޒާމާއި އިތުރު މީހަކު އެ ސަރަހައްދަށް ވަނީ ގަވައިދާ ހިލާފަށެވެ. އަދި އެ އެކްސިޑެންޓު ހިނގުމާއެކު، އެތަނުގެ ސެކިއުރިޓީ ބެލެހެއްޓުން، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ން ވަނީ ފުލުހުންނާ ހަވާލުކޮށްފަ އެވެ.